អត្ថបទពាណិជ្ជកម្ម
×![]()
ដោយ: ថ្មីៗ
ខេត្តព្រះសីហនុ នឹងរៀបចំព្រឹត្តិការណ៍«សង្ក្រាន្តសមុទ្រ»ដ៏ធំមិនធ្លាប់មាននៅកម្ពុជា ដើម្បីអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០១៩ ខាងមុខនេះ។ ការរៀបចំ«សង្ក្រាន្តសមុទ្រ»នេះឡើង ជាគំនិតផ្តួចផ្តើមរបស់លោក ជាម ហ៊ីម ប្រធានក្រុមប្រឹក្សាខេត្ត និងលោក យន្ត មីន អភិបាលនៃគណៈអភិបាលខេត្តព្រះសីហនុ សហការរៀបចំជាមួយក្រុមហ៊ុន Blue Media Cambodia និងមន្ទីរពាក់ព័ន្ធជាច្រើន។
ព្រឹត្តិការណ៍«សង្ក្រាន្តសមុទ្រ»នឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃ១៤ ខែមេសា រហូតដល់ថ្ងៃទី១៦ ខែមេសា ឆ្នាំ២០១៩ នៅឆ្នេរឯករាជ្យ ជាមួយនឹងការតាំងពិព័រណ៍ទេសចរណ៍ ពាណិជ្ជកម្ម ដោយមានការរៀបចំស្តង់ផលិតផលក្នុងស្រុក ស្តង់ម្ហូបអាហារ និងស្តង់ទេសចរណ៍ ដែលបង្ហាញពីសក្តានុពល និងការអភិវឌ្ឍនានារបស់ខេត្តព្រះសីហនុ។
ព្រឹត្តិការណ៍«សង្ក្រាន្តសមុទ្រ» នឹងមានរៀបចំពិធីសាសនា និងវប្បធម៌នានា ដែលរួមមានការរាប់បាត្រតាមប្រពៃណីព្រះពុទ្ធសាសនា ដោយនិមន្តព្រះសង្ឃជាច្រើនអង្គ ការទទួលទេវតា និងការបង្ហោះគោមជាដើម។ល។
ដោយឡែកនៅក្នុងព្រឹត្តិការណ៍ទាំងមូល នឹងមានរៀបចំនូវកម្មវិធីកម្សាន្តសប្បាយប្លែកៗជាច្រើន ខុសពីព្រឹត្តិការណ៍ដទៃ ជាមួយនឹងគំនិតច្នៃប្រឌិតយ៉ាងស្រស់ស្អាត ផ្សារភ្ជាប់នឹងការបង្ហាញសក្តានុពលរបស់ខេត្តព្រះសីហនុ ក្នុងនោះខ្លោងទ្វារ មានការរៀបចំតុបតែងជាមួយនឹងរូបបង្កងដ៏ធំផងដែរ។
ព្រឹត្តិការណ៍កម្សាន្តចម្រុះ នឹងត្រូវបានរៀបចំឡើងមានដូចជា ការប្រគំតន្ត្រីសម័យដ៏ធំ ដែលមានការចូលរួមពីតារាល្បីៗ ក៏ដូចជាការបង្ហាញនូវផ្ទាំងទស្សនីយភាពវប្បធម៌ ដែលមានការ សម្តែងរួមគ្នារវាងសិល្បករបុរាណ និងសម័យ។ល។ លើសពីនេះទៅទៀត សកម្មភាពលេងកម្សាន្តនៅលើឆ្នេរខ្សាច់ នឹងមានការសម្តែងសៀក ការលេងល្បែងប្រជាប្រិយខ្មែរដ៏ពេញនិយមដូចជាបោះឈូង វាយក្អម ទាញព្រ័ត ឡើងសសរខ្លាញ់ លោតអន្ទាក់ភ្លើង