លទ្ធផលបឋមនៃជំរឿនឆ្នាំ ២០១៩ ដែលជាការធ្វើជំរឿនលើកទី៣ តាំងពីឆ្នាំ ១៩៩៨ មក បានផ្តល់នូវក្តីសង្ឃឹមជាច្រើនសម្រាប់ការអភិវឌ្ឍនៅប្រទេសកម្ពុជា។ ជំរឿនលើកនេះបានជួយពង្រឹងគុណភាពទិន្នន័យជំរឿនធ្វើកន្លងៗមក ដែលកម្ពុជាអាចប្រើប្រាស់ ជាជំនួយក្នុងវិស័យអភិវឌ្ឍន៍សេដ្ឋកិច្ច និងសង្គមបានកាន់តែប្រសើរថែមទៀត។ រាជរដ្ឋាភិបាលកម្ពុជា នឹងអាចប្រើប្រាស់ទិន្នន័យបណ្តោះអាសន្ននេះ តាក់តែងគោលនយោបាយ ក្នុងគោលដៅបង្កើនកិច្ចអភិវឌ្ឍន៍ប្រកបដោយសមភាព និងមានលក្ខណៈ ឆ្លើយតបទៅនឹងតម្រូវការជាក់ស្តែង។
ទោះជាការចេញផ្សាយលទ្ធផលបឋម បានបង្ហាញទិន្នន័យប្រជាសាស្ត្រមិនទាន់លំអិតយ៉ាងណាក៏ដោយ យើងក៏អាចប្រើប្រាស់លទ្ធផលនេះ ជាមូលដ្ឋានសម្រាប់ចង្អុលផ្លូវទៅរកការអភិវឌ្ឍនាឆ្នាំបន្តបន្ទាប់បានដែរ ក្នុងពេលដែលយើងកំពុងរង់ចាំលទ្ធផលដែលមានលក្ខណៈវិភាគស៊ីជម្រៅនៅឆ្នាំក្រោយ។
ផ្អែកតាមជំរឿន ២០១៩ ប្រជាជនកម្ពុជាមានចំនួន ១៥,២៨៨,៤៨៩ នាក់ កើនឡើងចំនួន ១,៨៩២,៨០៧ ពីឆ្នាំ ២០០៨។ តួលេខនេះបញ្ជាក់ថា អត្រាកំណើនមាន ១៤.១ ភាគរយ ឬមានន័យថា អត្រាកំណើនប្រចាំឆ្នាំគឺ ១.២ភាគរយ។ អត្រាកំណើននេះមានទំនោរធ្លាក់ចុះជាបន្តបន្ទាប់ ដែលមាន ២.១ ភាគរយក្នុងឆ្នាំ ១៩៩៨ មកនៅ ១.៥ភាគរយ ក្នុងឆ្នាំ ២០០៨។ ការធ្លាក់ចុះនៃអត្រាកំណើនប្រជាជន បណ្តាលមកពីការធ្លាក់ចុះនៃអត្រាលទ្ធភាពបង្កកំណើត និងការធ្វើចំណាកស្រុករបស់ប្រជាជនទៅប្រទេសជិតខាង។
ការធ្លាក់ចុះនៃអត្រាលទ្ធភាពបង្កកំណើត បានបង្ហាញពីសមិទ្ធិផលនៃគោលនយោបាយរបស់ រាជរដ្ឋាភិបាល ដោយគោរពគោលការណ៍សិទ្ធិរបស់បុគ្គល ជាជាងការកំណត់ចំនួនកូន។ គោលនយោយបាយនេះ ផ្អែកលើសិទ្ធិនៃជម្រើសរបស់ស្ត្រី ថាតើគួរមានកូននៅពេលណា និងប៉ុន្មាននាក់ ព្រមទាំងលើកកម្ពស់ការអប់រំរបស់ស្ត្រីដោយផ្តល់នូវសេវាសុខភាពបន្តពូជប្រកបដោយគុណភាព ព្រមទាំងការពន្យារកំណើត និងសិទ្ធិអំណាចរបស់ស្ត្រីក្នុងការសម្រេចចិត្តដោយផ្អែកលើព័ត៌មានត្រឹមត្រូវ និងជាក់លាក់។
កម្ពុជា គឺជាប្រទេសមួយដែលតស៊ូមតិ និងគាំំទ្រសិទ្ធិនៃសុខភាពបន្តពូជ។ យើងអាចមើលឃើញតាមរយៈគោលនយោបាយជាតិនានា ជាពិសេសគោលនយោបាយជាតិប្រជាជនឆ្នាំ ២០១៦ - ២០៣០ ដែលស្របទៅនឹងគោលការណ៍ផែនការសកម្មភាពនៃសន្និសីទអន្តរជាតិស្តីពីប្រជាជន និងការអភិវឌ្ឍឆ្នាំ ១៩៩៤ ទទួលស្គាល់ថា ស្ត្រី និងគូស្រករទាំងអស់ មានសិទ្ធិជ្រើសរើសចំនួនកូន និងគួរមានកូននៅពេលណា។
អត្រាលទ្ធភាពបង្កកំណើតធ្លាក់ចុះ បានបង្ហាញថា ប្រទេសកម្ពុជាកំពុងស្ថិតក្នុងដំណាក់កាលនៃឱកាសទាញយកភាគលាភពីប្រជាសាស្ត្រ ដែលមានន័យថា ចំនួនប្រជាជនសិ្ថតក្នុងវ័យពេញកម្លាំងធ្វើការ មានចំនួនច្រើនជាងប្រជាជនក្នុងបន្ទុក (វ័យក្មេង និងវ័យចំណាស់)។ នេះគឺជាសក្តានុពលដែលកម្ពុជាអាចពន្លឿនវិស័យសេដ្ឋកិច្ចតាមរយៈការវិនិយោគក្នុង ការអប់រំ សុខាភិបាល និងឱកាសសេដ្ឋកិច្ច ជាដើម ពីព្រោះធនធានមានកាន់តែច្រើនឡើងៗ។
