ភ្នំពេញ៖ អាជ្ញាធរខេត្តព្រះសីហនុ ប្រតិកម្មសម្តីប្រធានគណបក្សខ្មែរក្រោក ដែលជាសមាជិកឧត្តមក្រុមប្រឹក្សាពិគ្រោះយោបល់ ដែលចោទអាជ្ញាធរអនុវត្តការងារលើដីកំពុងមានទំនាស់នៅភូមិគគី ដោយខុសច្បាប់ ផ្ទុយពីប្រសាសន៍សម្ដេច ហ៊ុន សែន។ អាជ្ញាធរចាត់ទុកសម្តីប្រធានគណបក្សខ្មែរក្រោក ជាការញុះញង់មតិសាធារណជន។
ដើមចមដែលនាំឲ្យមានការឆ្លើយឆ្លងសម្តីគ្នានេះ កើតឡើងក្រោយពីលោក សុខសុវណ្ណ វឌ្ឍនា សារពង្ស បានសរសេរលើគណនីហ្វេសប៊ុកខ្លួនឈ្មោះ William Guang ថា អភិបាលខេត្តព្រះសីហនុ មានថ្លើមធំពាសមេឃ ហ៊ានមើលងាយអនុសាសន៍របស់សម្ដេច ហ៊ុន សែន តាមរយៈការចេញលិខិតអនុញ្ញាត្តិឲ្យឈូសឆាយធ្វើរបងលើដីទំនាស់ភូមិគគីដែលជាដីរបស់រដ្ឋ ហើយស្ថិតក្រោមសាលដីកាខុសច្បាប់នៅឡើយ ។ ក្នុងន័យនេះប្រធានគណបក្សខ្មែរក្រោក បានសង្កត់ធ្ងន់ថា តុលាការកំពូលបានចេញសេចក្ដីសម្រេចទាំងខុសបែបបទគតិយុត្តិ ដែលធ្វើឲ្យលោក យន្ត មីន កំពុងអនុវត្តទាំងបំពានលើមតិណែនាំរបស់សម្ដេចនាយករដ្ឋមន្ត្រី និងបំពានលើសេចក្ដីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទ ដែលចុះកាលពីថ្ងៃទី៣១ មករា ឆ្នាំ២០១៩ ទៀតផង ។
តាមរយៈគណនីហ្វេសប៊ុក William Guang ដែលគេស្គាល់ថា ជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់រូបនេះ បានសរសេរដូច្នេះ៖«លិខិតរបស់លោក យន្ត មីន ធ្វើមុនមួយថ្ងៃនៃការប្រជុំរបស់ឧត្តមក្រុមប្រឹក្សាពិគ្រោះនិងផ្ដល់យោបល់ជាមួយសម្ដេច ហ៊ុន សែន ដែលសម្ដេចលោកបានបញ្ជាឲ្យឧបនាយករដ្ឋមន្ត្រី ជា សុផារ៉ា សើរើឡើងវិញហើយចំពោះបញ្ហាដីនេះ ។ ហើយជនពាក់ព័ន្ធផលប្រយោជន៍លើការយកដីរដ្ឋមកកាត់ក្ដីចែកឯកជន គឺមិនរួចខ្លួនទេ ដីនេះជាដីរដ្ឋ ម្ដេចឲ្យឯកជនទៅបោះរបងវិញ ? យោងលិខិតនេះខ្ញុំនិងធ្វើរបាយការណ៍ដាក់ជូនសម្ដេចភ្លាមឲ្យលោកមានវិធានការចំពោះអភិបាលខេត្តព្រហើនរូបនេះ»។
មួយថ្ងៃក្រោយការលើកឡើងរបស់ប្រធានគណបក្សខ្មែរក្រោកនេះ រដ្ឋបាលខេត្តព្រះសីហនុ ក៏ចេញលិខិតពន្យល់ហេតុផលវិញ។ អ្វីដែលរដ្ឋបាលខេត្ត ចេញបកស្រាយនោះ គឺលើកហេតុផលយោងលើពាក្យស្នើសុំរបស់មេធាវី , របាយការណ៍របស់ក្រុមការងារចុះពិនិត្យលើទីតាំងផ្ទាល់ រួមទាំងសាលដីកាស្ថាពររបស់តុលាការកំពូល កាលពីថ្ងៃទី២១ វិច្ឆិកា ឆ្នាំ២០១៧ កន្លងមក