អន្តរជាតិ
បុរសចិនជាច្រើន ផ្តើមទទួលផ្នត់គំនិតការធ្វើជាឪពុកចាំផ្ទះ មើលថែកូន ប្រភពរូប៖ វេបសាយចិន womenofchina.cn
×
ដោយ៖ ឈួន ឈីវអ៊ីង
បុរសជាស្វាមីជនជាតិចិនជាច្រើន ចាប់ផ្តើមទទួលយកផ្នត់គំនិតដែលក្លាយឪពុកនៅចាំផ្ទះ និងមើលថែកូនៗ ។ យោងតាមការស្ទង់មតិកាលពីថ្មីៗនេះ។ និន្នាការថ្មីនេះ អាចជាងាកចេញពីទំនៀមទំលាប់បុរាណ ដែលចាត់ទុកស្ត្រីទាំងអស់សុទ្ធតែជាម្តាយចាំផ្ទះ។
ផ្នត់គំនិតដែលលើកឡើងថា មនុស្សប្រុសគឺជាមេគ្រួសារគួរតែជាអ្នករកចំណូល ខណៈការមើលថែកូនៗ គឺជាកាតព្វកិច្ចរបស់ស្ត្រី បានចាក់ឫសយ៉ាងជ្រៅនៅក្នុងវប្បធម៌ចិន។ ប៉ុន្តែការស្ទង់មតិមួយ ដែលបានធ្វើឡើងរួមគ្នាដោយកាសែតរដ្ឋចិន China Youth Daily និងគេហទំព័រ wenjuan.com កាលពីដើមខែនេះ បានរកឃើញថា មានបុរសដល់ទៅ ៥២,៤ភាគរយគាំទ្រគំនិតបុរសក្លាយជាអ្នកចាំផ្ទះពេញម៉ោង ខណៈស្ត្រីមានតែ៤៥,៨ភាគរយប៉ុណ្ណោះ។
តួលេខស្ត្រីទាបជាងបុរសបែបនេះ អាចបញ្ជាក់ថា ស្ត្រីភាគច្រើនមិនសប្បាយចិត្តនឹងទុកការងារផ្ទះឲ្យបុរសធ្វើនោះទេ។ ពួកគេមានអារម្មណ៍មិនស្ងប់ដែលឲ្យមនុស្សប្រុសនៅមើលកូន ព្រោះមនុស្សប្រុសប្រហែសណាស់។ នេះបើតាមការចុះផ្សាយរបស់សារព័ត៌មាន South China Morning Post។
បើទោះបីជាយ៉ាងណាក៏ដោយ ចំនួនស្ត្រីដែលមិនគាំទ្រចំពោះគំនិតនេះនៅតែមានចំនួនច្រើនជាងបុរស។ ប៉ុន្តែ ស្ត្រីដែលមានស្វាមីហ៊ានចោលការងារដើម្បីនៅផ្ទះមើលកូន ក៏បានស្ងើចសរសើរចំពោះការលះបង់របស់ពូកគេផងដែរ។
«ខ្ញុំមិនគិតថាមនុស្សប្រុសដែលនៅចាំផ្ទះគឺបរាជ័យក្នុងឆាកជីវិតនោះទេ ការលះបង់របស់គាត់បានជួយខ្ញុំយ៉ាងច្រើន ហើយខ្ញុំពិតជាថ្លែងអំណរគុណសម្រាប់ការគាំទ្ររបស់គាត់ »។ នេះជាសម្តីរបស់ស្ត្រីម្នាក់ដែលបានសរសេរនៅលើគេហទំព័រ ci123.com ក្នុងប្រទេសចិន។ នាងបានបន្ថែមថា គ្រួសារប្រភេទនោះកាន់តែមានស្ថិរភាព ហើយទំនាក់ទំនងរវាងប្តីប្រពន្ធក៏កាន់តែចុះសម្រុងនឹងគ្នា។
សាស្ត្រាចារ្យសង្គមវិទ្យានៃសាលាវិទ្យាសាស្ត្រសង្គមធានជីង (Tianjin) លោក Zhang Baoyi បានប្រាប់មកសារព័ត៌មាន China Youth Daily ថា យើងត្រូវទទួលស្គាល់ការចូលរួមចំណែកនិងឲ្យតម្លៃដល់មេផ្ទះ។ បុរសកំពុងមានឆន្ទៈចូលរួមក្នុងសកម្មភាពរស់នៅរបស់កូនៗពួកគេឲ្យបានច្រើន ដែលបង្ហាញថា ផ្នត់គំនិតបុរាណរបស់ប្តីប្រពន្ធបច្ចុប្បន្នកំពុងមានការផ្លាស់ប្តូរ។ លោក Zhang បានបន្ថែមទៀតថា ចំនួនឪពុក ម្តាយដែលនៅផ្ទះមើលថែកូនកំពុងកើនឡើងពីព្រោះពូកគេកំពុងយកចិត្តទុកដាក់យ៉ាងខ្លាំងទៅលើការអប់រំរបស់កូនៗពួកគេ៕
© រក្សាសិទ្ធិដោយ thmeythmey.com