ផ្កាអង្គាសីលឆ្នាំនេះលក់ដាច់និងបានថ្លៃជាងឆ្នាំមុន!

ជាតិ

បទយកការណ៍ / បទសម្ភាសន៍

ផ្កាអង្គាសីលឆ្នាំនេះលក់ដាច់និងបានថ្លៃជាងឆ្នាំមុន!

05, Feb 2019 , 3:45 pm

រូបភាព

ដោយ: ប៉ូ សាគុន

ភ្នំពេញ៖ ឈ្មួញលក់ផ្កាអង្គាសីល ក្នុងឱកាសចូលឆ្នាំចិនអះអាងថា ឆ្នាំនេះពួកគេលក់ដើមផ្កាដាច់ច្រើន ហើយក៏បានតម្លៃថ្លៃជាងឆ្នាំមុនដែរ។ អ្នកលក់ផ្កាទាំងនោះសុទ្ធសឹងជាឈ្មួញកណ្ដាល ខ្លះទៅទិញដល់ជើងភ្នំ ហើយខ្លះទៀតចាំទិញនៅភ្នំពេញ។ ឈ្មួញទាំងនោះ មានសុទិដ្ឋិនិយមថា ទៅឆ្នាំក្រោយៗផ្កាអង្គាសីលនឹងកាន់តែលក់ដាច់ ព្រមទាំងបានតម្លៃថ្លៃផង។

សូមតាមដានបទយកការណ៍ដែលរៀបរៀងដោយកញ្ញា ប៉ូ សាគុន ដូចតទៅ៖

**audio2**

នៅតាមបណ្ដោយផ្លូវហាណូយជិតផ្សារដីហុយ គេសង្កេតឃើញកន្លែងលក់ដើមផ្កាអង្គាសីលជាហូរហែ។ កន្លែងខ្លះលក់នៅសល់តិចតួច ហើយខ្លះទៀតក៏នៅសល់ច្រើនគួរសម។ អ្នកទិញមានទាំងខ្មែរកាត់ចិន និងជនជាតិចិន ដោយចតឡាននិងម៉ូតូ នៅចិញ្ចើមផ្លូវ មុខកន្លែងលក់ផ្កាតែម្ដង។

ជាអ្នកលក់ផ្កានៅតាមបណ្ដោយផ្លូវហាណូយ អ្នកស្រី ចេត វណ្ឌី កំពុងញាប់ដៃញាប់ជើងរៀបដើមផ្កាអង្គាសីលចងជាបាច់។ ទីតាំងមួយនេះមានអ្នកលក់បួននាក់ ដែលមានប្ដីប្រពន្ធ កូនប្រុសម្នាក់ និងក្មួយម្នាក់។ ពួកគេខ្លះបាញ់ទឹកផ្កា ខ្លះហៅភ្ញៀវឱ្យទិញផ្ការបស់ខ្លួន ហើយខ្លះទៀតកំពុងកាត់គល់ដើមផ្កាយកចំណែកងាប់ចេញ។

ដោយសារតែឆ្នាំនេះអាកាសធាតុក្ដៅខ្លាំង ធ្វើឱ្យផ្កាអង្គាសីលរីកច្រើន អ្នកស្រី ចេត វណ្ឌី ឆ្លើយតបទាំងដៃក្ដិចផ្ការីកចោល ថា ទោះជាយ៉ាងណាឆ្នាំនេះ ដើមផ្កាអង្គាសីលនៅតែលក់ដាច់។ អ្នកស្រីបន្ថែម ៖«ឆ្នាំនេះឃើញចិនមកទិញគ្រាន់បើ។ ដើមស្អាតថ្លៃជាងដើមមិនសូវស្អាត។ បើចងត្រឹមត្រូវបាន១៥ដុល្លារដែរក្នុងមួយដើមនេះ»។

