អន្តរជាតិ
លោកស្រីការី ឡាំបោះបង់សុន្ទរកថានៅសភា ក្រោយរងការរំខានពីសមាជិកបក្សប្រឆាំង
× មេដឹកនាំហុងកុង លោកស្រី ការី ឡាំ បានសម្រេចលុបចោលការថ្លែងសុន្ទរកថាស្តីពីគោលនយោបាយប្រចាំឆ្នាំ នៅថ្ងៃពុធ ទី១៦ ខែតុលា ក្រោយពីលោកស្រីត្រូវបានរំខានដោយតំណាងរាស្ត្របក្សប្រឆាំង។ ទន្ទឹមនឹងការរំខានរហូតដល់បោះបង់ចោលបែបនេះ ក្រុមសមាជិកសភាគាំទ្រប្រជាធិបតេយ្យទាំងនេះ ថែមទាំងបានប្រាប់ឲ្យលោកស្រី ឡាំ គោរពតាមការទាមទារដែលនៅសេសសល់របស់ក្រុមអ្នកតវ៉ាហុងកុង និងលាលែងតំណែងកំពូលនេះ។
ការថ្លែងសុន្ទរកថានេះ ត្រូវបានមើលឃើញថា គឺជាឱកាសសំខាន់មួយសម្រាប់លោកស្រី ឡាំ ស្អំចិត្តប្រជាជនហុងកុង។ នោះគឺការបញ្ចេញគោលនយោបាយដើម្បីដោះស្រាយកត្តាខ្លះដែលជាដើមចមនៃភាពវឹកវរ ដែលគ្របដណ្តប់ក្រុងហុងកុងអស់៤ខែមកនេះ។ បញ្ហាទាំងនោះ មានដូចជា វិសមភាពសង្គម និងវិបត្តិផ្ទះសំបែង ជាដើម។ ក៏ប៉ុន្តែមេដឹកនាំហុងកុងរូបនេះ ត្រូវបានបង្ខំឲ្យបោះបង់សុន្ទរកថានេះចោល ក្រោយពីរងការរំខានជាច្រើនដងពីសំណាក់តំណាងរាស្ត្របក្សប្រឆាំង។
«ការទាមទារប្រាំយ៉ាង, មិនមែនតែមួយឡើយ»។ សមាជិកសភាបក្សប្រឆាំង ស្រែកបែបនេះ ខណៈអ្នកខ្លះពាក្យរបាំងមុខរូបលោកប្រធានាធិបតីចិន ស៊ី ជិនភីង ហើយខ្លះ បញ្ចាំងពាក្យស្លោករបស់ក្រុមអ្នកតវ៉ានៅលើជញ្ជាំងនៃអគារសភាហុងកុង ក្រោយខ្នងលោកស្រី ឡាំ ។
តាមការចុះផ្សាយរបស់ទីភ្នាក់ងារព័ត៌មាន សមាជិកសភាបក្សប្រឆាំងម្នាក់ឈ្មោះថា Tanya Chan និយាយថា លោកស្រី ឡាំ គឺជាមនុស្សដែលត្រូវស្តីបន្ទាសចំពោះបញ្ហាដែលកំពុងកើតឡើងក្នុងទីក្រុងហុងកុង។ តំណាងរាស្ត្ររូបនេះ និយាយបែបនេះ៖«ដៃលោកស្រីទាំងពីរ ប្រឡាក់ជោកជាំដោយឈាម។ យើងសង្ឃឹមថាលោកស្រី ការី ឡាំ ដក[សំណើច្បាប់បត្យាប័ន] និងចុះចេញពីតំណែង […] លោកស្រីមិនសាកសមនឹងធ្វើជាប្រធានប្រតិបត្តិឡើយ»។