ទើបរដ្ឋបាលខេត្តចេញលិខិតអនុញ្ញាត ឲ្យមានការឈូសឆាយធ្វើរបងលើដីទំនាស់ភូមិគគីនេះ ពោលគឺមុនមួយថ្ងៃ នៃការប្រជុំឧត្តមក្រុមប្រឹក្សាពិគ្រោះ និងផ្ដល់យោបល់ ជាមួយសម្ដេច ហ៊ុន សែន ។ ដោយសារទឡ្ហីករណ៍នេះ ទើបរដ្ឋបាលខេត្តព្រះសីហនុ ហ៊ានអះអាងថា គ្មានចំណុចណា ដែលអាចចោទលោក យន្ត មីន អភិបាលខេត្តព្រះសីហនុ ហ៊ានថ្លើមធំមើលងាយអនុសាសន៍ណែនាំប្រមុខរដ្ឋាភិបាលឡើយ។
សេចក្តីប្រកាសព័ត៌មានរដ្ឋបាលខេត្តព្រះសីហនុ ចុះថ្ងៃទី២ មីនា បានសរសរដូច្នេះថា៖«ចំពោះមតិដែល(ប្រធានគណបក្សខ្មែរក្រោក)បានលើកឡើងថា សាលដីកាដែលបានយកទៅអនុវត្តនោះ ជាសាលដីកាខុសច្បាប់ និងបានបញ្ជាក់ថា តុលាការបានចេញសេចក្តីសម្រេចទាំងខុសបែបបទគតិយុត្ត។ ចំពោះចំណុចនេះ រដ្ឋបាលខេត្តមិនមានសមត្ថកិច្ចគ្រប់គ្រាន់ក្នុងការបកស្រាយ ឬវាយតម្លៃលើសាលដីការបស់ស្ថាប័នតុលាការនោះទេ គឺមានតួនាទីអនុវត្តការងារតាមផ្លូវច្បាប់ និងការស្នើសុំរបស់ស្ថាប័នតុលាការតែប៉ុណ្ណោះ»។
អមជាមួយការបដិសេធនេះ រដ្ឋបាលខេត្តព្រះសីហនុ ចាត់ទុកសម្តីប្រធានគណបក្សខ្មែរក្រោក គ្រាន់តែជាការទាញយកផលប្រយោជន៍ និងលើកតម្លៃខ្លួន ក្នុងឆាកនយោបាយ ដោយប្រើវិធីអុចអាល ញុះញង់ឲ្យសាធារណជន មានការយល់ច្រឡំមកលើលោក យន្ត មីន អភិបាលខេត្ត និងថ្នាកដឹកនាំខេត្តប៉ុណ្ណោះ។
ទាកទងនឹងបញ្ហាដីធ្លីខេត្តព្រះសីហនុនេះ សម្ដេច ហ៊ុន សែន ក៏បានសម្រេចដកអភិបាលរងខេត្តពីររូបគឺលោក ផៃ ប៊ុនវណ្ណៈ និង លោក ស្រ៊ុន ស្រ៊ន់ ដែលជាអ្នកទទួលបញ្ជាចុះទៅអនវុត្តដីការបស់តុលាការកំពូល ដែលសម្រេចឲ្យឧកញ៉ាម្នាក់ឈ្នះក្តីលើប្រជាពលរដ្ឋ នៅភូមិគគីរ ឃុំបិតត្រាង ស្រុក ព្រៃនប់ខេត្តព្រះសីហនុ។ ការដកតំណែងអភិបាលរងទាំងពីររូបនេះ ក្រោយពីមានការអន្តរាគមន៍ ហើយផ្ទុះអំពើហិង្សារវាងកម្លាំងសមត្ថកិច្ច និង ប្រជាពលរដ្ឋប្រមាណ២០០នាក់ ដែលនាំគ្នាទៅតវ៉ានឹងសេចក្តីសម្រេចរបស់តុលាការកំពូល។
ក្រៅពីនេះ សម្ដេច ហ៊ុន សែន ក៏បញ្ជាឲ្យរឹបអូសដីសម្បទានសេដ្ឋកិច្ច ដែលមានជម្លោះដីធ្លីជាមួយប្រជាពលរដ្ឋ យកមកគ្រប់គ្រងវិញ ហើយយកដីនោះ បែងចែកឲ្យពលរដ្ឋវិញ។ ការសម្រេចរបស់សម្ដេច ហ៊ុន សែន បែបនេះ ធ្វើឡើងនៅក្នុងកិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ នៃគណបក្សនយោបាយទាំង១៦ នៅព្រឹកថ្ងៃទី២៨ កុម្ភៈ៕