ឥណ្ឌា និងប៉ាគីស្ថានកាន់តែប្រឈមុខដាក់គ្នា ក្រោយទ័ពឥណ្ឌាវាយប្រហារផ្លូវអាកាសប្រឆាំងក្រុមភេរវជននៅប៉ាគីស្ថាន

អន្តរជាតិ

ឥណ្ឌា និងប៉ាគីស្ថានកាន់តែប្រឈមុខដាក់គ្នា ក្រោយទ័ពឥណ្ឌាវាយប្រហារផ្លូវអាកាសប្រឆាំងក្រុមភេរវជននៅប៉ាគីស្ថាន

26, Feb 2019 , 9:59 pm

រូបភាព

ដោយ: ថ្មីៗ

ឥណ្ឌាអះអាងថាកងទ័ពអាកាសខ្លួនបានសម្លាប់ក្រុមសកម្មប្រយុទ្ធ Jaish-e-Mohammad (JeM) ជាច្រើននាក់ដែលស្ថិតនៅជំរំមួយកន្លែងនាទឹកដីជម្លោះកាស្មៀរ តាមរយៈការវាយប្រហារតាមផ្លូវអាកាស។ ប៉ុន្តែប៉ាគីស្ថានចោទឥណ្ឌារំលោភដែនអាកាសខ្លួន ហើយបណ្តាលឲ្យមានការប្រឈមមុខរវាងមហាអំណាចនុយក្លេអ៊ែរទាំងពីរកាន់តែខ្លាំងថែមទៀតនៅពេលនេះ។

បន្ទាប់ពីកងទ័ពជើងអាកាសប៉ាគីស្ថានទិតៀនថា ឥណ្ឌាបានឈ្លានពានដែនអាកាសរបស់ខ្លួននៅព្រឹកថ្ងៃអង្គារទី ២៦ ខែកុម្ភៈនេះ មន្ត្រីក្រសួងការបរទេសឥណ្ឌាបានប្រកាសប្រាប់អ្នកសារព័ត៌មានថា យន្តហោះចម្បាំងរបស់ខ្លួនវាយប្រហារលើជំរំហ្វឹកហ្វឺន Jaish-e-Mohammad (JeM) សម្លាប់អស់ក្រុមភេរវជនជាច្រើននាក់ដែរ។

បើតាមការចុះផ្សាយរបស់ទីភ្នាក់ងារព័ត៌មាន AFP រដ្ឋលេខាធិការក្រសួងការបរទេសឥណ្ឌាលោក Vijay Gokhale បានបញ្ជាក់ប្រាប់អ្នកសារព័ត៌មានដូច្នេះ៖« ក្រុមភេរវជន Jaish-e-Mohammad (JeM) រួមមេដឹកនាំជាន់ខ្ពស់, អ្នកបង្វឹក និងក្រុមជីហាតជាច្រើននាក់ដែលត្រូវបានបង្វឹកសម្រាប់ការធ្វើអត្តឃាតនោះត្រូវបានកម្ចាត់ហើយ»។

តាមពិតទៅ ឥណ្ឌាជឿជាក់ថា ជំរំដែលត្រូវបានកងទ័ពឥណ្ឌាកម្ទេច តាមការវាយប្រហារផ្លូវអាកាសនេះ គឺជាក្រុមនៅពីក្រោយករណីវាយប្រហារគ្រាប់បែកអត្តឃាត កាលពីថ្ងៃ ១៤ ខែកុម្ភៈកន្លងទៅ ដោយសម្លាប់ទាហានឥណ្ឌាអស់ ៤០នាក់ នៅតំបន់កាស្មៀរ។ ក្រុម JeM ដែលមានទីតាំងនៅក្នុងទឹកដីប៉ាគីស្ថាននេះ ក៏បានប្រកាសថា ខ្លួននៅពីក្រោយករណីវាយប្រហារខាងលើដែរ។