លេងពង្រាត់ទីលើឆ្នេរខ្សាច់ និងលាក់កន្សែងជាដើម។ មិនតែប៉ុណ្ណោះនៅតាមឆ្នេរ និងនៅចន្លោះស្តង់ពិព័រណ៍នីមួយៗ មានល្បែងកម្សាន្តប្លែកៗជាច្រើនទៀតដូចជា ការដើរលើស្បែកជើងក្តារជាក្រុម ការបោះបាល់ឱ្យចំគោលដៅ ការបង្វិលកងភ្លើង ការជះទឹកក្រអូប ស្តង់គូរមុខ ការឈរទ្រឹងរបស់បងមាស និងកញ្ញាប្រាក់ ការដើរបង្ហាញរាងពីសំណាក់បងអ៊ូក អូនម៉ាប់ ឆៃយ៉ាំ នាងមច្ឆា យក្សខ្មែរ ស្តេចល្ខោន ការលេងតន្ត្រីទោល និងសកម្មភាពកម្សាន្តផ្សេងទៀតសរុបជិត៥០មុខ នៅលើឆ្នេរខ្សាច់។ កម្មវិធី ក៏មានរៀបចំកន្លែងស្អាតៗ សម្រាប់យុវវ័យបង្ហាញនូវក្តីស្រលាញ់ចំពោះគ្រួសារ ឪពុកម្តាយផងដែរ ដូចជាការបង្ហោះគោម ដោយភ្ជាប់នឹងពាក្យពេចន៍ជូនពរផ្សេងៗ កន្លែងថតរូបអនុស្សាវរីយ៍ អមជាមួយភ្លើងទៀននៅលើឆ្នេរខ្សាច់ ព្រមទាំងមានការបាញ់កាំជ្រួចទៀតផង។
ដោយក្តីស្រលាញ់ចំពោះប្រជាពលរដ្ឋ ថ្នាក់ដឹកនាំខេត្តដែលមានលោក ជាម ហ៊ីម ជាប្រធានក្រុមប្រឹក្សាខេត្ត និងលោក យន្ត មីន អភិបាលនៃគណៈអភិបាលខេត្តព្រះសីហនុ បានយកចិត្តទុកដាក់ជានិច្ចចំពោះសន្តិសុខ,សុវត្តិភាពចំពោះប្រជាពលរដ្ឋក្នុងខេត្ត ក្នុងនោះក៏មានត្រៀមរៀបចំរថយន្ត សម្រាប់ដឹកជញ្ជូនប្រជាពលរដ្ឋ នៅតាមស្រុកភូមិនានា ក្នុងខេត្តព្រះសីហនុ មកចូលរួមកម្សាន្តក្នុងព្រឹត្តិការណ៍ដ៏ធំនេះទៀតផង។ លើសពីនេះក៏មានការរៀបចំទីតាំង ផ្លូវចេញ-ចូលមានលក្ខណៈធំទូលាយ មានរថយន្តសង្គ្រោះបន្ទាន់ រថយន្តពន្លត់អគ្គិភ័យ កម្លាំងសន្តិសុខការពារប្រចាំការរយៈពេល៣ថ្ងៃនេះ ធ្វើយ៉ាងណាបង្កលក្ខណៈ ឱ្យប្រជាពលរដ្ឋមកកម្សាន្តសប្បាយប្រកបដោយសុវត្ថិភាព ត្រលប់ទៅវិញជាមួយអនុស្សាវរីយ៍ល្អៗ និងស្នាមញញឹម។
ការរៀបចំព្រឹត្តិការណ៍«សង្ក្រាន្តសមុទ្រ»ធ្វើឡើងស្របគ្នាជាមួយនឹងការលើកឡើងរបស់ សម្តេចហ៊ុន សែន ប្រមុខរាជរដ្ឋាភិបាលកម្ពុជា ក្នុងការទាក់ទាញភ្ញៀវទេសចរជាតិ និងអន្តរជាតិទៅកម្សាន្តនៅក្នុងខេត្តព្រះសីហនុឱ្យកាន់តែច្រើន៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
