ជាតិ
នយោបាយជាតិ
សម្ដេច ហ៊ុន សែន ៖ ប្រទេសខ្លះប្រើទ័ពទៅដណ្ដើមយករដ្ឋដោយគ្មានបញ្ហា ឯយើងប្រើទ័ពការពាររដ្ឋបែរជាប់ឈ្មោះជនផ្ដាច់ការ
រូបពីហ្វេសប៊ុកសម្ដេច ហ៊ុន សែន
×![]()
ដោយ: ធឿន បញ្ញាឬទិ្ធ
ភ្នំពេញ៖ ពីពិធីរម្លឹកខួប២០ឆ្នាំ នៃការបង្កើតបញ្ជាការដ្ឋានកងទ័ពជើងគោក សម្ដេចនាយករដ្ឋមន្ត្រី ហ៊ុន សែន រិះគន់លើការអនុវត្តស្ដង់ដារពីរ មកលើមេដឹកនាំប្រទេសនីមួយៗ តាមរយៈការវាយតម្លៃរបស់ប្រទេសមហាអំណាច។ ក្នុងន័យនេះសម្ដេច ហ៊ុន សែន ចង់សំដៅលើការដឹកនាំរបស់ប្រទេសធំៗ ដែលមិនចេះខុស ហើយប្រទេសតូច តែងតែរងការចោទប្រកាន់។
ថ្លែងចំពោះមុខកងទ័ពរាប់ពាន់នាក់ នៅព្រឹកថ្ងៃទី២៤ មករានេះ សម្ដេច ហ៊ុន សែន បានលើកយកបញ្ហាប្រើប្រាស់ទ័ព ដើម្បីបង្ក្រាបលើបាតុករនៅក្នុងប្រទេសធំៗមកបកស្រាយ។ សម្ដេច ហ៊ុន សែន និយាយចំៗឈ្មោះរដ្ឋាភិបាលបារាំងតែម្ដង ដែលបានដាក់ប្រទេសខ្លួន ក្នុងគ្រាមានអាសន្ន ហើយប្រើប្រាស់កងកម្លាំងប្រដាប់អាវុធ បង្ក្រាបក្រុមបាតុករដោយគ្មានបញ្ហា ប៉ុន្តែកម្ពុជាអាចនឹងមានបញ្ហាប្រសិនជាធ្វើបែបនេះ។
«សូម្បីប្រទេសបារាំងបច្ចុប្បន្ន ក៏ដាក់ប្រទេសក្នុងគ្រាមានអាសន្ន ដើម្បីទប់ស្កាត់នូវចលនាក្រុមអាវកាក់ព័ណ៌លឿង។ ហេតុអ្វីបានបារាំងអាចធ្វើបាន តែកម្ពុជាមិនអាចធ្វើបាន? យើងនៅទីនេះគ្រាន់តែការពាររដ្ឋ។ ប្រទេសខ្លះ គេហ៊ានប្រើកងទ័ពទៅដណ្ដើមយករដ្ឋ គេអាចធ្វើបាន ហើយគ្មានបញ្ហាទៀតផង។ ឯសម្រាប់យើងគ្រាន់តែប្រើទ័ពការពាររដ្ឋបែរមានឈ្មោះថា ជនផ្ដាច់ការ។ វាមិនយុត្តិធម៌ទេ នៅក្នុងលោកិយនេះ»។ នេះជាការលើកឡើងរបស់លោកនាយករដ្ឋមន្ត្រី ហ៊ុន សែន។
ក្រៅពីថ្លែងបែបនេះហើយ ប្រមុខរដ្ឋាភិបាល ក៏ប្រកាសឲ្យកងកម្លាំងប្រដាប់អាវុធ បង្ក្រាបរាល់ទង្វើណា ដែលមានរដ្ឋាភិបាល យល់ឃើញថា ជាបំណងផ្តួលរំលំរដ្ឋាភិបាល ក្នុងន័យដណ្តើមអំណាច ក្រៅប្រព័ន្ធបោះឆ្នោត ដែលផ្ទុយពីរដ្ឋធម្មនុញ្ញផងដែរ។ ក្នុងន័យនេះសម្ដេច ហ៊ុន សែន ហ៊ានប្រើពាក្យថា បើទោះជាមានមនុស្សស្លាប់៤ទៅ៥នាក់ វាប្រសើរជាងស្លាប់ប្រជាជនរាប់ម៉ឺននាក់ ហើយសម្ដេចមិនខ្លាច នឹងធ្វើបែបនេះទេ៕
Tag:
ហ៊ុន សែន
កងទ័ព
ផ្ដាច់ការ
© រក្សាសិទ្ធិដោយ thmeythmey.com