នៅពេលលទ្ធភាពបង្កកំណើតមានការធ្លាក់ចុះ គ្រួសារចាប់ផ្តើមមានកូនតិចជាងមុន។ កំណើននៃអត្រាប្រជាជនសកម្មធៀបនឹងប្រជាជនអសកម្ម (វ័យក្មេង និងវ័យចំណាស់) បានផ្តល់ឱកាសឱ្យកម្ពុជាអាចពន្លឿនកំណើនសេដ្ឋកិច្ច និងការអភិវឌ្ឍទូទៅបានប្រសើរ ដោយសារ ប្រជាជនពេញកម្លាំងមានចំនួនច្រើន។ ឯការវិនិយោគលើសុខភាព និងការអប់រំរបស់កូនៗកាន់តែច្រើនឡើងៗ ព្រោះគេគ្មានអ្នកនៅក្នុងបន្ទុកដែលត្រូវចំណាយបន្ថែមទៀត ដូចនេះគេអាចសន្សំថវិកាសម្រាប់ការវិនិយោគនៅថ្ងៃអនាគតបាន។
ប្រទេសមួយ អាចទាញយកអត្ថប្រយោជន៍ពីបំលាស់ប្តូរនៃបម្រែបម្រួល និងភាគលាភប្រជាសាស្ត្របាន លុះត្រាតែប្រទេសនោះបានវិនិយោគលើធនធានមនុស្សជាចាំបាច់។
នៅពេលដែលប្រជាជនវ័យពេញកម្លាំងធ្វើការបានទទួលការអប់រំល្អ មានជំនាញត្រឹមត្រូវ និងមានការងារសមស្រប ពេលនោះភាពលំអៀងក្នុងបញ្ហាយេនឌ័រគ្រប់ទម្រង់ និង វិសមភាពយេនឌ័រ មិនកើតមានក្នុងសង្គមនោះទេ។
ទាំងនេះអាចបង្កើតបរិយាកាសសម្រាប់ការវិនិយោគ រួមទាំង ការវិនិយោគក្នុងស្រុក និងវិនិយោគការបរទេសដោយផ្ទាល់ ក្នុងវិស័យសុខាភិបាល ការអប់រំ ការបង្កើតការងារ អភិបាលកិច្ច និងការផ្តល់អំណាចដល់ស្ត្រី ដើម្បីឈានទៅរកកំណើនសេដ្ឋកិច្ច និងការអភិវឌ្ឍប្រកបដោយស្មើភាព និងសម្រាប់ទាំងអស់គ្នា។
ពេលដែលកម្ពុជាឆ្ពោះទៅសម្រេចគោលដៅពោរពេញដោយមហិច្ឆតារបស់ខ្លួន ដើម្បីក្លាយជាប្រទេសមានចំណូលសេដ្ឋកិច្ចមធ្យមនាឆ្នាំ ២០៣០ ការធ្វើបច្ចុប្បន្នភាពទនិ្នន័យ នឹងអាចផ្តល់ ឱកាសដល់ប្រទេសនេះពង្រឹងគោលនយោបាយដោយផ្អែកលើសិទ្ធិជាមូលដ្ឋាន និងមានលក្ខណៈស៊ីជម្រៅ និងគ្រប់ជ្រុងជ្រោយ ដើម្បីទទួលបាននូវផលប្រយោជន៍នៃការអភិវឌ្ឍប្រកបដោយចីរភាព។
ក្នុងឱកាសខួបលើកទី២៥ នៃផែនការសកម្មភាពសន្និសីទអន្តរជាតិស្តីពីប្រជាជន និងការអភិវឌ្ឍ ការចេញផ្សាយលទ្ធផលបឋមនៃជំរឿនឆ្នាំ ២០១៩ គឺជាពេលវេលាដ៏សមស្រប ដើម្បី ក្រើនរំលឹកអំពីសារៈសំខាន់គោលការណ៍មូលដ្ឋាននៃសិទ្ធិ និងជម្រើស ក្នុងដំណើរការអនុវត្តផែនការសកម្មភាពអភវិឌ្ឍន៍ឆ្ពោះទៅសម្រេចគោលដៅអភិវឌ្ឍប្រកបដោយចីរភាព នាឆ្នាំ ២០៣០ ដែលពិភពលោកបានសន្យាថា នឹងមិនទុកនរណាម្នាក់ចោលឡើយ។
លោកស្រី Rizvina de Alwis គឺជាតំណាងប្រចាំប្រទេសនៃមូលនិធិសហប្រជាជាតិសម្រាប់ប្រជាជន (UNFPA) ដែលជាស្ថាប័នអង្គការសហប្រជាជាតិ មានគោលដៅលើកកម្ពស់សុខភាពបន្តពូជ និងផ្លូវភេទ ដែលកំពុងគៀងគរកិច្ចប្រជុំកំពូលសន្និសីទអន្តរជាតិស្តីពី ប្រជាជន និងការអភិវឌ្ឍនៅទីក្រុងណៃរ៉ូប៊ី នៅខែ វិច្ឆិកា ខាងមុខនេះ ជាមួយនឹងរដ្ឋាភិបាលកេនយ៉ា និងឌែណឺម៉ាក។
ដោយលោកស្រី Rizvina de Alwis តំណាងប្រចាំប្រទេសនៃមូលនិធិសហប្រជាជាតិសម្រាប់ប្រជាជន UNFPA នៅកម្ពុជា