ជាតិ
លោក ខៀវ កាញារីទ្ធ ប្រាប់មន្ត្រីឲ្យបកស្រាយឲ្យលឿន បើមាន Fake News ទាក់ទងនឹងស្ថាប័នខ្លួន រូបលោក ខៀវ កាញារីទ្ធ ពីទីភ្នាក់ងារសារព័ត៌មានកម្ពុជា
× ភ្នំពេញ៖នៅក្នុងពិធីអបអរខួបលើកទី៤០ឆ្នាំ នៃការចេញផ្សាយកាសែតកម្ពុជា លេខដំបូង រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានប្រាប់ដល់ស្ថាប័នព័ត៌មានទាំងអស់ រួមគ្នាផលិតព័ត៌មានជាក់លាក់ ដើម្បីលុបបំបាត់ និងទប់ស្កាត់ព័ត៌មានក្លែងក្លាយ (Fake News) ដែលបំពុលសង្គមឲ្យមានភាពចលាចល។
លោក ខៀវ កាញារីទ្ធ យល់ថាកន្លងមក មានព័ត៌មានក្លែងក្លាយជាច្រើនដែលពាក់ព័ន្ធនឹងមន្ត្រីក្រសួង ស្ថាប័នថា្នក់ជាតិ ដែលបណ្តាលឲ្យមហាជនមានការភ័ន្តច្រឡំ។ រដ្ឋមន្ត្រីក្រសួងព័ត៌មានរូបនេះ បានបញ្ជាក់ប្រាប់ដល់ មន្ត្រីក្រសួងទាំងអស់ បើសិនជាមានព័ត៌មានមិនពិតពាក់ព័ន្ធនឹងសា្ថប័នរបស់ខ្លួន ត្រូវធ្វើការបកស្រាយ និងពន្យល់ឲ្យលឿនទាន់ពេលវេលា ដើម្បីកុំឲ្យមានការសង្ស័យពីមហាជន។
លោករដ្ឋមន្ត្រី បានសង្កត់ធ្ងន់ថា សម្រាប់ព័ត៌មានក្លែងក្លាយ ដែលប៉ះពាល់ដល់សង្គម មន្ត្រីព័ត៌មានរបស់លោក នឹងធ្វើការថតទុកជាឯកសារ ដើម្បីរៀបចំចាត់វិធានការតាមផ្លូវច្បាប់។ លោកចាត់ទុកថា ការបន្សាបព័ត៌មានមិនពិត អាចធ្វើឲ្យពលរដ្ឋជៀសផុតពីព័ត៌មានញុះញង់ដែលនាំឲ្យវឹកវរនៅក្នុងសង្គម។ លោកក៏បានស្នើឲ្យស្ថាប័នព័ត៌មានទាំងអស់ សហការគ្នាប្រឆាំងនឹងព័ត៌មានក្លែងបន្លំ ដែលបង្កជាបញ្ហានៅក្នុងសង្គម និងចិត្តសាស្ត្រ៕
© រក្សាសិទ្ធិដោយ thmeythmey.com