ម៉ោងប្រមាណ៦ល្ងាច នៅទីនេះដើមផ្កាអង្គារសិល្ប៍នៅមិនដល់១០ដើមតូចៗផង។ ភ្ញៀវចេះតែចេញចូលមិនដាច់ អ្នកស្រី វណ្ឌី ឆ្លៀតរាក់ទាក់ភ្ញៀវខណៈពេលផ្ដល់បទសម្ភាសដល់ខ្ញុំ ដោយអ្នកស្រីអះអាងថា ខ្លួនលក់ដើមផ្កាធូរថ្លៃជាងកន្លែងដទៃ ដោយសារតែអ្នកស្រីមិនយកចំណេញច្រើន។ «ផ្កាកន្លែងខ្ញុំថោកជាងគេរាល់ឆ្នាំ។ មកពីខ្ញុំទៅទិញដល់កន្លែង ហើយគេទិញតពីយើងគេលក់ថ្លៃហើយ។ ពេលផ្ការីកអ៊ីចឹង ភ្ញៀវចេះតែថាមិនល្អពីលិចពីកើត។ បើផ្កាមិនរីកមិនអីទេ។ នេះជាការបញ្ជាក់បន្ថែមរបស់អ្នកស្រី ចេត វណ្ឌី។

ស្ត្រីដែលប្រកបរបរតពីម្ដាយតាំងពីសម័យសង្គមរាស្ត្រនិយមរូបនេះ ជឿថាឈ្មួញដែលអាចលក់ដើមផ្កាអង្គាសីលបាន ទាល់តែមានរាសីខ្ពស់ដែរ។ បញ្ជាក់ទាំងដៃលើកប្រែដើមផ្កាពីម្ខាងទៅម្ខាង ស្ត្រីសម្បុរស្រអែមរូបនេះ ថាឆ្នាំនេះផ្ការបស់ខ្លួនស្ទើរតែងាប់ទាំងស្រុង តែជាសំណាងល្អ ដែលវាប្រែជារស់នឹងលក់អស់ឆាប់នោះ។ អ្នកស្រីថាអ្នកប្រកបរបរនេះ បើលក់ខាតត្រូវលក់ដីលក់ផ្ទះសងគេផងក៏មាន។ អ្នកស្រី វណ្ឌី បញ្ជាក់យ៉ាងដូច្នេះ ៖«យើងអត់រាសី អាចលក់ផ្ទះលក់ដីសងគេក៏មាន។ ផ្កាខ្ញុំយកពីព្រៃមក គេថាងាប់ទាំងអស់ហើយ ខ្មៅសន្លឹកងាប់ទាំងអស់ ដល់ខ្ញុំយកមកដាក់ទឹក រស់ទាំងអស់វិញ។ ដល់ទៅអ្នកមានដើមផ្កាល្អ បែរទៅជាមិនល្អវិញ»។

ឆ្នាំនេះស្ត្រីវ័យប្រមាណជាង៥០រូបនេះ មានដើមផ្កាអង្គាសីលលក់ប្រមាណ១០០ដើម ដែលអ្នកស្រីថាលក់ដាច់ខ្លាំង បើទោះបីផ្កាទាំងនោះរីកជាងឆ្នាំមុនៗបន្តិចក្ដី។ យ៉ាងណាក៏ដោយ ផ្ការីកច្រើននៅមុនថ្ងៃចូលឆ្នាំចិន ជាហេតុនាំឱ្យគេលក់មិនសូវបានតម្លៃថ្លៃនោះទេ។ នៅមុនថ្ងៃចូលឆ្នាំមួយថ្ងៃ អ្នកស្រី វណ្ឌី លក់បានចំណេញប្រាក់ប្រមាណ៣០០ដុល្លារដែរហើយ។ នៅថ្ងៃចូលឆ្នាំចិនទីមួយ អ្នកស្រី វណ្ឌី ជ្រើសរើសដើមផ្កាណាដែលរីកល្អ ទុកលក់ចំថ្ងៃនេះ។

