ដៃគូអភិវឌ្ឍន៍ជួយ១០លានដុល្លារ បញ្ឈប់ការបន្ទោបង់ពាសវាលពាសកាល ក្នុង១៦០០ភូមិ

ជាតិ

ដៃគូអភិវឌ្ឍន៍ជួយ១០លានដុល្លារ បញ្ឈប់ការបន្ទោបង់ពាសវាលពាសកាល ក្នុង១៦០០ភូមិ

24, Nov 2019 , 9:19 pm

រូបភាព

អ្នកស្រី ជិន ស៊ុនលី និងលោក ជ័យ វណ្ណា ម្ចាស់អាជីវកម្មផលិតកម្មបេតុងខ្នាតមធ្យម នៅខេត្តស្វាយរៀង។ រូបថតដោយលោក ធីលឡឺកូហ្សូល នៃiDE

ដោយ: ថ្មីៗ

ភ្នំពេញ៖ គម្រោងចំណងអភិវឌ្ឍន៍ផលប៉ះពាល់អនាម័យ ដែលមានទឹកប្រាក់១០លានដុល្លារ បានបើកដំណើរការ នៅកម្ពុជា ក្រោមការគាំទ្រមូលនិធិពីអង្គការអាយឌីអ៊ីកម្ពុជា(IDE), Stone Family និងទីភ្នាក់ងារអាមេរិក USAID។ គម្រោងនេះ មានគោលដៅ បញ្ឈប់ការបន្ទោបង់ពាសវាលពាសកាល ក្នុងភូមិចំនួន ១៦០០ ក្នុងខេត្តចំនួន៦របស់កម្ពុជា រួមមានខេត្តស្វាយរៀង,កណ្ដាល,ព្រៃវែង,កំពង់ធំ,សៀមរាប និងខេត្តឧត្ដរមានជ័យ នៅក្នុងឆ្នាំ ២០២៥។

គម្រោងចំណងអភិឌ្ឍន៍ផលប៉ះពាល់អនាម័យ (IDB) ដំបូងគេបង្អស់ក្នុងពិភពលោក ត្រូវបានដាក់ឲ្យដំណើរការនៅក្នុងប្រទេសកម្ពុជា។ តាមប្រកាសព័ត៌មានរួមរបស់គម្រោង IDE , Stone Family និង USAID គម្រោងនេះ មានទឹកប្រាក់ ១០លានដុល្លារ មានគោលដៅប្រែក្លាយភូមិចំនួន ១,៦០០ ក្នុងខេត្តស្វាយរៀង,កណ្ដាល,ព្រៃវែង,កំពង់ធំ,សៀមរាប និងខេត្តឧត្ដរមានជ័យ ឲ្យបញ្ឈប់ការបន្ទោបង់ពាសវាសពាសកាល សុវត្ថិភាពអនាម័យ និងលើកកម្ពស់សុខុមាលភាពសហគមន៍ជនបទ ជាពិសេសសម្រាប់កុមារ។

ក្នុងសេចក្តីប្រកាសព័ត៌មានដដែល លោក ផល ហ្កាន់ស្តិនសិន (Paul Gunstensen) នាយកគម្រោងអភិវឌ្ឍន៍ទឹកស្អាត និងអនាម័យជនបទ (WASH) បានចាត់ទុកគំនិតផ្តួចផ្តើមនេះ ថាជាជំហានដ៏ខ្ពស់ក្នុងភាពជាដៃគូរយៈពេល៦ឆ្នាំ ដើម្បីគាំទ្រកម្មវិធីទីផ្សារអនាម័យ របស់អង្គការអាយឌីអ៊ីកម្ពុជា ឲ្យបានទទួលជោគជ័យ។ ហើយលោក Paul សង្ឃឹមថា វានឹងធ្វើជាគំរូមួយស្តីពីហិរញ្ញវត្ថុរយៈពេលយូរ និងជាការគាំទ្រ ដើម្បីដោះស្រាយបញ្ហាប្រឈមដ៏សំខាន់ នៃអនាម័យសកល។ បើតាមនាយកគម្រោងអភិវឌ្ឍន៍ទឹកស្អាត និងអនាម័យជនបទ (WASH) ដដែល គម្រោង DIB ជាចលករផ្លាស់ប្ដូរមួយ ពីអ្នកផ្ដល់ជំនួញទៅជាអ្នកវិនិយោគ ដែលអាចធ្វើឲ្យមានប្រសិទ្ធភាពខ្ពស់ដល់សង្គម និងផលចំណេញផ្នែកហិរញ្ញវត្ថុ។

លោកស្រី លីស អែលលីស (Llzz Ellls) ប្រធាននាយកប្រតិបត្តិអង្គការ IDE ក៏បានលើកឡើងក្នុងសេចក្តីប្រកាសព័ត៌មានដដែលថា ការផ្ដោតលើលទ្ធផលការងារ នៃចំណងអភិវឌ្ឍន៍លើកផលប៉ះពាល់ បានផ្ដល់នូវភាពបត់បែនក្នុងការវិវឌ្ឍននៃប្រព័ន្ធបរិស្ថានឥតឈប់ឈរ។ លោកស្រី Llzz Ellls បន្ត៖«ភាពបត់បែននេះ មានសារសំខាន់ណាស់ សម្រាប់អង្គការ IDE សាកល្បងយុទ្ធសាស្ត្រថ្មីនេះ សម្រាប់បង្កើនសមត្ថភាពរបស់យើង ក្នុងការឈានទៅជួយគ្រួសារក្រីក្រជាងគេ និងការធ្វើឲ្យប្រសើរឡើង នូវអនាម័យ ដើម្បីធានាមនុស្សទាំងអស់ ទទួលបានអត្ថប្រយោជន៍ ឆ្ពោះទៅសម្រេចអនាម័យល្អទាំងស្រុង»។

សម្រាប់ លោកស្រី វីណា រ៉េដឌី (Veena Reddy) នាយកបេសកកម្មរបស់ USAID បានចាត់ទុក គម្រោង DIBនេះ ថាជាគំរូនៃភាពជាអ្នកដឹកនាំ រវាងកិច្ចសហប្រតិបត្តិការជាដៃគូ និងការផ្ដល់ហិរញ្ញប្បទាន ប្រកបដោយភាពច្នៃប្រឌិតជាសកល ដើម្បីទទួល បានលទ្ធផលនៃការអភិវឌ្ឍន៍ល្អបំផុត។

DIB មានគោលបំណងបង្កើតដំណោះស្រាយលើទីផ្សារអនាម័យ និងរួមចំណែកបង្កើនអត្រាគ្របដណ្តប់អនាមួយសកល ក្នុងបណ្តាខេត្តទាំង៦ ជួយកាត់បន្ថយជំងឺក្រិនកុមារ និងការការពារការរាលដាលជំងឺឆ្លង និងការចម្លងតាមទឹក។ ការងារទាំងនេះ គឺជួយគាំទ្រដល់គោលដៅរបស់រាជរដ្ឋាភិបាលកម្ពុជា ក្នុងការបញ្ឈប់ការបន្ទោបង់ពាលវាលពាសកាល នាឆ្នាំ២០២៥ ស្របតាមគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០៕