អន្តរជាតិ
ជប៉ុនប្រកាសអាសន្ននៅភាគខាងត្បូង ក្រោយកម្រិតទឹកភ្លៀងឡើងខ្ពស់ ការកើនឡើងកម្ពស់ទឹកភ្លៀងនៅកោះ Kyushu ។ រូបថត AFP
×
ដោយ៖ ឈួន ឈីវអ៊ីង
ភ្នាក់ងារឧតុនិយមរបស់ប្រទេសជប៉ុន បានចេញសេចក្តីប្រកាសអាសន្នសម្រាប់ប្រជាជនរស់នៅកោះគ្យូស៊ូ (Kyushu) ដែលជាកោះស្ថិតនៅភាគខាងត្បូងប្រទេស។ កោះមួយនេះត្រូវបានរងគ្រោះដោយទឹកភ្លៀងយ៉ាងធ្ងន់ធ្ងរ កាលពីថ្ងៃពុធ ទី២៨ សីហា បង្កឲ្យមានការបាក់ដី ទឹកជំនន់ និងគ្រោះថ្នាក់ធម្មជាតិផ្សេងៗទៀត។
បើតាមទូរទស្សន៍ជប៉ុន NHK មានបុរសម្នាក់ត្រូវបានបាត់បង់ជីវិតនៅក្នុងខេត្ត សាហ្កា (Saga) ខណៈឡានរបស់គាត់ត្រូវបានហូរទៅតាមទឹក ស្របពេលកន្លែងខ្លះមានកម្រិតភ្លៀងធ្លាក់ ខ្ពស់ជាង ១០០មីលីម៉ែត្រក្នុងត្រឹមមួយម៉ោង។ ប៉ុស្តិ៍ទូរទស្សន៍បានបង្ហាញរូបភាពឡានដែលត្រូវបានទឹកលិច ហើយមានមនុស្សម្នាជាច្រើនដើរលុយទឹកដែលលិចផ្លូវត្រឹមជង្គង់ បន្ទាប់ពីច្រាំងទន្លេជាច្រើនត្រូវបានខូចខាតដោយការបាក់ដី។
ប្រជាជននៃខេត្ត Fukuoka, Nagasaki, និង Saga ប្រហែល ២៤០,០០០នាក់ នៅភាគខាងជើងនៃកោះ គ្យូស៊ូ ត្រូវបានជម្លៀសខ្លួនទៅកាន់ទីទួលសុវត្ថិភាព។ នេះបើតាមការរាយការណ៍របស់ទីភ្នាក់ងារព័ត៌មានក្យូដូ (Kyodo)។
ភ្នាក់ងារធាតុអាកាសបាននិយាយថា ភូមិភាគខាងជើងនៃកោះ គ្យូស៊ូ ធ្លាប់ជួបការរងគ្រោះដោយទឹកភ្លៀងមួយដងប៉ុណ្ណោះ។ ភ្នាក់ងារបានប្រកាសអាសន្នកម្រិតទី៥ ដែលជាកម្រិតខ្ពស់មួយក្នុងរយៈពេលពីរបីទសវត្សរ៍មកហើយ។
អាជ្ញាធរជប៉ុន បានទទូចឲ្យប្រជាជនគិតគូររឿងជម្លៀសខ្លួនឲ្យបានដិតដល់។ ទឹកជំនន់រដូវក្ដៅឆ្នាំមុន ដែលសម្លាប់មនុស្សច្រើនជាង២០០នាក់ ជាមេរៀនសម្រាប់ជប៉ុន ព្រោះប្រជាជនខ្លះមិនសូវយកចិត្តទុកដាក់នឹងការប្រកាសព័ត៌មានរបស់អាជ្ញាធរឡើយ៕
© រក្សាសិទ្ធិដោយ thmeythmey.com