កីឡាជាតិ
ជាតិ
លោក Koji Gyotoku អតីតគ្រូបង្វឹកក្រុមជម្រើសជាតិប៊ូតង់និងនេប៉ាល់ នឹងដឹកនាំក្រុម U18 កម្ពុជា
× គ្រូបង្វឹកជនជាតិជប៉ុន លោក Koji Gyotoku នឹងដឹកនាំក្រុមជម្រើសជាតិសាលាបាល់ទាត់ជាតិបាទីអាយុក្រោម១៨ឆ្នាំជំនួសលោក Musashi Mizushima ដែលបានផុតកិច្ចសន្យា។ គ្រូបង្វឹកថ្មីរូបនេះ មានបទពិសោធធ្លាប់ដឹកនាំក្លិបអាជីពជាច្រើននៅជប៉ុន ប៊ូតង់ និងនេប៉ាល់ជាដើម។
ក្រោយលោក Musashi Mizushima ផុតសុពលភាពកិច្ចសន្យា សហព័ន្ធកីឡាបាល់ទាត់កម្ពុជា នឹងតែងតាំង លោក Kuji Gyotoku ឲ្យធ្វើជាគ្រូបង្វឹកក្រុមជម្រើសជាតិសាលាបាល់ទាត់ជាតិបាទីអាយុក្រោម១៨ឆ្នាំ។ នេះបើតាមការបញ្ជាក់របស់ស្ថានទូតជប៉ុននៅលើហ្វេសប៊ុកផ្លូវការ។ តែយ៉ាងណា សហព័ន្ធកីឡាបាល់ទាត់កម្ពុជា មិនទាន់បានប្រកាសជាផ្លូវការនៅឡើយទេ។
លោក Gyotoku Koji (កណ្តាល)ពេលដឹកនាំឲ្យក្រុមជម្រើសជាតិនេប៉ាល់ឈ្នះជើងឯក AFC Solidarity Cup
ហ្វេសប៊ុកខាងលើបានរៀបរាប់ដូច្នេះថា៖«លោក Koji Gyotoku គ្រូបង្វឹកថ្មីរបស់សាលាបាល់ទាត់ជាតិបាទី និងក្រុមកីឡាករជម្រើសជាតិកម្ពុជាអាយុក្រោម១៨ឆ្នាំ បានចូលជួបសម្តែងគួរសមចំពោះលោក ខេនីជី បេសសូ ឧបទូតនៃស្ថានទូតជប៉ុន»។
លោក Gyotoku ជាអតីតកីឡាករលេងឲ្យក្លិបអាល្លឺម៉ង់ Werder Bremen ពីឆ្នាំ១៩៨៧-១៩៨៩ ហើយធ្លាប់ធ្វើជាគ្រូបង្វឹកដឹកនាំក្រុមជម្រើសជាតិប៊ូតង់ពីឆ្នាំ២០០៨-២០០៩ និងក្រុមជម្រើសជាតិនេប៉ាល់ពីឆ្នាំ២០១៦-២០១៨។
ស្ថានទូតជប៉ុនរំពឹងថា ក្រុមកីឡាករជម្រើសជាតិកម្ពុជានឹងទទួលបានបទពិសោធនិងជំនាញថ្មីៗពីគ្រូបង្វឹករូបនេះ ដើម្បីអភិវឌ្ឍន៍សមត្ថភាព ក៏ដូចជាបច្ចេកទេសឲ្យកាន់តែប្រសើរថែមទៀត។ លោក Gyotoku នឹងចាប់ផ្តើមបង្វឹកចាប់ពីខែកុម្ភៈ ឆ្នាំ២០១៩ ខាងមុខនេះ៕
Tag:
បាល់ទាត់
Koji Gyotoku
Musashi Mizushima
© រក្សាសិទ្ធិដោយ thmeythmey.com