ប្រាសាក់សម្ពោធអគារបណ្ណាល័យមួយខ្នង ស្ថិតក្នុងសាលាបឋមសិក្សា និងអនុវិទ្យាល័យក្រចាប់ ខេត្តព្រៃវែង

អត្ថបទពាណិជ្ជកម្ម

ប្រាសាក់សម្ពោធអគារបណ្ណាល័យមួយខ្នង ស្ថិតក្នុងសាលាបឋមសិក្សា និងអនុវិទ្យាល័យក្រចាប់ ខេត្តព្រៃវែង

03, Apr 2019 , 2:29 pm

រូបភាព

ដោយ: ថ្មីៗ

កាលពីថ្ងៃទី២៩ ខែមីនា ឆ្នាំ២០១៩ ប្រាសាក់ បានសម្ពោធដាក់ឱ្យប្រើប្រាស់អគារបណ្ណាល័យមួយខ្នង ដែលស្ថិតនៅក្នុងសាលាបឋមសិក្សា និងអនុវិទ្យាល័យ ក្រចាប់ នាខេត្តព្រៃវែង។ ពិធីនេះ បានប្រព្រឹត្តទៅក្រោមអធិបតីភាពលោក យ៉ាវ សានិន អភិបាលស្រុកកំពង់ត្របែក និងជាតំណាងដ៏ខ្ពង់ខ្ពស់របស់លោកអភិបាលខេត្តព្រៃវែង។

ក្នុងពិធីនេះ ក៏មានវត្តមានអញ្ជើញចូលរួមពីភ្ញៀវកិត្តិយសជាច្រើនរូបផងដែរដូចជា លោក ស៊ុន ប៊ុណ្ណា អនុប្រធាននាយកដ្ឋានអភិវឌ្ឍកម្មវិធីសិក្សា នៃក្រសួងអប់រំ យុវជន និងកីឡា, លោក វ៉ែន ប្រណី អនុប្រធានមន្ទីរអប់រំ យុវជន និងកីឡាខេត្តព្រៃវែង , លោក អ៊ុំ សមអឿន អនុប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ ប្រាសាក់ , ព្រះសង្ឃ អាជ្ញាធរដែនដី លោកគ្រូ អ្នកគ្រូ សិស្សានុសិស្ស និងប្រជាពលរដ្ឋជាច្រើនរយនាក់ នៅក្នុងសហគមន៍ឃុំពាមមន្ទារ ស្រុកកំពង់ត្របែក ខេត្តព្រៃវែង។

នាឱកាសនោះ លោក វ៉ែន ប្រណី អនុប្រធានមន្ទីរអប់រំ យុវជន និងកីឡាខេត្តព្រៃវែង បានថ្លែងអំណរគុណចំពោះប្រាសាក់ដែលសាងសង់អគារបណ្ណាល័យ នៅក្នុងទឹកដីស្រុកកំពង់ត្របែក ខេត្តព្រៃវែង ដែលជានេះកាយវិការសម្បុរសធម៌នេះ និងចូលរួមលើកកម្ពស់វិស័យអប់រំនៅតាមមូលដ្ឋាន។

លោក អ៊ុំ សមអឿន អនុប្រធាននាយកប្រតិបត្តិរបស់ប្រាសាក់ បានមានប្រសាសន៍ថា ការសាងសង់អគារបណ្ណាល័យនេះ គឺជាការងារសង្គមដែលប្រាសាក់ធ្វើឡើង ដើម្បីផ្តល់ជាប្រយោជន៍ដល់បងប្អូនប្រជាពលរដ្ឋក្នុងសហគមន៍ និងចូលរួមលើកកម្ពស់សមត្ថភាពរបស់សិស្សានុសិស្ស នៅតាមសហគមន៍ ពិសេសនៅតាមទីជនបទផងដែរ។

