អន្តរជាតិ
បញ្ជូននាវាដឹកយន្តហោះក្បែរអុីរ៉ង់! អាមេរិក កំពុងធ្វើសង្គ្រាមចិត្តសាស្ត្រ? នាវាដឹកយន្តហោះ USS Abraham Lincoln ។ រូបភាព US Navay
× ការភ័យបារម្ភពីការផ្ទុះជម្លោះរវាងអាមេរិក និងអុីរ៉ង់ បានកើនឡើងនៅថ្ងៃទី៦ ខែឧសភាម្សិលមិញ បន្ទាប់ពីអាមេរិកសម្រេចចិត្តបញ្ជូនក្រុមនាវាប្រយុទ្ធរបស់ខ្លួនទៅកាន់ដែនទឹកក្បែរអុីរ៉ង់។ ប្រមុខការពារជាតិអាមេរិក ផាទ្រីក សាណាហាន់ ចាត់ទុកការពង្រាយក្រុមនាវាប្រយុទ្ធដឹកនាំនាវាដឹកយន្តហោះ USS Abraham Lincoln ជាសារព្រមានទៅកាន់អុីរ៉ង់។ ភាពតានតឹងរវាងអាមេរិក និងអុីរ៉ង់ឡើងកម្ដៅខ្លាំងតាំងពីអាមេរិកដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ មក។
សហរដ្ឋអាមេរិក បានចោទថា អុីរ៉ង់កំពុងរៀបចំផែនការបង្ករឿងដាក់អាមេរិក ឬសម្ព័ន្ធមិត្តអាមេរិកក្នុងតំបន់។ ដោយសាររឿងនេះ រដ្ឋមន្ត្រីស្ដីទីក្រសួងការពារជាតិអាមេរិក ផាទ្រីក សាណាហាន់ បានចេញបញ្ជាឲ្យបញ្ជូនក្រុមនាវាប្រយុទ្ធមួយកងដឹកនាំដោយនាវាដឹកនាំយន្តហោះ USS Abraham Lincoln ទៅកាន់ដែនទឹកក្បែរអុីរ៉ាក់ ដោយលោកចាត់ទុកជាការឆ្លើយតបនឹងការគំរាមកំហែងបង្កឡើងដោយទីក្រុងតេហេរ៉ង់។
តាមរយៈ Twitter ប្រមុខមន្ទីរបញ្ចកោណរូបនេះ បានប្រាប់ឲ្យរបបដឹកនាំអុីរ៉ង់បញ្ឈប់សកម្មភាពបង្កហេតុ ហើយអាមេរិកនឹងឲ្យអុីរ៉ង់ទទួលខុស បើមានការវាយប្រហារណាមួយលើកម្លាំងទ័ពអាមេរិក ឬផលប្រយោជន៍ណាមួយរបស់ខ្លួន។ យ៉ាងណាមិញ មន្ត្រីការពារជាតិជាន់ខ្ពស់រូបនេះ មិនបានបញ្ជាក់ទេថា អ្វីទៅជាការគំរាមកំហែងរបស់អុីរ៉ង់ឡើយ។
តាមពិតទៅ ព័ត៌មាននៃការពង្រាយនាវាដឹកនាំយន្តហោះនេះ ត្រូវបានប្រកាសដោយទីប្រឹក្សាសន្តិសុខជាតិ ចន ប៊ូលតុន កាលពីថ្ងៃទី៥ ខែឧសភា។ មិនមែនតែក្រុមនាវាដឹកយន្តហោះឡើយ អាមេរិកនឹងបញ្ជូនយន្តហោះទម្លាក់គ្រាប់បែកទៅកាន់តំបន់ដែលស្ថិតក្រោមការគ្រប់គ្រងរបស់ទីបញ្ជាការកណ្ដាលរបស់អាមេរិកប្រចាំមជ្ឈិមបូព៌ា។ នេះបើតាមការលើកឡើងរបស់លោក ប៊ូលតុន ។ លោកចាត់ទុក រឿងនេះជាការសារមួយទៅកាន់អុីរ៉ង់ បើអុីរ៉ង់ហ៊ានប៉ះអាមេរិក ឬសម្ព័ន្ធមិត្តអាមេរិកនោះ។
តបនឹងសម្ដីគំរាមរបស់មន្ត្រីអាមេរិក អ្នកនាំពាក្យក្រុមប្រឹក្សាសន្តិសុខជាតិអ៊ីរ៉ង់ Keyvan Khosravi ចាត់ទុកការលើកឡើងរបស់លោក ប៊ូលតុន ជាការប្រើប្រាស់ព្រឹត្តការណចាស់គំរិលដើម្បីធ្វើសង្គ្រាមយុទ្ធសាស្ត្រ។ មន្ត្រីអុីរ៉ង់រូបនេះ ថែមទាំងនិយាយឌឺដងវិញថា លោក ប៊ូលតុន គ្រាន់តែចង់ទាក់ទាញចំណាប់អារម្មណ៍ប៉ុណ្ណោះ។
ខណៈមន្ត្រីគ្រាក់ៗមិនលម្អិតពីផែនការអុីរ៉ង់នោះ មន្ត្រីអាមេរិកដែលត្រូវបានស្រង់សម្ដីដោយទីភ្នាក់ងារព័ត៌មាន Reuters និយាយថា ក្រុងវ៉ាស៊ីនតោនទទួលបានព័ត៌មានចារកម្មដែលរៀបរាប់ពីគម្រោងវាយប្រហាររបស់អុីរ៉ង់ផ្ទាល់ ឬកម្លាំងក្រោមបង្គាប់របស់ខ្លួន។ មន្ត្រីអាមេរិកម្នាក់ដែលមិនបញ្ចេញឈ្មោះបញ្ជាក់ទៀតថា ព័ត៌មានដែលទទួលបានថែមទាំងបានកំណត់ពីទីតាំងនៃការវាយប្រហារ ឬក៏កាលបរិច្ឆេទផងដែរ៕
Tag:
អ៊ីរ៉ង់
អាមេរិក
ផាទ្រីក សាណាហាន់
© រក្សាសិទ្ធិដោយ thmeythmey.com