ជាតិ
កម្ពុជាជាប់លេខ១ ជាឋានសួគ៌តម្លៃថោកបំផុតសម្រាប់និវត្តជនបរទេស ជនបរទេសជិះស៊ីក្លូក្នុងរាជធានីភ្នំពេញ។ រូបថត AFP
×
កម្ពុជាបន្តឈរនៅចំណាត់ថ្នាក់លេខ១សម្រាប់រយៈពេល៤ឆ្នាំជាប់គ្នាក្នុងនាមជាទីតាំងល្អដែលមានការចំណាយតិចបំផុតសម្រាប់និវត្តជនបរទេស (The Cheapest Country for Retirees)។ នេះបើតាមសន្ទស្សន៍ Global Retirement Index ប្រចាំឆ្នាំ២០១៩ របស់គេហទំព័រ International Living។
កម្ពុជាដែលស្ថិតនៅតំបន់អាស៊ីអាគ្នេយ៍ ត្រូវបានចាត់ទុកជាឋានសួគ៌មួយ ដោយមានប្រាសាទបុរាណជាច្រើននៅខេត្តសៀមរាប ឆ្នេរខ្សាច់ដ៏ស្អាតនៅបណ្តាខេត្តជាប់សមុទ្រ ព្រះបរមរាជវាំងនៅរាជធានីភ្នំពេញ និងទីតាំងវប្បធម៌ ប្រវត្តិសាស្ត្រជាច្រើនទៀត។
តាមការសិក្សារបស់ International Living និវត្តជនបរទេសអាចរស់នៅដោយស្រួល នៅប្រទេសនៃស្នាមញញឹមមួយនេះ ដោយគ្រាន់តែចំណាយប្រាក់ប្រមាណ១ ២៥០ដុល្លារក្នុង១ខែ សម្រាប់ម្នាក់ ឬប្រហែល២០០០ដុល្លារសម្រាប់ពីរនាក់។ សម្រាប់និវត្តជនពីបណ្តាប្រទេសសេដ្ឋកិច្ចធំៗ វាជាការចំណាយតិចតួចបំផុត ប៉ុន្តែពួកគេអាចទទួលសព្វគ្រប់បែបយ៉ាង។
វៀតណាម ប្រទេសជិតខាងកម្ពុជាស្ថិតនៅលំដាប់ទីពីរ។ ការរស់នៅក្នុងក្រុងហូណូយ ឬហូជីមិញ អាចចំណាយខ្ពស់បន្ថិច ប៉ុន្តែនិវត្តជនបរទេសអាចរស់នៅដោយរីករាយនៅខេត្តលូតលាស់មួយចំនួនដូចជា Da Nang, Hoi An, Nha Trang និង Vung Tau ជាដើម ជាមួយនឹងកញ្ចប់ថវិកាប្រចាំខែ១០០០ដុល្លារអាមេរិក។
ថៃដែលជាប្រទេសជិតខាងមួយទៀតរបស់កម្ពុជា ជាប់ចំណាត់ថ្នាក់លេខបី។ តំបន់ឆ្នេរនានានៅថៃទាក់ទាញភ្ញៀវទេសចរបរទេសយ៉ាងខ្លាំង។ បើតាម International Living ខុនដូជាច្រើនស្ថិតនៅមិនឆ្ងាយពីឆ្នេរសមុទ្រនោះឡើយ ជាពិសេសនៅខេត្តឈៀងម៉ៃ ដូច្នេះវាជាជម្រើសដ៏ប្រសើរសម្រាប់និវត្តជន ដោយគ្រាន់តែចំណាយក្នុងខ្ទង់ប្រមាណ៥០០ដុល្លារអាមេរិកក្នុង១ខែ។
ប្រទេសនៅតំបន់អាមេរិកខាងត្បូង ប៉េរូ និងបូលីវី ស្ថិតនៅចំណាត់ថ្នាក់លេខ៤ និងលេខ៥។ ពីរាជធានីបុរាណរបស់ចក្រភពអ៊ីនកា Machu Picchu ទៅបណ្តាក្រុងទំនើបៗ ប៉េរូក៏ជាឋានសួគ៌មួយសម្រាប់និវត្តជនផងដែរ ជាពិសេសកំដៅថ្ងៃ រីឯបូលីវី មានទីតាំងប្រវត្តិសាស្ត្រអាណានិគមជាច្រើនកន្លែង។
សម្រាប់និវត្តជនដែលមិនសូវរឹតត្បិតការចំណាយ សន្ទស្សន៍ Global Retirement Index ប្រទេសប៉ាណាម៉ា កូស្តារីកា ម៉ិកស៊ិក អេក្វាឌ័រ ម៉ាឡេស៊ី កូឡុំប៊ី ព័រទុយហ្គាល់ និងអេស្ប៉ាញ ជាទីតាំងដែលមិនគួររំលង៕
Tag:
ទេសចរណ៍
និវត្តជន
International Living
© រក្សាសិទ្ធិដោយ thmeythmey.com