ជាតិ
សម្ដេច ហ៊ុន សែន៖ «កុំធ្វើឲ្យប្រជាជនស្រក់ទឹកភ្នែក ដោយសារទង្វើមិនគប្បីនៃកងទ័ពរបស់យើង» សម្ដេចនាយករដ្ឋមន្រ្តី ហ៊ុន សែន និងលោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក នៅលើក្បួនរថយន្តផ្សេងគ្នា នៅក្នុងថ្ងៃរម្លឹកខួប២០ឆ្នាំ នៃការបង្កើតបញ្ជាការដ្ឋានកងទ័ពជើងគោក
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ផ្ដាំឲ្យកងទ័ព និងកងកម្លាំងទាំងអស់ ត្រូវបម្រើផលប្រយោជន៍ជាធំ ដោយមិនត្រូវបង្កទុក្ខលំបាកដល់ពួកគេឡើយ។ កងទ័ពត្រូវតាំងខ្លួនជាកូនចៅប្រជាជន ហើយត្រូវគិតពីសុខទុក្ខរបស់ពួកគាត់ នោះទើបជារឿងប្រសើរ។
«កុំធ្វើឲ្យប្រជាជនស្រក់ទឹកភ្នែក ដោយសារតែទង្វើមិនគប្បីនៃកងទ័ពរបស់យើង។ ត្រូវធ្វើឲ្យកងទ័ពរបស់យើងស្អាតស្អំឡើង ហើយជួយដល់ប្រជាជនគ្រប់កាលៈទេសៈ» ។ នេះជាការបញ្ជារបស់សម្ដេចនាយករដ្ឋមន្ត្រី ហ៊ុន សែន ដែលជំរុញឲ្យកងកម្លាំងប្រដាប់អាវុធ ជួយការពារ និងដោះស្រាយបញ្ហាពលរដ្ឋគ្រប់រូប ជាពិសេសពលរដ្ឋក្រីក្រ មិនថានៅគ្រាមានគ្រោះទឹករាំងស្ងួត គ្រោះទឹកជំនន់ និងបញ្ហាផ្សេងៗ ដែលពួកគាត់ពឹងពាក់ឲ្យជួយនោះឡើយ។
និយាយបែបនេះ មិនមែនសម្ដេច ហ៊ុន សែន ចង់មានន័យថា កងកម្លាំងប្រដាប់អាវុធ តែងតែបង្កបញ្ហាដល់ប្រជាពលរដ្ឋនោះទេ ប៉ុន្តែវាគ្រាន់តែជាការដាស់តឿនពួកគេ ឲ្យយល់ពីអ្វីដែលជាកាតព្វកងទ័ព និងកងកម្លាំងប្រដាប់អាវុធប៉ុណ្ណោះ។
មិនត្រឹមតែកងទ័ពនៅក្នុងប្រទេសនោះទេ ដែលត្រូវបម្រើផលប្រយោជន៍ប្រជាពលរដ្ឋឲ្យល្អ សូម្បីតែកងទ័ព កំពុងឈរជើងនៅក្រៅប្រទេស តាមរយៈកិច្ចសហប្រតិបត្តិការចូលរួមរក្សាសន្តិភាព ក្រោមឆ័ត្រអង្គការសហប្រជាជាតិ ក៏ត្រូវគោរពកាតព្វបម្រើប្រយោជនពលរដ្ឋ ក្នុងប្រទេសនោះជាធំផងដែរ។ នេះជាការបញ្ជាក់របស់ប្រមុខរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com