អ្នកមានពិសោធលក់ផ្កាតពីម្ដាយរូបនេះ ប្រៀបការមើលថែដើមផ្កាអង្គាសិល ដូចទៅនឹងការមើលថែកូនខ្ចី។ អ្នកស្រី វណ្ឌី ពន្យល់ ៖«ដូរទឹកកាប់ជើង ថែដូចអ្នកកូនខ្ចីចឹង។ បើមិនចេញផ្កាកាប់រាល់ថ្ងៃ»។

ងាកមកចាប់អារម្មណ៍បុរសវ័យ២៨ឆ្នាំ ដែលជាអ្នកជួយលក់ផ្កាឱ្យមីងរបស់ខ្លួនវិញម្ដង។ លោក សុវណ្ណ មុន្នីជាតិ ថាភាពរស់រាយគឺជាមន្តអាគមក្នុងការលក់ដូរ បើទោះជាគេមិនទិញ តែក៏ធ្វើឱ្យភ្ញៀវមានអារម្មណ៍ល្អនឹងអ្នកលក់ដែរ។ ទើបមានពិសោធលក់ផ្កាត្រឹមបីថ្ងៃ ដែលមិនសូវចេះប្រើភាសាអន្ទងចិត្តអ្នកទិញឱ្យស្របតាមខ្លួន តែអ្នកលក់រូបនេះរក្សាបានស្នាមញញឹមដាក់ភ្ញៀវជានិច្ច ដែលជាហេតុនាំឱ្យភ្ញៀវពិបាកឈានជើងដើរចេញពីកន្លែងរបស់លោក។ លោក មុន្នីជាតិ ពន្យល់ទាំងភ្នែកមើលទៅដើមផ្កា ៖« ភ្ញៀវគេមើលទឹកចិត្តអ្នកលក់ គេមើលទឹកមុខអ្នកលក់ បើអ្នកលក់ធ្វើមុខក្រញូវដូចផ្កាមិនទាន់រីកចឹង អ្នកទិញក៏គេមិនចង់ចូលដែរ។ ពេលភ្ញៀវចូលមកយើងរាក់ទាក់គេចឹងទៅ គេឃើញយើងរាក់ទាក់ ទោះយើងកាត់តម្លៃ ៤០ឬ ៥០ដុល្លារក៏គេនៅតែទិញ នៅតែតថ្លៃយើងដែរ។ ពេលខ្លះគេឱ្យចុះតម្លៃតែមួយម៉ាត់ទេ ពួកខ្ញុំចេះតែលក់ទៅ នេះហើយគេថាមន្តអាគមរកស៊ី»។

ដ្បិតតែផ្កានៅកន្លែងលោក មុន្នីជាតិ នៅសល់តែដើមតូចៗ និងមិនសូវស្អាតក៏ពិតមែន តែកន្លែងនេះហាក់មានមន្តស្នេហ៍ទាក់ចិត្តភ្ញៀវឱ្យចូលទិញមិនដាច់ បើប្រៀបជាមួយកន្លែងដទៃទៀតដែលមិនសូវមានភ្ញៀវចូលនោះ។ បុរសដែលតែងតែចរចារតម្លៃជាមួយភ្ញៀវ ត្រឹមពាក្យថា លក់មិនបានទេ តម្លៃនេះធូរថ្លៃហើយ ថាកន្លែងរបស់ខ្លួនលក់មិនសូវថ្លៃ ទើបបានជាគេចូលចិត្តមកទិញ។ បុរសរោះរាយរូបនេះ អះអាងថាដើមផ្កាកន្លែងរបស់ខ្លួនថ្លៃផុត៤៥ដុល្លារ ហើយទាបផុតប្រមាណតែជាងមួយម៉ឺនរៀលតែប៉ុណ្ណោះ។ លោក បន្ថែម ៖«ថ្លៃអស់បំផុតហើយ៤៥ដុល្លារ ហើយទាបបំផុត១០ដុល្លារ»។

