អន្តរជាតិ
មហាធៀ៖ ប្រជាជនម៉ាឡេស៊ី មិនត្រូវការបង្កើនអាយុចូលនិវត្តន៍ឡើយ សម្តេចហ៊ុន សែន និង នាយករដ្ឋមន្រ្តីមហាធៀ មហាម៉ាត់ នៅក្នុងវិមានសន្តិភាព, ប្រភពXinhua
× នាយករដ្ឋមន្ត្រីមហាធៀ មហាម៉ាត់កាលថ្ងៃទី០៣ ខែកញ្ញា បានច្រានចោលលើសំណើររបស់រដ្ឋមន្ត្រីធនធានមនុស្សរឿងបង្កើនអាយុចូលនិវត្តន៍របស់ប្រជាជនម៉ាឡេស៊ី។ លើសពីនេះ លោកគូរបញ្ជាក់ថា មនុស្សចាស់ធ្វើការមិនសូវមានប្រសិទ្ធភាពឡើយ ហើយប្រឈមនឹងជំងឺច្រើន ប៉ុន្តែយុវជនមានទាំងកម្លាំង និងជំនាញ។
មនុស្សជាច្រើននៅក្នុងវ័យ៦០ គឺធ្វើការមិនសូវមានប្រសិទ្ធភាពឡើយ ហើយក្នុងវ័យនេះ ប្រជាជនប្រហែលជាកំពុងប្រឈមនឹងបញ្ហាសុខភាពទៀតផង។ នេះជាសម្តីរបស់លោក មហាធៀ បានលើកឡើងពីទីក្រុងភ្នំពេញ បន្ទាប់ពីរដ្ឋមន្ត្រីធនធានមនុស្សស្នើរសុំបង្កើនអាយុចូលនិវត្តន៍របស់ប្រជាជន។
នាយករដ្ឋមន្ត្រីម៉ាឡេស៊ីវ័យ៩៤ឆ្នាំរូបនេះ បានអះអាងថា៖« ខ្ញុំគិតថាចូលនិវត្តន៍នៅអាយុ ៦០ឆ្នាំ គឺគ្រប់គ្រាន់ហើយ។ កុំប្រៀបធៀបពួកគេជាមួយខ្ញុំ ខ្ញុំបានចូលនិវត្តន៍រួចហើយ តែត្រូវបានគេហៅឲ្យមកធ្វើការវិញ»។ លោកបានសង្ងត់ធ្ងន់ទៀតថា កាលលោកជានាយករដ្ឋមន្ត្រី រដ្ឋាភិបាលបានបង្កើនអាយុប្រជាជនពី៥៥ឆ្នាំ ទៅ ៥៦ឆ្នាំ។ តែបន្ទាប់ពីគាត់ចាកចេញពីតំណែងមួយនេះ រដ្ឋាភិបាលជំនាន់ក្រោយបានបង្កើនអាយុចូលនិវត្តន៍ដល់៦០ឆ្នាំ។
យ៉ាងណាមិញ លោកមហាធៀ ក៏គាំទ្រនឹងការលើកឡើងរបស់រដ្ឋមន្ត្រីវ័យក្មេងម៉ាឡេស៊ី លោក Syed Saddiq Syed Abdul Rahman ថាការបង្កើនអាយុចូលនិវត្តន៍ គឺប្រៀបដូចជា ដាក់របាំងការពារមិនឲ្យយុវជនកាន់តំណែងណាមួយដែរ។ ជាការយល់ស្របនឹងមតិរបស់រដ្ឋមន្ត្រីវ័យ 26ឆ្នាំ លោកមហាធៀការពារថា បើរដ្ឋាភិបាលកំណត់ថាចូលនិវត្តន៍នៅអាយុ ៦៥ឆ្នាំ វានឹងបង្កការលំបាកដល់យុវជនដែលមានជំនាញត្រឹមត្រូវក្នុងការកាន់មុខងារណាមួយ។
ខណៈពេលលោកប្រមុខរដ្ឋាភិបាលម៉ាឡេស៊ីច្រានចោលលើសំណើរបង្កើនអាយុចូលនិវត្តន៍របស់លោករដ្ឋមន្ត្រីធនធានមនុស្ស គូឡាស៊ីហ្គារ៉ាន់(M Kulasegaran) លោកមហាម៉ាត់ក៏ឆ្លៀតបញ្ជេញយោបល់ឲ្យសហគ្រិនម៉ាឡេស៊ីហ៊ានចេញរកស៊ីទៅក្រៅប្រទេស ជាពិសេសនៅក្នុងអាស៊ាន ព្រោះរដ្ឋាភិបាលបានជួយសម្របសម្រួលជំនួញរបស់ពួកគេរួចហើយ។ បានសេចក្តីថាការពង្រីកជំនួញនៅក្រៅប្រទេស ក៏ប្រៀបដូចជាការពង្រឹងសេដ្ឋកិច្ចនៅក្នុងស្រុកដែរ។
ជាការពិត កាលពីថ្ងៃទី០១ ខែកញ្ញា សភាសហព័ន្ធពាណិជ្ជកម្មម៉ាឡេស៊ី និងលោករដ្ឋមន្ត្រីធនធានមនុស្ស បានជំរុញឲ្យរដ្ឋាភិបាលបង្កើនអាយុចូលនិវត្តន៍របស់ប្រជាជន និងការចំណាយនៃថ្លៃរស់នៅ ៥០០ រីងហ្គីត ឬច្រើនជាងនេះ តែត្រូវរដ្ឋមន្ត្រីយុវជន និងកីឡាបដិសេធ ហើយឲ្យរដ្ឋាភិបាលគិតគូរពីឪកាសការងារសម្រាប់យុវជនម៉ាឡេស៊ីល្អជាង។
សូមបញ្ជាក់ថា លោកមហាធៀ មហាម៉ាត់ បានធ្វើទស្សនៈកិច្ចមកកម្ពុជារយៈពេល ៣ថ្ងៃ មុនពេលគាត់ចូលរួមវេទិការសេដ្ឋកិច្ចអាស៊ីខាងកើត នៅទីក្រុង វ្លាឌីវ៉ូស្តុក (Vladivostok) ប្រទេសរុស្ស៊ី។ ក្នុងដំណើរទស្សនៈកិច្ចលើកនេះ លោកនាយករដ្ឋមន្ត្រី ក៏បានលើកឡើងពីជំនួញរបស់ម៉ាឡេស៊ីនៅក្នុងប្រទេសកម្ពុជាផងដែរ ហើយសរសើរថាកម្ពុជា គឺជាប្រទេសមានសក្តានុពលសម្រាប់សហគ្រិនម៉ាឡេស៊ី និងការវិនិយោគ៕
© រក្សាសិទ្ធិដោយ thmeythmey.com