អន្តរជាតិ
អាមេរិក នឹងឈប់ផ្ដល់ការអនុគ្រោះពន្ធ GSP ឲ្យឥណ្ឌានិងតួកគី នាយករដ្ឋមន្រ្តីឥណ្ឌា នារិន្ទ្រា ម៉ូឌី និងប្រធានាធិបតីអាមេរិក ដូណាល់ ត្រាំ នាជំនួបកន្លងមក។ (រូបភាព AFP)
× ប្រធានាធិបតីអាមេរិក ដូណាល់ ត្រាំ នៅថ្ងៃទី៤ ខែមីនា បានប្រកាសពីបំណងដកប្រព័ន្ធអនុគ្រោះពន្ធទូទៅ (GSP) ពីឥណ្ឌា និងតួកគី។ អាមេរិកចោទឥណ្ឌាថា រឹតត្បិតទីផ្សាររបស់ខ្លួន និងយកពន្ធខ្ពស់ពីការនាំចូលទំនិញរបស់អាមេរិក ខណៈអាមេរិកមិនយកពន្ធនាំចូលពីទំនិញរបស់ឥណ្ឌាជាច្រើនមុខ។ សម្រាប់តួកគីវិញ អាមេរិកចាត់ទុកសេដ្ឋកិច្ចប្រទេសនេះនៅលំដាប់ខ្ពស់ទៅហើយ ដែលមិនចាំបាច់ផ្ដល់ការអនុគ្រោះអ្វីទៀតឡើយ។
ក្នុងលិខិតផ្ញើទៅកាន់ប្រធានរដ្ឋសភា ណាន់ស៊ី ផេឡូស៊ី ប្រធានាធិបតីអាមេរិក ដូណាល់ ត្រាំ បញ្ជាក់ថា លោកមានបំណងដកឥណ្ឌាចេញពីការបញ្ជីប្រទេសកំពុងអភិវឌ្ឍដែលទទួលបានការអនុគ្រោះក្រោមប្រព័ន្ធអនុគ្រោះពន្ធទូទៅ (GSP) ។ លោក ត្រាំ បន្តថា លោកសម្រេចចិត្តបែបនោះ បន្ទាប់ពីការជួបជជែកគ្នារវាងរដ្ឋាភិបាលអាមេរិក និងរដ្ឋាភិបាលក្រុងញូវដែលី។
បើតាមលិខិតដដែល ប្រធានាធិបតីអាមេរិកអះអាងថា ឥណ្ឌាមិនបានផ្ដល់ការធានាពីការបើកចំហទីផ្សារឲ្យបានសមរម្យ និងស្មើភាពសម្រាប់ទំនិញអាមេរិកឡើយ។ ការណ៍នេះត្រូវបានមន្ត្រីចរចាពាណិជ្ជកម្មពន្យល់ថា ជាការបំពានលក្ខខណ្ឌដើម្បីទទួលបានការអនុគ្រោះពន្ធ GSP ។ ទោះជាយ៉ាងណា លោក ត្រាំ ក៏ទុកទ្វារចំហសម្រាប់ឥណ្ឌាក្នុងការទទួល GSP នេះវិញ បើអនុវត្តតាមលក្ខខណ្ឌដែលបានកំណត់។
តាមពិតទៅ ការឈប់ផ្ដល់ការអនុគ្រោះពន្ធ GSP ទៅឲ្យឥណ្ឌា ក៏ជារឿងដែលគេរំពឹងទុកជាមុនទៅហើយ។ អស់ពេលជាច្រើនខែមកនេះ លោកប្រធានាធិបតីអាមេរិកបានរិះគន់ឥណ្ឌាត្រង់ៗពីការកេងចំណេញលើការអនុគ្រោះពន្ធរបស់អាមេរិក។ នោះ គឺពេលដែលឥណ្ឌាអាចនាំចូលផលិតផលចូលទីផ្សារអាមេរិកក្នុងតម្លៃ ៥,៦ពាន់លានដុល្លារដោយមិនបាច់បង់ពន្ធមួយសេន អាមេរិកឯណោះវិញបែរជាត្រូវបង់ពន្ធពេញថ្លៃទៅវិញ។
ការពិចារណាដក GSP ពីឥណ្ឌា ចាប់ផ្ដើមតាំងពីខែមេសា ឆ្នាំ២០១៨ មកម្ល៉េះ បន្ទាប់ពីអាមេរិកត្រួតពិនិត្យលើលក្ខខណ្ឌរបស់ឥណ្ឌាឡើងវិញ។ ក្រោមប្រព័ន្ធអនុគ្រោះ GSP ប្រទេសមួយអាចនាំចូលទំនិញទៅកាន់អាមេរិកដោយមិនបាច់បង់ពន្ធឡើយ ប្រសិនបើគោរពលក្ខខណ្ឌត្រឹមត្រូវដូចជាការបើកចំហទីផ្សារក្នុងកម្រិតសមល្មមណាមួយឲ្យអាមេរិកវិញ។ ប៉ុន្តែអាមេរិករកឃើញថា ឥណ្ឌាបែរជាបង្កើតឧបសគ្គដល់ការរកស៊ីរបស់អាមេរិកទៅវិញ។
ចំណែកតួកគីវិញ ប្រទេសមួយទទួលបានការអនុគ្រោះពន្ធ GSP ពីអាមេរិកតាំងពីឆ្នាំ១៩៧៥មកម្ល៉េះ។ បើតាមការិយាល័យតំណាងចរចាពាណិជ្ជកម្មអាមេរិក ៤៤ ឆ្នាំមកនេះ តួកគីបានបង្ហាញពីការអភិវឌ្ឍសេដ្ឋកិច្ចរបស់ខ្លួនក្នុងកម្រិតមួយដ៏ខ្ពស់ ដែលនេះមានន័យថា ក្រុងអង់ការ៉ាអាចឆ្លងផុតពីកម្មវិធីនេះបានហើយ៕
Tag:
អាមេរិក
ឥណ្ឌា
តួកគី
GSP
© រក្សាសិទ្ធិដោយ thmeythmey.com