ចំណែកកន្លែងលក់ផ្កាមួយកន្លែងទៀត ដែលនៅមិនឆ្ងាយពីកន្លែងរបស់លោក មុន្នីជាតិ ប៉ុន្មាននោះ គឺជាកន្លែងរបស់អ្នកនាង នាវ ថារី នៅមានដើមផ្កាច្រើនគួរសម ។ នៅទីនេះដើមផ្កាអង្គាសីល មានទំហំធំៗ នឹងមានផ្កាច្រើនផង។ ម៉ោងប្រមាណជាជិត៧យប់ មុនថ្ងៃចូលឆ្នាំចិនមួយថ្ងៃ ភ្ញៀវជិះម៉ូតូនិងឡានមកទិញផ្កានៅទីនេះហូរហែ។

អ្នកនាង ថារី លក់ដើមផ្កាថ្លៃខ្ពស់ផុត ៦០០ដុល្លារ ហើយថ្លៃទាបផុតប្រមាណ២០ដុល្លារអាមេរិក។ ជាឈ្មួញកណ្ដាល អ្នកនាង ថារី ថាឆ្នាំនេះខ្លួនលក់ដាច់ជាងឆ្នាំមុន។ កាលពីឆ្នាំមុនស្ត្រីរូបនេះលក់ខាតថ្លៃដើមប្រមាណ១៥០០ ដុល្លារអាមេរិក។ កាយវិកាឈរមិនស្ងៀម ជើងចេះតែឈានទៅមុខថយក្រោយ វិស័យដូចជាក្មេងឈរលេងយោលខ្លួន ស្ត្រីវ័យជាង៣០ឆ្នាំរូបនេះ ថាខ្លួនលក់បានចំណេញខ្លះហើយ នៅមុនថ្ងៃចូលឆ្នាំមួយថ្ងៃនេះ។ «ឆ្នាំនេះផ្កាលក់ដាច់ជាងឆ្នាំមុន ហើយក៏មានតម្លៃជាងដែរ។ ឆ្នាំមុនលក់សល់ច្រើនណាស់ ឆ្នាំនេះលក់អស់គ្រប់កន្លែង ខ្ញុំនៅសល់តែប៉ុន្មានដើមនេះទៀតទេ»។ នេះជាការបន្ថែមរបស់អ្នកនាង ថារី ។

ស្ពាយកាបូបក្រហម ពាក់អាវក្រៅព័ណ៌សឆ្នូតក្រហម ស្ត្រីមាឌរាងធាត់រូបនេះ ឆ្លើយទាំងទឹកមុខញញឹម ថាខ្លួនចាយទុនប្រមាណ៣ពាន់ដុល្លារ នៅក្នុងឆ្នាំនេះលើជំនួញដើមផ្កាអង្គាសីល។ សម្រាប់តម្លៃ ទាំងខ្មែរកាត់ចិន និងជនជាតិចិន អ្នកនាងលក់ថ្លៃស្មើរគ្នា។ អ្នកលក់រូបនេះជឿថា ទៅឆ្នាំក្រោយផ្កាអង្គាសីលនឹងកាន់តែលក់ដាច់។ អ្នកនាងពន្យល់ ទាំងទឹកមុខញញឹម ៖«លក់ឱ្យខ្មែរនិងចិនតម្លៃដូចគ្នា លក់តាមហាងឆេងទេ»។

ចិន និងខ្មែរកាត់ចិន មានជំនឿលើដើមផ្កាអង្គាសីល ថានឹងនាំលាភសំណាងដល់គ្រួសារ បើគេដាក់តាំងនៅក្នុងផ្ទះរបស់ខ្លួន។ គេក៏មានជំនឿដែរថា បើផ្កាអង្គារសិល្ប៍រីកច្រើននៅថ្ងៃចូលឆ្នាំចិន នោះទ្រព្យសម្បត្តិ នឹងហូរចូលច្រើនពេញមួយឆ្នាំ តែបើមិនរីកវិញ គេក៏រកស៊ីមិនឡើងពេញមួយឆ្នាំដែរ។ ដូច្នេះហើយទើបបានជាអ្នកទិញផ្កា ត្រូវរើសមើលផ្កាណាដែលគេប្រាកដថា នឹងរីកច្រើននៅថ្ងៃចូលឆ្នាំចិន៕