បើតាម លោក អ៊ុំ សមអឿន នៅក្នុងគម្រោងបណ្ណាល័យនេះ ប្រាសាក់បានប្រើប្រាស់ថវិការបស់ខ្លួន សាងសង់អគារបណ្ណាល័យ និងបានផ្ដល់សៀវភៅ សម្ភារ បរិក្ខារ ការបណ្ដុះបណ្ដាលបណ្ណារក្ស និងការគាំទ្រគម្រោងរយៈពេល ៣ឆ្នាំទៀតផង។ លោក អ៊ុំ សមអឿន បញ្ជាក់ថា៖«យើងពិតជាមានសេចក្តីរីករាយណាស់ ដែលបានសាងសង់អគារបណ្ណាល័យទី៣ នៅក្នុងខេត្តព្រៃវែងនេះ។ បណ្ណាល័យ ២ផ្សេងទៀតដែលយើងផ្ដល់បានជូនរួចមកហើយ គឺស្ថិតនៅសាលាបឋមសិក្សាសិរីមង្គល ស្រុកស្វាយអន្ទរ និងសាលាបឋមសិក្សាស្នាយពល នៅស្រុកពារាំង»។

គិតត្រឹមខែមីនា ឆ្នាំ២០១៩នេះ ប្រាសាក់បានសាងសង់អគារបណ្ណាល័យសរុប ៣៤ខ្នង នៅក្នុងខេត្តចំនួន១១ មានខេត្តព្រៃវែង,តាកែវ,កំពង់ស្ពឺ,កំពង់ចាម,កណ្តាល,កំពង់ធំ,សៀមរាប,ព្រះវិហារ ,ខេត្តបាត់ដំបង,ស្វាយរៀង និងខេត្តបន្ទាយមានជ័យ។ នេះបើតាមបញ្ជាក់បន្ថែមរបស់ លោក អ៊ុំ សមអឿន។

ក្នុងឱកាសនោះ លោក ស៊ុន ប៊ុណ្ណា អនុប្រធាននាយកដ្ឋានអភិវឌ្ឍកម្មវិធីសិក្សា នៃក្រសួងអប់រំ យុវជន និងកីឡា ក៏បានថ្លែងអំណរគុណយ៉ាងជ្រាលជ្រៅ និងកោតសរសើរចំពោះប្រាសាក់ ដែលបានផ្ដល់មូលនិធិកសាងបណ្ណាល័យមួយនេះ។ លោកបញ្ជាក់ថា អគារបណ្ណាល័យមួយនេះ ពិតជាមានតម្លៃខ្លាំងណាស់ សម្រាប់សិស្សានុសិស្ស និងអ្នករស់នៅស្រុកកំពង់ត្របែកនេះ។ លោក ពន្យល់ថា៖«នៅទីនេះពិបាកស្វែងរកឯកសារ ឬសៀវភៅអាន សម្រាប់ជាព័ត៌មានបន្ថែមណាស់ ប៉ុន្តែឥឡូវនេះ ពួកគាត់មិនពិបាកដូចមុនទៀតនោះទេ ដោយសារមានអគារបណ្ណាល័យដ៏ស្រស់ស្អាតមួយ ដែលមានសៀវភៅគ្រប់គ្រាន់សម្រាប់ឱ្យសិស្សានុសិស្ស ក៏ដូចជាពលរដ្ឋ បានសិក្សាស្រាវជ្រាវបន្ថែម»។

ទន្ទឹមនឹងនេះ លោក ស៊ុន ប៊ុណ្ណា ក៏បានអរគុណផងដែរ ដែលប្រាសាក់បានសហការយ៉ាងល្អជាមួយនាយកដ្ឋានអភិវឌ្ឍកម្មវិធីសិក្សា នៃក្រសួងអប់រំ យុវជន និងកីឡា ក្នុងការអនុវត្តគម្រោងនេះ ឱ្យទទួលបានជោគជ័យ ដើម្បីរួមចំណែកបណ្ដុះវប្បធម៌អាន និងធនធានមនុស្សនៅកម្ពុជា។

