ជាតិ
នយោបាយជាតិ
វៀតណាមផ្សាយថា ពលរដ្ឋខ្លួន៨០% នៅកម្ពុជាស្របច្បាប់ តែមន្ត្រីខ្មែរថា គ្មានតួលេខទេ សហគមន៍វៀតណាមតាមដងទន្លេ
× ក្នុងចំណោមជនជាតិវៀតណាមទាំងអស់ ដែលកំពុងរស់នៅក្នុងប្រទេសកម្ពុជា មានប្រមាណពី៧០ ទៅ ៨០ភាគរយឯណោះ ដែលត្រូវបានអាជ្ញាធរកម្ពុជា ទទួលស្គាល់និងផ្តល់ភាពស្របច្បាប់។ នេះបើតាមការចុះផ្សាយរបស់សារព័ត៌មានវៀតណាមមួយឈ្មោះ Viet Nam News នៅថ្ងៃទី២៩ ខែមករា ឆ្នាំ២០១៩។
សារព័ត៌មានវៀតណាម បានដកស្រង់សម្តីរបស់លោក Lương Thanh Nghị អនុប្រធាននៃគណៈកម្មាធិការទទួលបន្ទុកកិច្ចការវៀតណាមនៅក្រៅប្រទេស ទៅចុះផ្សាយថា ជនជាតិវៀតណាម មានប្រមាណ១,១សែននាក់ ដែលកំពុងរស់នៅក្នុងប្រទេសកម្ពុជា ដោយភាគច្រើន គឺរស់នៅតាមដងទន្លេសាប។
យ៉ាងណាក៏ដោយ ផ្នែកខ្លះនៃសហគមន៍វៀតណាម មិនទាន់មានភាពច្បាស់លាស់ពីការទទួលបានភាពស្របច្បាប់ក្នុងប្រទេសកម្ពុជានៅឡើយទេ។ សារព័ត៌មាននេះ សរសេរពីសម្តីរបស់លោក Lương Thanh Nghị យ៉ាងដូច្នេះថា៖«ប៉ុន្មានឆ្នាំមកនេះ វៀតណាម-កម្ពុជា បានសហការគ្នា ដើម្បីបញ្ជាក់ពីឯកសារស្របច្បាប់ សម្រាប់ជនជាតិវៀតណាម ដែលរស់នៅក្នុងប្រទេសកម្ពុជា»។
លោក កែវ វណ្ណថន អគ្គនាយករងនៃអគ្គនាយករដ្ឋានអន្តោប្រវេសន៍ បកស្រាយថា នាពេលបច្ចុប្បន្ន កម្ពុជា ពុំទាន់មានតួលេខជាក់លាក់ពីជនបរទេសស្របច្បាប់និងមិនស្របច្បាប់ ដូចសារព័ត៌មានវៀតណាម ចុះផ្សាយនោះទេ។ លោក ប្រាប់សារព័ត៌មានថ្មីៗតាមទូរសព្ទ យ៉ាងដូច្នេះថា៖«យើង កំពុងធ្វើជំរឿនថា ស្របច្បាប់ប៉ុន្មាន ហើយខុសច្បាប់ប៉ុន្មាន។ ឥឡូវ កិច្ចការហ្នឹង មិនទាន់ចប់ទេ ដូច្នេះ កុំទាន់អាលនិយាយរឿងហ្នឹង»។
មន្ត្រីជាន់ខ្ពស់ខាងអន្តោប្រវេសន៍រូបនេះ បញ្ជាក់ថា ការធ្វើជំរឿននេះ នឹងត្រូវបញ្ចប់នៅថ្ងៃទី៣០ ខែមិថុនា ឆ្នាំ២០១៩ ហើយបន្ទាប់មក ទើបអាចដឹងអំពីចំនួនជនបរទេស ដែលស្របច្បាប់និងមិនស្រប់នៅកម្ពុជា។ លោក លើកឡើងថា ជនបរទេសសរុប មានប្រមាណ១,៨សែននាក់ ដែលកំពុងរស់នៅក្នុងប្រទេសកម្ពុជា។
មន្ត្រីរដ្ឋាភិបាលខាងលើ បន្ថែមថា ជនបរទេសណា ដែលសមត្ថកិច្ចរកឃើញថា ប្រើប្រាស់ឯកសារខុសប្រក្រតី ដូចជា អត្តសញ្ញាណប័ណ្ណ សៀវភៅគ្រួសារ និង លិខិតឆ្លងដែន ជាដើម នឹងត្រូវដកហូតមកវិញ ហើយនឹងត្រូវបណ្តេញចេញពីកម្ពុជា។
កាលពីថ្ងៃទី២១ ខែមករា ឆ្នាំ២០១៩ រដ្ឋាភិបាលកម្ពុជា បានផ្សព្វផ្សាយរបាយការណ៍ពីជនបរទេសនៅកម្ពុជា ដោយរបាយការណ៍នោះ បង្ហាញថា រដ្ឋាភិបាល បានដកហូតឯកសារមិនប្រក្រតីជាង៣ម៉ឺនឯកសារ ពីជនបរទេស ហើយឯកសារដែលត្រូវដកហូត ពីជនជាតិវៀតណាម មានច្រើនជាងគេ ដែលមានដល់ទៅ៩០ភាគរយ។ ចំណែក ជនបរទេសខុសច្បាប់ ដែលរដ្ឋាភិបាលបណ្ដេញ មានជាង៣ម៉ឺននាក់៕
Tag:
កម្ពុជា
វៀតណាម
អន្តោប្រវេសន៍
© រក្សាសិទ្ធិដោយ thmeythmey.com