ដោយ៖ Matias Andres
រិន សារត្ន័ ជាកីឡាករឆ្នើមម្នាក់ក្នុងពិភពប្រដាល់នៅកម្ពុជា ហើយក៏ជាកីឡាករគុនចម្រុះប្រចាំនៅ ONE Championship ផងដែរ។ ក្នុងការប្រកួតពីមួយលើកទៅមួយលើក សារត្ន័តែងរិះរកវិធីវិវឌ្ឍន៍ជំនាញក្បាច់គុនរបស់ខ្លួន ឲ្យកាន់តែមានកម្រិតខ្ពស់ថែមទៀត។
សារត្ន័ មានជំនាញច្បាស់លាស់ខាងគុនខ្មែរ ហើយសព្វថ្ងៃរូបគេកំពុងហាត់នៅក្លិប Cambodian Top Team។ មួយរយៈចុងក្រោយនេះ រូបគេបានសម្រេចចិត្តផ្លាស់ប្តូរដ៏ធំមួយ ដោយមានបំណងក្លាយខ្លួនជាកីឡាករអាជីព ខាងគុនចម្រុះវិញ ហើយត្រៀមជាស្រេច ដើម្បីបញ្ចេញស្នៀតដែលខំសំងំហាត់មួយរយៈធំនេះ ឲ្យពិភពលោកបានស្គាល់ នៅលើសង្វៀនធំនាពេលបន្ទាប់។
នៅក្រោមការណែនាំរបស់គ្រូបង្វឹក Nicholas "JJ" Leeមកពីក្លិប Yorky MMA ជាមួយក្លិប CTT ទាំង សារត្ន័ និងម្ចាស់ក្លិបលោក ហ៊ុន ចាន់រាជ ឃើញថាមានចំណុចអភិវឌ្ឍន៍ច្រើនគួរឲ្យកត់សម្គាល់។
លោកចាន់រាជ បង្ហើបប្រាប់ថា៖ «ចាប់ពីប្រកួតលើកមុន មកដល់ឥឡូវ គាត់ផ្លាស់ប្តូរច្រើនមែនទែន ប្រៀបដូចអ្នកប្រយុទ្ធ និងកីឡាករថ្មីសន្លាងម្នាក់អ៊ីចឹង។ គាត់ចាប់ផ្តើមធ្វើនេះធ្វើនោះ គាត់ខំប្រកួត ហើយការគិតក៏ខុសពីមុនដែរ។ ឥឡូវគាត់ដូចអាវុធច្រើនបែបមួយអ៊ីចឹង។ យើងអាចនិយាយបានថា ស្មារតីគាត់គឺផ្ចង់ទៅលើគុនចម្រុះតែម្តង»។
ពីរប្រកួតចុងក្រោយកាលពីឆ្នាំ២០១៨ សារត្ន័ មានកំណត់ត្រាឈ្នះ១ ចាញ់១។ ដូច្នេះគាត់ដឹងថា ខ្លួនត្រូវធ្វើឲ្យបានប្រសើរជាងនេះទៀត ដើម្បីរក្សាកំណត់ត្រាអាចផ្តួលកីឡាករខ្លាំងៗបាន។
ឆ្នាំ២០១៩ ជាឆ្នាំដែលវិស័យក្បាច់គុននៅកម្ពុជា កំពុងផ្ទុះឡើយយ៉ាងកក្រើកពេញផ្ទៃប្រទេស។ រីឯ សារត្ន័ វិញមានឆន្ទៈបញ្ចេញស្នាដៃ នៅលើសង្វៀនអន្តរជាតិ និងដើម្បីបង្ហាញដល់កីឡាករជំនាន់ក្រោយផងដែរ។
ម្យ៉ាងដោយឃើញមិត្តរួមក្លិបដូចជា នៅ ស្រីពៅ និង ឡៅ ចិត្រា ជាដើម នឹងឡើងបញ្ចេញស្នាដៃជាលើកដំបូង នៅថ្ងៃសៅរ៍ ទី១៦ ខែកុម្ភៈ ក្នុងព្រឹត្តិការណ៍ONE: CLASH OF LEGENDS នាទីក្រុងបាងកក ប្រទេសថៃនោះ បានធ្វើឲ្យ សារត្ន័ រឹតតែស្រេកឃ្លានចូលរួមប្រកួត។
សារត្ន័រៀបរាប់ថា៖ «កត្តាជំរុញចិត្តខ្ញុំគឺ ខ្ញុំចង់ប្រកួតនៅបរទេសឲ្យល្អ ដូចកាលឆ្នាំ២០១៨។ ចូលឆ្នាំ២០១៩ គឺខ្ញុំនឹងផ្លាស់ប្តូរខាងជំហរវាយរបស់ខ្ញុំឲ្យខ្លាំងថែមទៀត។ ឥឡូវខ្ញុំខំហាត់សមជាមួយលោកគ្រូ និងជាមួយមិត្តនៅក្លិបរហូត។ ជាពិសេសប្រឹងហាត់ខាងចូលចាប់ក្រោមឲ្យប្រសើរជាងមុន»។
រិន សារត្ន័ មិនត្រឹមតែមានបំណងវិលត្រលប់ចូលក្នុងទ្រុងម្តងទៀតនោះទេ ប៉ុន្តែក៏ចង់ប្រាប់ទស្សនិកជនទូទាំងពិភពលោកថា គាត់ជាកីឡាករម្នាក់ខុសពីមុន។
រីឯមេដឹកនាំក្លិប CTT សំលៀងភ្នែកទៅលើព្រឹត្តិការណ៍ ONE: REIGN OF VALOR ការប្រកួតនៅប្រទេសមីយ៉ាន់ម៉ា សម្រាប់ថ្ងៃទី៨ ខែមីនា ឆ្នាំ២០១៩។ ម្ចាស់ក្លិប CTT ចង់ដាក់កីឡាករឲ្យបានប្រកួតនៅទីនោះ។ ដូច្នេះលោកថា ទោះត្រូវបន្ថែមទម្ងន់ប្រកួតក៏មិនជាបញ្ហាអ្វីនោះដែរ។
លោក ចាន់រាជ បន្ថែម៖ «យើងគិតថា សារត្ន័ត្រៀមខ្លួនអស់ហើយ ទើបយើងហ៊ានលោតទៅប្រកួតប្រភេទទម្ងន់មួយកម្រិតទៀត»។
មិនយូរទៀតទេ ខាង ONE Championship នឹងឲ្យដំណឹងថា សារត្ន័មានឈ្មោះទៅប្រកួតនៅមីយ៉ាន់ម៉ា ឬអត់ ប៉ុន្តែសម្រាប់សារត្ន័ វិញបានត្រៀមចិត្ត និងគំនិតច្បាស់រួចហើយ ថានឹងចាប់យកអាជីពគុនចម្រុះជាប់លាប់ពីពេលនេះតទៅ៕