កីឡាជាតិ
ជាតិ
ហុងដា នឹងលេងឱ្យក្លិប Vitesse នៃប្រទេសហូឡង់ រូបពីហ្វេសប៊ុកកីឡាករ ហុងដា នៅគ្រាដែលលេងឱ្យក្លិប Melbourne Victory នៃប្រទេសអូស្ត្រាលី
× ភ្នំពេញ៖ អ្នកចាត់ការទូទៅក្រុមជម្រើសជាតិកម្ពុជា លោក ហុងដា( Keisuke Honda) បានចូលរួមជាមួយក្លិបVitesse Arnhem នៃក្របខណ្ឌកីឡាបាល់ទាត់កំពូលហូឡង់ Eredivise ។ ហុងដា នឹងត្រូវលេងឱ្យក្លិបមួយនេះ រហូតដល់ផុតរដូវកាល ២០១៩-២០២០។ នេះបើតាមការចុះផ្សាយរបស់ Channel News Asia។
Channel News Asia បានស្រង់សម្តីពីភាគីក្លិបVitesse Arnhem ថា នៅពេលនេះ ហុងដា កំពុងរង់ចាំលិខិតអនុញាតការងារសិន ប៉ុន្តែរូបគេក៏អាចចូលរួមជាមួយក្រុមបានដែរ បន្ទាប់ពីសម្រាកការប្រកួតអន្តរជាតិ ដែល ហុងដា ត្រូវដឹកនាំកម្ពុជា ជួបជាមួយហុងកុង នៅជើងទី២ នៃការប្រកួតវគ្គជម្រុះ FIFA World Cup 2022 នាថ្ងៃទី១៩ វិច្ឆិកា។ ក្លិប Vitesse Arnhem ដែលកំពុងឈរនៅលេខរៀងទី៥ មាន២៣ពិន្ទុក្នុងដៃ ក្រោយការប្រកួត១២លើកនោះ ក៏មិនបានបញ្ជាក់ពីតម្លៃខ្លួន ឬលក្ខខណ្ឌនៃការចូលរួមរបស់ ហុងដា ឡើយ។
តាមពិតទៅអតីតកីឡាករជម្រើសជាតិជប៉ុនរូបនេះ ធ្លាប់លេងឱ្យក្លិប VVV-Venlo នៃក្របខណ្ឌកំពូលហូឡង់នេះ មួយរដូវកាលដែរ កាលពីឆ្នាំ២០០៨-២០០៩។ តាមរយៈសេចក្តីថ្លែងការណ៍របស់ក្លិប Vitesse Arnhem ដែលបានស្រង់សម្តី ហុងដា យ៉ាងដូច្នេះថា៖«ខ្ញុំធ្លាប់លេងនៅក្នុងក្របខណ្ឌហូឡង់នេះ ដូច្នេះខ្ញុំសង្ឃឹមថា អ្នកគាំទ្រនៅក្របខណ្ឌហូឡង់ទាំងអស់ នឹងនៅតែចងចាំខ្ញុំ។ ហើយម្យ៉ាងទៀត ខ្ញុំនឹងធ្វើអ្វីគ្រប់យ៉ាង ដើម្បីទទួលបានការចាប់អារម្មណ៍ នៅក្នុងការតារាងប្រកួត»។
ក្រោយចាកចេញពីក្លិប Melbourne Victory នៃប្រទេសអូស្ត្រាលី កាលពីខែ មិថុនាកន្លងមក អ្នកចាត់ការទូទៅក្រុមជម្រើសជាតិកម្ពុជា វ័យ៣៣ឆ្នាំរូបនេះ ក៏ធ្លាប់បានបង្ហាញបំណងចង់លេងឱ្យក្លិបយក្សនៅអ៊ីតាលី គឺ AC Milan និងក្លិប Manchester United នៅក្របខណ្ឌអង់គ្លេស តាមរយៈបណ្ដាញសង្គម Twitter របស់ខ្លួនដែរ។ ប៉ុន្តែមិនការឆ្លើយតបពីក្លិបទាំងពីរនេះឡើយ។
ហុងដា ធ្លាប់រកបាន៣៧គ្រាប់ ក្នុងការបង្ហាញខ្លួន ៩៨លើក ឱ្យក្រុមជម្រើសជាតិជប៉ុន មុននឹងចូលនិវត្តក្រោយការប្រកួតបាល់ទាត់ពិភពលោក World Cup ២០១៨។ បច្ចុប្បន្ន ហុងដា បានដឹកនាំក្រុមជម្រើសជាតិកម្ពុជា ក្នុងនាមជាអ្នកចាត់ការទូទៅជាង១ឆ្នាំហើយ ចាប់តាំងពីខែសីហា ឆ្នាំ២០១៨មក៕
Tag:
ហុងដា
បាលទាត់
កីឡា
© រក្សាសិទ្ធិដោយ thmeythmey.com