លោក យ៉ាវ សានិន អភិបាលនៃគណៈអភិបាលស្រុកកំពង់ត្របែក បានថ្លែងអំណរគុណយ៉ាងជ្រាលជ្រៅចំពោះប្រាសាក់ ដែលបានផ្ដល់អគារបណ្ណាល័យរហូតដល់៣ខ្នង នៅក្នុងខេត្តព្រៃវែង។ លោកសង្ឃឹមថា សិស្សានុសិស្ស នៅសាលាបឋមសិក្សានិងអនុវិទ្យាល័យក្រចាប់ ទាំងអស់ នឹងខិតខំសិក្សារៀនសូត្របន្ថែមទៀត និងចាប់យកទម្លាប់អានសៀវភៅ។ សម្រាប់លោក យ៉ាវ សានិន នៅបណ្ណាល័យនេះប្រៀបបាននឹងឃ្លាំងផ្ទុកនៅចំណេះដឹងជាច្រើន ដែលអាចជួយឱ្យ សិស្សានុសិស្សទាំងអស់ មានចំណេះដឹងទូលំទូលាយ បំនិនជីវិតផ្សេងៗ ដើម្បីជាទុនក្នុងកសាងអនាគតរបស់ខ្លួន។

លោក យ៉ាវ សានិន បន្ថែមថា៖«ខ្ញុំសូមកោតសរសើរជាខ្លាំង ចំពោះគ្រឹះស្ថានមីក្រូហិរញ្ញវត្ថុប្រាសាក់ ដែលបានផ្តល់អគារបណ្ណាល័យនៅលើភូមិក្រចាប់ក្រោម ឃុំពាមមន្ទារ ស្រុក កំពង់ត្របែកនេះ ទោះបីទីនេះជាតំបន់ឆ្ងាយដាច់ស្រយាល នៅជាប់ព្រំដែនក៏ដោយ។ នេះបង្ហាញពីសុឆន្ទៈពិតៗ របស់ប្រាសាក់ក្នុងការចូលរួមចំណែកជួយដល់សង្គម ជាពិសេសជួយប្រជាពលរដ្ឋនៅតាមទីជនបទ ទាំងផ្នែកផ្ដល់កម្ចីជួយដល់ជីវភាពរស់នៅ និងជួយដល់ការសិក្សារៀនសូត្ររបស់កូនចៅប្រជាពលរដ្ឋ»។

លោកអភិបាលស្រុកកំពង់ត្របែក ក៏បានសំណូមពរឱ្យលោកគ្រូ អ្នកគ្រូ សិស្សានុសិស្ស និងមាតាបិតាសិស្ស ជួយថែរក្សា និងប្រើប្រាស់បណ្ណាល័យនេះឱ្យអស់ពីលទ្ធភាព ដោយជំរុញឱ្យមានការអានឱ្យបានច្រើនផុសផុល ស្រលាញ់ និងថែរក្សាសៀវភៅទាំងអស់ឱ្យបានល្អ ដើម្បីប្រើប្រាស់បានយូរអង្វែង និងច្រើនជំនាន់។

សូមបញ្ជាក់ថា ប្រាសាក់ មានអាជ្ញាប័ណ្ណប្រកបអាជីវកម្ម ជាគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើពីធនាគារជាតិនៃកម្ពុជា និងមានបទពិសោធន៍ដ៏ប៉ិនប្រសប់ ក្នុងរយៈពេលជិត ២៥ឆ្នាំមកហើយ។ ដោយឈរលើមូលដ្ឋានសំខាន់ៗដូចជា ភាពល្អប្រសើរផ្នែកអាជីវកម្ម ការបម្រើសេវាកម្មប្រកបដោយវិជ្ជាជីវៈ ការផ្តល់ដំណោះស្រាយហិរញ្ញវត្ថុដែលមានភាពបត់បែន និងសម្បូរបែប វិសាលភាពនៃបណ្តាញការិយាល័យ បណ្តាញម៉ាស៊ីនអេធីអឹម (ATM) របស់ប្រាសាក់ បានគ្របដណ្ដប់ទូទាំងប្រទេស និងបំពាក់ប្រព័ន្ធធនាគារស្នូលប្រកបដោយភាពទំនើប តម្លាភាព និងសុក្រឹតភាព៕