ជាតិ
សង្គមជាតិ
រដ្ឋមន្ត្រីព័ត៌មាន ហួសចិត្តនឹងអ្នកស្រាវជ្រាវថៃ ដែលថាករណីខ្យល់ពុលបណ្ដាលមកពីកសិករខ្មែរដុតចំបើង
× លោក ខៀវ កាញារីទ្ធ បានសម្ដែងការហួសចិត្តទាក់ទងនឹងអ្នកវិភាគបរិស្ថានថៃដែលបានលើកឡើងថា ខ្យល់ពុលក្នុងប្រទេសខ្លួនបណ្ដាលមកពីកសិករកម្ពុជាដុតចំបើង។ នេះបើយោងតាមការទំព័រហ្វេសប៊ុករបស់លោក។
«ស្វាគមន៍ សម័យអ្នកវិភាគឯករាជ្យដ៏រុងរឿង»។ នេះជាសំណេររបស់រដ្ឋមន្ត្រីក្រសួងព័ត៌មាន ដែលហួសចិត្តនិងសរសេរបែបចំអកថា ស្រុកថៃនៅពេលនេះ ក៏សំបូរអ្នកវិភាគឯករាជ្យដូចស្រុកខ្មែរដែរ ព្រោះទើបឃើញអ្នកវិភាគថៃមួយបាននិយាយថា អាកាសធាតុកខ្វក់នៅបាងកកគឺបណ្តាលមកពីអ្នកស្រែស្រុកខ្មែរដុតចំបើងតាមស្រែទេ ។
កាសែតថៃបាងកកប៉ុស្តិ៍បានចុះផ្សាយសម្រង់សំដីរបស់អ្នកស្រាវជ្រាវថៃពីររូបគឺលោក Siwat Phongpiachan និង លោក Serm Janchai ដោយពួកគេបានអះអាងថាករណីខ្យល់ពុលនៅទីក្រុងបាងកកបណ្ដាលមកពីកសិករកម្ពុជាដុតចំបើងតាមវាលស្រែ។ ប៉ុន្តែអាជ្ញាធរថៃបានបដិសេធកាលើកឡើងនេះផងដែរ។
លោក Pralong Damronthai អគ្គនាយកនាយកដ្ឋានគ្រប់គ្រងការបំពុលនិយាយថា អង្គភាពរបស់លោកបានតាមដានទីតាំងជាច្រើនទាំងក្នុង និងក្រៅប្រទេសដែលមានករណីដុតចំបើងតាមស្រែ។ លោកបន្តថា បើគិតគូរតាមក្បូនគណនាសម្រាប់ការវិភាគអាកាសធាតុដែលបង្កើតដោយទីភ្នាក់ងារការពារបរិស្ថានអង្គកាសហប្រជាជាតិ ខ្យល់បក់ធូលីល្អិតៗពីកម្ពុជាសំដៅទៅខេត្តត្រាត និងឈូងសមុទ្រថៃឯណោះ មិនមែនសំដៅក្រុងបាងកកឡើយ។ ចំពោះករណីខ្យល់កខ្វក់នៅបាងកក គឺបណ្ដាលមកពីធូលីបង្កដោយមូលហេតុក្នុងស្រុកប៉ុណ្ណោះ។
លោក នេត ភក្ត្រា អ្នកនាំពាក្យក្រសួងបរិស្ថាន បាននិយាយថា មន្ត្រីជំនាញនៃក្រសួងបានវាស់ខ្យល់រួចហើយ ដោយឃើញថាស្ថាន ភាពខ្យល់នៅក្នុងប្រទេសកម្ពុជាមានលក្ខណៈល្អប្រសើរ ពោលគឺគ្មានសារធាតុពុលនោះទេ។
គួរបញ្ជាក់ថា នាពេលថ្មីៗនេះរដ្ឋាភិបាលថៃ បានប្រកាសឲ្យសាលារៀន និងគ្រឹះស្ថានអប់រំមួយចំនួន បិទដំណើរការបណ្តោះអាសន្ន ដើម្បីការពារសុវត្ថិភាពសុខភាពកុមារ និងសិស្ស និស្សិតទាំងអស់ ខណៈឥទ្ធិពលខ្យល់កខ្វក់បន្តកើនឡើង (កម្រិត PM2.5 ) បង្កឲ្យមានបញ្ហាសុខភាព។ ជាពិសេសបញ្ហាផ្លូវដង្ហើម ដែលកំពុងគ្របដណ្តប់នៅទីក្រុងបាងកក និងខេត្តចំនួន៤ ដូចជា ខេត្តសាមុទ្របាកាន សមុទ្រសាខន នន្ទបុរី និងខេត្តណាខនប៉ាធុម៕
© រក្សាសិទ្ធិដោយ thmeythmey.com