ជាតិ
ព័ត៍មានសុខភាព
អាការៈដែលបញ្ជាក់ថា ការធាត់របស់អ្នកបណ្តាលមកពីអ័រម៉ូនទៅវិញទេ
× មានកត្តាច្រើនណាស់ដែលអាចធ្វើឲ្យអ្នកឡើងទម្ងន់ដូចជា ការរស់នៅបែបស៊ីដេកៗ ញ៉ាំអាហារមិនផ្តល់សុខភាព និងគេងមិនបានគ្រប់គ្រាន់។ ហេតុផលផ្សេងមួយទៀតគឺដោយសារតែអ័រម៉ូនតែម្តង។ អ្នកប្រហែលជាមិនធ្លាប់ដឹងអំពីរឿងនេះទេ ប៉ុន្តែអ័រម៉ូនមនុស្សយើងអាចដើរតួនាទីថា អ្នកនឹងត្រូវឡើងទម្ងន់ឬអត់ដែរ។ បើប្រៀបធៀបនឹងបុរសវិញគឺថា ស្ត្រីងាយនឹងជួបបញ្ហាឡើងទម្ងន់ដោយសារតែអ័រម៉ូនណាស់ ដោយសារតែការឡើងចុះៗរបស់អ័រម៉ូនក្នុងខ្លួន។ ខាងក្រោមនេះគឺជាអាការៈមួយចំនួនដែលអាចបញ្ជាក់ថា ការធាត់របស់អ្នក បណ្តាលមកពីអ័រម៉ូនទេ៖
អស់កម្លាំងជាប់
អតុល្យភាពអ័រម៉ូនដូចជា ខ្សោយអ័រម៉ូនភេទប្រុស តេស្តូស្តេរ៉ូន អ័រម៉ូនស្ត្រេសឡើងខ្ពស់ ព្រមទាំងកង្វះអ័រម៉ូនក្រពេញទីរ៉ូអ៊ីត អាចធ្វើឲ្យអ្នកមានអារម្មណ៍ថានឿយហត់ជាប់រហូត។ ថ្វីបើយើងប្រហែលជាមានអារម្មណ៍អស់កម្លាំងក្រោយពីធ្វើការពេញមួយថ្ងៃក៏ដោយ តែបើសិនជាអ្នកភ្ញាក់ពីគេងហើយនៅតែមិនមានអារម្មណ៍ល្អទៀត វាប្រហែលជាទាក់ទងនឹងអតុល្យភាពរបស់អ័រម៉ូនហើយ។
ជាតិស្ករក្នុងឈាមឡើងខ្ពស់
កម្រិតជាតិស្ករក្នុងឈាម អាចឡើងខ្ពស់នៅពេលយើងញ៉ាំអាហារមានជាតិកាបូអ៊ីដ្រាតខ្ពស់។ ប៉ុន្តែបញ្ហានេះគឺថា នៅពេលជាតិស្ករឡើងខ្ពស់ជាប់ ភាពរ៉េស៊ីស្តង់របស់អាំងស៊ុយលីនប្រហែលជាកើតឡើងដែរ ដូច្នេះអ្នកនឹងងាយកើតជំងឺទឹកនោមផ្អែមប្រភេទទី២ណាស់ ក្រៅពីធាត់។
ទំហំចង្កេះធំជាងមុន
បើសិនជាអ្នកយល់ថាចង្កេះធំជាងមុន ទោះបីជាមិនញ៉ាំអាហារអ្វីច្រើនក៏ដោយ នោះហើយអាចជាអ័រម៉ូនជាអ្នកបង្កបញ្ហា។ រាងកាយគឺងាយនឹងរ៉េស៊ីស្តង់នឹងអាំងស៊ុយលីនណាស់ នៅពេលអាយុកាន់តែច្រើន រហូតដល់ឡើងទម្ងន់។ ស្ត្រីងាយនឹងមានផលរំខាននេះណាស់ ជាពិសេសនៅពេលគាត់ជាតិរាំងរដូវ។
ស្ត្រេសជាប់
ចំនួនអ័រម៉ូន Cortisol ដែលរាងកាយផលិតឡើងអាចនាំឲ្យឡើងទម្ងន់បាន។ អ័រម៉ូនមួយនេះត្រូវបានគេស្គាល់ថា ជាអ័រម៉ូនស្ត្រេស ដែលកើតឡើងច្រើននៅពេលមានអារម្មណ៍តក់ស្លុត ឬស្ត្រេស។ វាអាចនាំឲ្យឡើងទម្ងន់ដែលពិបាកនឹងស្រកវិញណាស់ ដោយសារតែ Cortisol ធ្វើឲ្យរាងកាយរក្សាជាតិខ្លាញ់ក្នុងខ្លួនកាន់តែច្រើន។
ឈឺក្បាលជាទៀងទាត់
ការឈឺក្បាលអាចបង្កឡើងដោយការមានសម្ពាធក្នុងភ្នែក ខ្សោះជាតិទឹក និងគេងមិនគ្រប់ជាដើម។ ប៉ុន្តែបើសិនជាការឈឺក្បាលច្រើនតែកើតឡើងមុន ឬក្រោយពេលមករដូវ មានន័យថា វាបង្កឡើងដោយការចុះទាបរបស់អ័រម៉ូនអេស្ត្រូជែនហើយ។ ការចុះទាបរបស់អ័រម៉ូននេះក៏អាចធ្វើឲ្យឡើងទម្ងន់ដែរ ដោយសារតែការរំលាយអាហាររងការប៉ះពាល់៕
© រក្សាសិទ្ធិដោយ thmeythmey.com