ជាតិ
សេដ្ឋកិច្ច
ខុនដូនៅកម្ពុជា បរទេសទិញ ៧០ភាគរយ រីឯពលរដ្ឋខ្មែរនឹងងាកមករស់នៅខុនដូនៅ១០ឆ្នាំទៀត
×![]()
ភ្នំពេញ៖ បច្ចុប្បន្នបរទេសកាន់កាប់ចំណែកទីផ្សារខុនដូ ដល់ទៅ ៧០ភាគរយ។ អ្នកក្នុងស្រុក មិនទាន់ទទួលយករបៀបរស់នៅក្នុងអគារខ្ពស់នៅឡើយ។ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា (CVEA) អះអាងថា រយៈពេល១០ ទៅ១៥ឆ្នាំទៀត ការងាកមករស់នៅក្នុងអគារខ្ពស់របស់ប្រជាពលរដ្ឋ ពិសេសអ្នកធ្វើការក្នុងក្រុង នឹងកើតមាន។
ខាងក្រោមនេះជាប្រសាសន៍របស់លោក ច្រឹក សុខនីម ដែលថ្លែងក្នុងសន្និសីទសារព័ត៌មានអំពីស្ថានភាពអចលនទ្រព្យនៅកម្ពុជា នៅថ្ងៃទី២៤ខែមករា៖
ជាការមើលឃើញរបស់ប្រធានសមាគមអចលនទ្រព្យរបស់កម្ពុជារូបនេះ ក្នុងរាជ លែងមាន ឬនៅសល់តិចតួចប៉ុណ្ណោះក្នុងក្រុង លំនៅឋានត្រូវខ្ទាតចេញទៅជាយក្រុង ឬក្រៅក្រុង ដោយជំនួសមកវិញដោយអគារពាណិជ្ជកម្មខ្ពស់។
ដីកាន់តែថ្លៃ ប្រជាជនកើនឡើង ការរស់នៅកាន់តែចង្អៀត។ ប្រជាពលរដ្ឋ ពិសេស អ្នកធ្វើការក្នុងក្រុង ត្រូវបង្ខំចិត្តរស់នៅក្នុងអគារខ្ពស់ៗ ខុនដូ អាផាតមិន ។ នេះជាការវិវឌ្ឍន៍ទៅថ្ងៃមុខ។
«មនុស្សរស់ដូចម្ដេចបើដីចង្អៀតក្នុងរយៈពេល ១០ ទៅ១៥ឆ្នាំខាងមុខ។ ខ្ញុំយល់ថាប្រជាពលរដ្ឋនឹងផ្លាស់ប្ដូរផ្ដត់គំនិត។ សព្វថ្ងៃប្រជាជនកម្ពុជាភាគច្រើន និយមរស់នៅក្នុងផ្ទះល្វែង ផ្ទះវីឡា ប៉ុន្តែទៅអនាគតបែបផែនស៊ីវីល័យរបស់មនុស្សនឹងប្រែប្រួល ពួកគាត់ធ្វើការក្នុងក្រុង ត្រូវរស់នៅក្នុងក្រុង តែត្រូវរស់នៅក្នុងខុនដូ ឬអាផាតមិន»។ នេះជាការលើកឡើងរបស់លោក ច្រឹក សុខនីម ។
លោក ច្រឹក សុខនីម បានបង្ហាញតួលេខនៃការទិញខុនដូដូច្នេះថា៖«ទីផ្សារខុនដូនៃលំនៅឋាននាពេលបច្ចុប្បន្ននេះ ត្រូវបានទិញ ឬកាន់កាប់ដោយជនជាតិបរទេស ៧០ភាគរយ ហើយ ៣០ភាគរយត្រូវបានទិញដោយប្រជាជនខ្មែរ សម្រាប់អ្នកមកពីបរទេសហើយភាគច្រើនពួកគាត់ជួលទេ រស់នៅភាគតិច»៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 5 ថ្ងៃ
