បេឡារុស មានគម្រោងបង្កើតរោងចក្រដំឡើងរថយន្តក្រុង និងផលិតសំបកកង់រថយន្តនៅកម្ពុជា

ជាតិ

រថយន្ត

សេដ្ឋកិច្ច

29, Jul 2019 , 8:39 pm

រូបភាព

អ្នកស្រី តឹក រ៉េតកំរង រដ្ឋលេខាធិការក្រសួងពាណិជ្ជកម្ម និងលោក ជេនណាឌី ស្វេឌ័រស្គី អនុរដ្ឋមន្ត្រីទី១ នៃក្រសួងឧស្សហកម្មបេឡារុស នាកិច្ចប្រជុំលើកទី៣នៃគណៈកម្មការចម្រុះ ស្តីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ច រវាងកម្ពុជា និងបេឡារុស នាថ្ងៃទី២៦ កក្កដា ឆ្នាំ២០១៩។ រូបភាព៖ AKP

ដោយ: ថ្មីៗ

កម្ពុជា-បេឡារុស បានបើកកិច្ចប្រជុំលើកទី៣ នៃគណៈកម្មការចម្រុះ ស្តីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ច កាលពីថ្ងៃទី២៦ ខែកក្កដា ឆ្នាំ២០១៩កន្លងទៅ។ តាមការចុះផ្សាយរបស់ទីភ្នាក់ងារព័ត៌មានកម្ពុជា(AKP)នៅក្នុងកិច្ចប្រជុំនេះ ប្រទេសទាំង២ បានឯកភាពគ្នាជាច្រើនចំណុចក្នុងនោះ ក៏មានគម្រោងបង្កើតរោងចក្រដំឡើងរថយន្ត និងសំបកយានយន្ត និងនាំចេញផ្នែកនាំចេញផ្នែកវិស័យកសិម្មផងដែរ។

AKP បានស្រង់សម្តី អ្នកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម ដែលបានចូលរួមក្នុងកិច្ចប្រជុំនោះថា ប្រទេសទាំង២ បានឯកភាពគ្នាលើចំណុចមួយចំនួន ដូចជា៖ ១. លើកិច្ចសហប្រតិបត្តិការពាណិជ្ជកម្ម និងសេដ្ឋកិច្ច រួមមានការផ្គត់ផ្គង់គ្រឿងម៉ាស៊ីន សំបកកង់ ផលិតផលវាយនភណ្ឌ ឧស្សាហកម្មធុនស្រាលពីបេឡារុស មកកម្ពុជា និងការផ្គត់ផ្គង់កៅស៊ូធម្មជាតិ ផលិតផលកសិកម្ម និងអាហារសមុទ្រមកកម្ពុជា។ ២. ការផ្គត់ផ្គង់ឱសថ និងគ្រឿងបរិក្ខារមកកម្ពុជា។ ៣. វិស័យវិទ្យាសាស្ត្រ និងបច្ចេកវិទ្យាព័ត៌មានវិទ្យា។ ទី៤. វិស័យអប់រំ និងវប្បធម៌។ ទី៥. វិស័យទេសចរណ៍។ ទី៦. កិច្ចសហប្រតិបត្តិការរវាងរាជធានីភ្នំពេញ និងទីក្រុងមីនស្កផងដែរ។

សម្រាប់លោកស្រី តឹក រ៉េតកំរង កិច្ចសហប្រតិបត្តិការពាណិជ្ជកម្ម និងសេដ្ឋកិច្ច រវាងកម្ពុជា និងបេឡារុស គឺជាមូលដ្ឋានមួយដ៏សំខាន់ ក្នុងការគាំទ្រ និងសម្រួលដល់ប្រតិបត្តិការពាណិជ្ជកម្ម ទំនាក់ទំនងវិស័យឯកជន និងធុរកិច្ចនានា។ កម្ពុជា ក៏លើកទឹកចិត្តឲ្យបេឡារុស ជំរុញការនាំចេញផលិតផលកសិកម្មកម្ពុជា ទៅកាន់ទីផ្សារបេឡារុស និងពិនិត្យលទ្ធភាព បង្កើតរោងចក្រដំឡើងរថយន្តក្រុង និងផលិតសំបកកង់រថយន្ត ដើម្បីផ្គត់ផ្គង់នៅទីផ្សារកម្ពុជា និងក្នុងតំបន់។ នេះបើតាមការចុះផ្សាយរបស់ AKP ដដែល៕