ជាតិ
លោក លីម ប៊ុនហុក និងលោកស្រី តាន់ ធានី
×![]()
ដោយ: ថ្មីៗ
ព្រះករុណា ព្រះមហាក្សត្រ កាលពីថ្ងៃទី១២ ខែមករា ទ្រង់បានឡាយព្រះហស្ថលេខាតែងតាំង និងផ្តល់ឋានៈមន្ត្រីគណៈកម្មការជាតិយូណេស្កូកម្ពុជា ដោយលោក លីម ប៊ុនហុក កាន់តំណែងជាអគ្គលេខាធិការ ជំនួសលោកស្រី តាន់ ធានី។ តាមព្រះរាជក្រឹត្យដដែល លោកស្រី តាន់ ធានី ឡើងទៅជាទីប្រឹក្សា ដោយមន្ត្រីទាំងពីររូបមានឋានៈស្មើរដ្ឋលេខាធិការ ដូចគ្នា។
លោក លីម ប៊ុនហុក (https://www.linkedin.com/in/bun-hok-lim-62267529/) ដែលក្លាយជាអគ្គលេខាធិការថ្មីនៃគណៈកម្មការជាតិយូណេស្កូកម្ពុជា ជំនួសលោកស្រី តាន់ ធានី មានបទពិសោធន៍បម្រើការនៅអង្គការយូណេស្កូប្រចាំនៅកម្ពុជាចាប់តាំងពីឆ្នាំ២០០៦មក ហើយលោកក៏ជាអតីតសាស្ត្រាចារ្យនៅវិទ្យាស្ថានភាសាបរទេស ផ្នែកភាសាបារាំងនៃសាកលវិទ្យាល័យភូមិន្ទភ្នំពេញផងដែរ។
គណៈកម្មការជាតិយូណេស្កូកម្ពុជា ជាស្ថាប័នដែលស្ថិតក្រោមក្រសួងវប្បធម៌ និងវិចិត្រសិល្បៈ។ តាមព្រះរាជក្រឹត្យចុះកាលពីថ្ងៃទី២៧ ខែមករា ឆ្នាំ២០១៨ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ជាប្រធានរបស់ស្ថាប័ននេះ រីឯលោករដ្ឋលេខាធិការ ជុច ភឿន ជាអនុប្រធាន។
ក្រៅពីនេះ សមាសភាពជាសមាជិក មានលោក ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា លោក សុខ សូកេន អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ លោក ហ៊ុយ សារ៉ាវុធ អនុរដ្ឋលេខាធិការក្រសួងព័ត៌មាន លោក ហាប់ ទូច អគ្គនាយកនៃអគ្គនាយកដ្ឋានបច្ចេកទេសវប្បធម៌ និងលោក ហេង សុផាឌី អគ្គនាយករងនៃអគ្គនាយកដ្ឋានបេតិកភណ្ឌនៃក្រសួងវប្បធម៌ និងវិចិត្រសិល្បៈ។
តាមព្រះរាជក្រឹត្យចុះថ្ងៃទី២៦ ខែមេសា ឆ្នាំ២០១៧ គណៈកម្មការជាតិយូណេស្កូកម្ពុជា មានតួនាទីផ្តល់យោបល់ជូនរដ្ឋាភិបាល លើបញ្ហានានាទាក់ទងនឹងយូណេស្កូ និងកម្មវិធីរបស់យូណេស្កូ រួមទាំងការចូលរួមសកម្មភាពផ្សេងដើម្បីជំរុញឲ្យមានការរីកចម្រើនផ្នែកអប់រំ វិទ្យាសាស្ត្រ វប្បធម៌ និងព័ត៌មាននៅកម្ពុជា៕
Tag:
យួណេស្កូ
តាន់ ធានី
លីម ប៊ុនហុក
© រក្សាសិទ្ធិដោយ thmeythmey.com
