ជាតិ
នយោបាយជាតិ
សមាជិកឧត្តមក្រុមប្រឹក្សាពីរនាក់ ត្រូវជាប់ឃុំ ព្រោះបំផុសពលរដ្ឋឲ្យទៅយកដីក្រុមហ៊ុន លោកស្រី សុខ រ័ត្នសុវណ្ណបញ្ចៈសីលា ប្រធានគណបក្សនគរប្រជាធិបតេយ្យ
× អ្នកស្រី សុខ រ័ត្នសុវណ្ណបញ្ចៈសីលា ប្រធានគណបក្សនគរប្រជាធិបតេយ្យ (ពីមុនឈ្មោះថាគណបក្សសាធារណរដ្ឋប្រជាធិបតេយ្យ) និង លោក ច័ន្ទ ភាព អនុប្រធាន ត្រូវបានតុលាការខេត្តព្រះវិហារ យកទៅឃុំខ្លួនជាបណ្តោះអាសន្ន។
អ្នកស្រី ជុំ កន្និយ៉ា ប្រធានលេខាធិការដ្ឋានរដ្ឋបាលនៃតុលាការខេត្តព្រះវិហារ ប្រាប់សារព័ត៌មានថ្មីៗតាមទូរសព្ទថា សមត្ថកិច្ច បានឃាត់ខ្លួនអ្នកស្រី សុខ រ័ត្នសុវណ្ណបញ្ចៈសីលា និងអនុប្រធានរបស់អ្នកស្រី តាំងពីមុនចូលឆ្នាំមកម្ល៉េះ ។ ប៉ុន្តែ អ្នកស្រី មិនចាំនោះទេថា ពាក់ព័ន្ធនឹងបទល្មើសអ្វី។
ឧត្តមសេនីយ៍ឯក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការនគរបាលជាតិ អះអាងថា តុលាការចេញដីកាឲ្យឃាត់ខ្លួនអ្នកស្រី សុខ រ័ត្នសុវណ្ណបញ្ចៈសីលា និងរហូតឈានដល់ឃុំខ្លួនបណ្តោះអាសន្ន គឺដោយសារតែអ្នកស្រី ដើរបំផុសបំផុលប្រជាពលរដ្ឋ ឲ្យទៅកាន់ដាប់និងរស់នៅលើដីមួយកន្លែង ដែលរដ្ឋប្រគល់ឲ្យក្រុមហ៊ុនឯកជន ដើម្បីអភិវឌ្ឍ។ លោក ប្រាប់សារព័ត៌មានថ្មីៗ យ៉ាងដូច្នេះថា «គាត់ ឲ្យប្រជាពលរដ្ឋទៅចាប់យកដីនោះ គឺវាបង្កចលាចល»។
អ្នកស្រី សុខ រ័ត្នសុវណ្ណបញ្ចៈសីលា និង លោក ច័ន្ទ ភាព គឺជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់។ ប៉ុន្តែ លោក ឈឹម ផលវរុណ អគ្គលេខាធិការនៃឧត្តមក្រុមប្រឹក្សាពិគ្រោះនិងផ្តល់យោបល់ អះអាងថា ឧត្តមក្រុមប្រឹក្សាពិគ្រោះនិងផ្តល់យោបល់ បានផ្អាកសកម្មភាពរបស់អ្នកទាំងពីរមួយរយៈសិន ក្រោយពីគណបក្សនេះដូរឈ្មោះ ដោយរង់ចាំរហូតទាល់តែមានការតែងតាំងប្រធានប្រតិភូនិងអនុប្រធានប្រតិភូសាជាថ្មីពីគណបក្សនេះ។
។
លោក ឈឹម ផលវរុណ ប្រាប់សារព័ត៌មានថ្មីៗ បែបនេះថា «អត់មានអីប៉ះពាល់ដល់ឧត្តមក្រុមប្រឹក្សាពិគ្រោះនិងផ្តល់យោបល់ទេ ព្រោះសកម្មភាពរបស់ពួកគាត់ គឺមិនស្ថិតក្នុងក្របខណ្ឌរបស់ឧត្តមក្រុមប្រឹក្សាពិគ្រោះនិងយោបល់ឡើយ គឺពាក់ព័ន្ធនឹងសមត្ថកិច្ច។ បើកាលណាខុសច្បាប់ហើយ សូម្បីតែសមាជិកសភា ក៏សមត្ថកិច្ច ត្រូវតែអនុវត្តដែរ»៕
Tag:
សុខ រ័ត្នសុវណ្ណបញ្ចៈសីលា
© រក្សាសិទ្ធិដោយ thmeythmey.com