លោក ខៀវ កាញារីទ្ធ ប្រាប់លោក ប្រាក់ សុខុន ថា វិទ្យុVOA និងអាស៊ីសេរី អាចបើកការិយាល័យវិញបាន តែត្រូវអនុវត្តតាមច្បាប់

ជាតិ

លោក ខៀវ កាញារីទ្ធ ប្រាប់លោក ប្រាក់ សុខុន ថា វិទ្យុVOA និងអាស៊ីសេរី អាចបើកការិយាល័យវិញបាន តែត្រូវអនុវត្តតាមច្បាប់

25, Jan 2019 , 4:08 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ វិទ្យុអាស៊ីសេរី(RFA) និងវិទ្យុសំឡេងសហរដ្ឋអាមេរិក (VOA) អាចបើកដំណើរការការិយាល័យនៅក្នុងប្រទេសកម្ពុជាវិញបាន ប៉ុន្តែត្រូវអនុវត្តតាមកាតព្វកិច្ចច្បាប់។ នេះជាលិខិតរបស់រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ដែលផ្ញើរទៅលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។

លោក ខៀវ កាញារីទ្ធ បានរៀបរាប់រឿងរ៉ាវជុំវិញការបិទការិយាល័យព័ត៌មានរបស់ស្ថាប័នទាំងពីរ ដែលបានធ្វើសកម្មភាពផ្សព្វផ្សាយព័ត៌មាន និងបើកការិយាល័យរបស់ខ្លួន អស់រយៈពេលជាច្រើនឆ្នាំមកហើយ ដោយពុំបានចុះបញ្ជីនៅក្រសួងព័ត៌មាន ហើយពុំបានអនុវត្តកាតព្វកិច្ចចុះបញ្ជីពន្ធដារស្របច្បាប់ និងបទប្បញ្ញត្តស្តីពីពន្ធដារឡើយ រហូតដល់បិទការិយាល័យតំណាងរបស់ខ្លួន ទាំងពុំបានជូនដំណឹងដល់អាជ្ញាធរទៀតផង។

ប៉ុន្តែវិទ្យុអាស៊ីសេរី និងវិទ្យុសំឡេងសហរដ្ឋអាមេរិក ស្នើសុំបើកការការិយាល័យឡើងវិញនេះ គឺអាចដំណើរការបាន លុះតែអនុវត្តតាមច្បាប់ប្រទេសកម្ពុជា ឲ្យបានត្រឹមត្រូវជាមុនសិន។ នេះជាការបញ្ជាក់របស់លោក ខៀវ កាញារីទ្ធ។

លិខិតរបស់រដ្ឋមន្ត្រីក្រសួងព័ត៌មាន ដែលផ្ញើរទៅរដ្ឋមន្ត្រីក្រសួងការបរទេស លោក ប្រាក់ សុខុន បានសរសេរយ៉ាងដូច្នេះថា៖« ចំពោះករណីស្នើសុំបើកការិយាល័យតំណាងវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) អគ្គនាយកដ្ឋានពន្ធដារ បានស្នើមកក្រសួងព័ត៌មាន មុនផ្តល់អាជ្ញាប័ណ្ណ ឬផ្តល់ការអនុញ្ញាតឲ្យចុះបញ្ជីស្របច្បាប់ដល់ការិយាល័យវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) នេះគួរភ្ជាប់នូវលក្ខខណ្ឌនៃការគោរពកាតព្វកិច្ចសារពើពន្ធជាមុន»។

សារព័ត៌មានថ្មីៗ មិនទាន់អាចទាក់ទងអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ជុំវិញការស្នើសុំបើកការិយាល័យឡើងវិញ របស់ស្ថាប័នព័ត៌មានទាំងពីរខាងលើនៅឡើយទេ។

កាលពីថ្ងៃទី១២ កញ្ញា ឆ្នាំ២០១៧ វិទ្យុអាស៊ីសេរី ដែលមានវត្តមាននៅកម្ពុជាជិត២0ឆ្នាំ មកហើយនោះ បានប្រកាសថា ផ្អាកការិយាល័យព័ត៌មាន នៅរាជធានីភ្នំពេញមួយរយៈសិន ពោលគឺក្រោយមួយសប្ដាហ៍ ដែលកាសែត The Cambodia Daily ប្រកាសបិទទ្វា ដោយសារបញ្ហាមិនបានបង់ពន្ធ ៦, ៣លានដុល្លារ ក្នុងរយៈពេល១០ឆ្នាំកន្លងមក។ វិទ្យុអាស៊ីសេរី បានអះអាងថា ការចាត់វិធានក្តៅរបស់រដ្ឋាភិបាលកម្ពុជា គឺជាមូលហេតុដែលខ្លួនត្រូវបង្ខំចិត្តផ្អាកការិយាល័យព័ត៌មាន។ យ៉ាងណាក៏ដោយ វិទ្យុអាស៊ីសេរី ប្រកាសបន្តផ្សព្វផ្សាយព័ត៌មានដដែល នៅលើរលកធាតុអាកាសកម្រិតទាប បណ្តាញសង្គមហ្វេសប៊ុក (Facebook) យូធូប (Youtube) និងគេហទំព័ររបស់ខ្លួន(www.rfa.org/khmer/)។ ប៉ុន្តែវិទ្យុសំឡេងសហរដ្ឋអាមេរិក ត្រូវបានគេមើលឃើញថា បន្តបំពេញការងារជាធម្មតានៅកម្ពុជា។

តែយ៉ាងណាក្រសួងព័ត៌មាន បានបញ្ជាក់ថា ការអនុញ្ញាតឲ្យវិទ្យុសំឡេងសហរដ្ឋអាមេរិក និងវិទ្យុអាស៊ីសេរី បើកការិយាល័យនៅកម្ពុជាវិញ គឺអនុវត្តតាមសេចក្តីសម្រេចរដ្ឋាភិបាល ដែលប្រកាសប្ដេជ្ញារលើកតម្កើងនូវសិទ្ធិសេរីភាពសារព័ត៌មាន សេរីភាពនៃការបញ្ចេញមតិស្របតាមរដ្ឋធម្មនុញ្ញ និងច្បាប់ជាធរមាន៕