កីឡាជាតិ
ជាតិ
សិង្ហបុរី និងព្រុយណេ ដកខ្លួនចេញពីព្រឹត្តិការណ៍ AFF U22 នៅកម្ពុជា
× ក្រុមបាល់ទាត់ជម្រើសជាតិអាយុក្រោម២២ឆ្នាំសិង្ហបុរី និងព្រុយណេ បានដកខ្លួនពីព្រឹត្តិការណ៍ AFF U22 Championship ដែលកម្ពុជាធ្វើជាម្ចាស់ផ្ទះ។ ការអវត្តមានក្រុមទាំងពីរ នាំឲ្យការប្រកួតឆ្នាំនេះនៅសល់តែ៩ក្រុមចូលរួមប៉ុណ្ណោះ។
កាលពីថ្ងៃទី១៩ ខែមករា ឆ្នាំ២០១៩ សហព័ន្ធកីឡាបាល់ទាត់សិង្ហបុរីបានប្រកាសពីការដកខ្លួនរបស់ក្រុមជម្រើសជាតិអាយុក្រោម២២ឆ្នាំពីការប្រកួតដណ្តើមពានរង្វាន់ AFF U22 Championship។ ការសម្រេចនេះ គឺដើម្បីទុកពេលឲ្យកីឡាករទៅហ្វឹកហាត់ពង្រឹងសមត្ថភាពនៅក្រៅប្រទេស សម្រាប់ត្រៀមការប្រកួតវគ្គជម្រុះ AFC U23 Championship នាអំឡុងខែមីនា ខាងមុខ។
៣ថ្ងៃបន្ទាប់ពីការដកខ្លួនរបស់សិង្ហបុរី ពោលគឺនៅថ្ងៃទី២២ ខែមករា សហព័ន្ធកីឡាបាល់ទាត់អាស៊ីអាគ្នេយ៍ ក៏បានប្រកាសពីការដកខ្លួនរបស់ក្រុមU22ព្រុយណេ ពីព្រឹត្តិការណ៍នេះផងដែរ។ ប៉ុន្តែមិនបានបញ្ជាក់ពីមូលហេតុច្បាស់លាស់នៃការដកខ្លួននេះទេ។
ការដកខ្លួនជាបន្តបន្ទាប់នេះ ធ្វើឲ្យការប្រកួតរៀបចំដោយសហព័ន្ធកីឡាបាល់ទាត់អាស៊ីអាគ្នេយ៍មួយនេះ នៅសល់តែ៩ក្រុមចូលរួមតែប៉ុណ្ណោះ។ ការដកខ្លួនរបស់ព្រុយណេ នាំឲ្យពូល A នៅសល់វៀតណាម ថៃ ទីម័រខាងកើត ឡាវ និងហ្វីលីពីន ខណៈពូល B មានម្ចាស់ផ្ទះកម្ពុជា ម៉ាឡេស៊ី មីយ៉ាន់ម៉ា និងឥណ្ឌូណេស៊ី។
ព្រឹត្តិការណ៍ AFF U22 Championship រៀបចំចន្លោះពីថ្ងៃទី១៧ កុម្ភៈ ដល់ថ្ងៃទី១ ខែមីនា ឆ្នាំ២០១៩ នៅពហុកីឡដ្ឋានជាតិ។ សម្រាប់ជំនួបបើកឆាកពូល A នៅថ្ងៃទី១៧ ខែកុម្ភៈ ក្រុម U22 ទីម័រខាងកើតត្រូវតទល់ជាមួយថៃ រីឯហ្វីលីពីនជួបឡាវ។ ខណៈជំនួបបើកឆាកពូល A នៅថ្ងៃបន្ទាប់ កម្ពុជាប៉ះម៉ាឡេស៊ី ក្រោយមីយ៉ាន់ម៉ាជួបឥណ្ឌូណេស៊ី៕
Tag:
បាល់ទាត់
AFF U22
សិង្ហបុរី
ព្រុយណេ
© រក្សាសិទ្ធិដោយ thmeythmey.com