មន្ត្រីជាន់ខ្ពស់ឥណ្ឌាខាងលើបានបន្ថែមថា ការវាយប្រហារផ្លូវអាកាសដែលទ័ពឥណ្ឌាធ្វើនៅពេលនេះ ជាវិធានការទប់ស្កាត់ជាមុន។ នេះក៏ដោយសារ តាមរបាយការណ៍ចារកម្មដែលទុកចិត្តបានដែលឥណ្ឌាទទួលបាននោះគឺ ក្រុម JeM នេះក៏ប៉ុនប៉ងបើកការវាយប្រហារថ្មីមួយទៀតដែរ នៅតំបន់ជាច្រើននៅក្នុងទឹកដីឥណ្ឌា ហើយក្រុមជីហាត ដែលស្ថិតក្នុងជំរំកំពុងហ្វឹកហ្វឺននោះគឺត្រៀមខ្លួន សម្រាប់ការអនុវត្តសកម្មភាពនេះដែរ។

តាមពិតទៅ ឥណ្ឌាប្រកាសពីជោគជ័យក្នុងការកម្ចាត់ភេរវជននេះ ក្រោយពេលដែលកងទ័ពអាកាសប៉ាគីស្ថាន ចោទប្រកាន់មហាយក្សអាស៊ីខាងត្បូងថា រំលោភបំពានដែនអាកាសខ្លួនដែរ។ ឧត្តមសេនីយ៍ទោកងជើងអាកាសប៉ាគីស្ថាន លោក Asif Ghafoor បានបង្ហោះតាម twitter ថា យន្តហោះឥណ្ឌាហោះឆ្លងចូលបន្ទាត់ព្រំដែនបទឈប់បាញ់នៅតំបន់កាស្មៀរ ហើយបានទម្លាក់វត្ថុពីលើអាកាស មុនហោះត្រឡប់ទៅទឹកដីខ្លួនវិញ បន្ទាប់ពីពើបប្រទះនឹងយន្តហោះចម្បាំងរបស់ប៉ាគីស្ថាន ដែលព្យាយាមហោះស្ទាក់ផងនោះ។ យ៉ាងណាក៏ដោយ វត្ថុដែលត្រូវបានទម្លាក់ពីលើយន្តហោះនោះ មិនបានបណ្តាលឲ្យមានអ្នកស្លាប់ឬរបួសឡើយ បើតាមមន្ត្រីយោធាជាន់ខ្ពស់ខាងលើ។

ត្រឡប់មកវិញ ការវិវត្តថ្មីនេះកំពុងធ្វើឲ្យមហាអំណាចនុយក្លេអ៊ែរឥណ្ឌា និងប៉ាគីស្ថានកាន់តែតានតឹងខ្លាំង។ ឥណ្ឌាបន្តចោទប្រកាន់ប៉ាគីស្ថានថា គាំទ្រក្រុមជ្រុលនិយមដែលបន្តបើកប្រតិបត្តិការវាយប្រហារប្រឆាំងទាហាន និងប្រជាជនឥណ្ឌា នៅលើដែនដែលកាស្មៀរ ដែលឥណ្ឌាគ្រប់គ្រងទៀត។ ប៉ុន្តែប៉ាគីស្ថានបានបដិសេធការចោទប្រកាន់ ខណៈដែលឥណ្ឌាក៏បានគំរាមប្រើប្រាស់កម្លាំងទៀត បើសិនប៉ាគីស្ថានមិនអើពើនឹងបញ្ហានេះ។

សូមបញ្ជាក់ថា ឥណ្ឌា និងប៉ាគីស្ថានត្រូវបានបែងចែកជាពីរនៅឆ្នាំ ១៩៤៧ ពេលដែលចក្រភពអង់គ្លេសបញ្ចប់អាណានិយគមរបស់ខ្លួនជាផ្លូវការ។ ភាគីទាំងពីរបានប្រយុទ្ធគ្នាក្នុងសង្គ្រាមបង្ហូរឈាមគ្នាអស់បីដង ចាប់តាំងពីពេលនោះមក ហើយទំនាក់ទំនងទ្វេភាគី នៅតែល្អក់កករដោយសារទឹកដីបែងចែកមិនដាច់ស្រេច កាស្មៀរនេះ៕