ក្រោយបរាជ័យថ្លែងសុន្ទរកថាដ៏សំខាន់នេះ លោកស្រី បានបញ្ចេញវីដេអូថតទុកជាមុន ជំនួសវិញលើវេបសាយក្រុមប្រឹក្សានីតិបញ្ញត្តិហុងកុង។ នេះជាលើកទីមួយដែលមេដឹកនាំហុងកុង មិនអាចថ្លែងសុន្ទរកថាប្រចាំឆ្នាំនេះដោយផ្ទាល់បាន គិតចាប់ពីប្រពៃណីនេះបានចាប់ផ្តើមក្នុងឆ្នាំ១៩៤៨មក។
ក្នុងវីដេអូនេះ លោកស្រី ការី ឡាំ បានប្រកាសគម្រោងបង្កើនការផ្គត់ផ្គង់ដីនិងផ្ទះសំបែងក្នុងក្រុងហុងកុងដែលជាទីផ្សារអចលនទ្រព្យមានតម្លៃថ្លៃកប់ពពកមួយលើពិភពលោក។ ត្រង់នេះ លោកស្រី និយាយថា បញ្ហាផ្ទះសំបែងគឺជារឿងបន្ទាន់បំផុតមួយដែលទីក្រុងនេះជួបប្រទះ។ ទន្ទឹមនេះ លោកស្រី សង្កត់ធ្ងន់ថា លោកស្រីជឿជាក់យ៉ាងមុតមាំថា ហុងកុង នឹងអាចធ្វើដំណើរផុតព្យុះភ្លៀងនិងឆ្ពោះទៅមុខ។
សូមបញ្ជាក់ថា ការដាក់ចេញគោលនយោបាយដោះស្រាយបញ្ហានៅហុងកុង ធ្វើឡើងក្រោយពីនៅថ្ងៃអង្គារ ទី១៥ ខែតុលា រដ្ឋសភាអាមេរិក បានអនុម័តសំណើច្បាប់ប្រជាធិបតេយ្យ និងសិទ្ធិមនុស្សហុងកុងឆ្នាំ២០១៩។ ប្រសិនបើចូលជាធរមានមែននោះ ច្បាប់គាំទ្រប្រជាធិបតេយ្យហុងកុងនេះ នឹងតម្រូវឲ្យរដ្ឋាភិបាលអាមេរិកវាយតម្លៃជាប្រចាំឆ្នាំលើការអភិវឌ្ឍនយោបាយក្នុងទីក្រុងនេះ។ នោះគឺមើលថា ហុងកុង នៅតែអាចរក្សាលក្ខខណ្ឌស្វ័យភាពគ្រប់គ្រាន់ ដាច់ដោយឡែកពីចិនដីគោក ក្នុងគោលដៅរក្សាការផ្តល់ឲ្យពិសេសពីសហរដ្ឋអាមេរិក។ ទន្ទឹមនេះ សំណើច្បាប់នេះ ក៏នឹងបើកផ្លូវឲ្យរដ្ឋបាលលោកត្រាំដាក់ទណ្ឌកម្មលើមន្ត្រីចិនដែលទទួលខុសត្រូវចំពោះការបំផ្លិចបំផ្លាញសិទ្ធិមនុស្ស និងស្វ័យភាពរបស់ទីក្រុងហុងកុង។
ក្រៅពីសំណើច្បាប់នេះ រដ្ឋសភាអាមេរិក នៅថ្ងៃអង្គារដដែល ក៏បានអនុម័តវិធានការពាក់ព័ន្ធបញ្ហាហុងកុងពីរផ្សេងទៀត រួមមាន សេចក្តីសម្រេចគាំទ្រក្រុមបាតុករហុងកុង និងសំណើច្បាប់ការពារហុងកុង។ សម្រាប់សេចក្ដីស្នើច្បាប់នេះ អាមេរិកនឹងហាមឃាត់ការនាំចេញសម្ភាៈយោធានានា ដែលប៉ូលិសហុងកុងអាចប្រើប្រឆាំងនឹងក្រុមអ្នកតវ៉ា៕
Tag:
ហុងកុង
សភា
សុន្ទរកថា
គោលនយោបាយ
© រក្សាសិទ្ធិដោយ thmeythmey.com