ភ្នំពេញ ថ្ងៃទី២៥ ខែវិច្ឆិកា ឆ្នាំ២០១៩៖ មន្ត្រីជំនាញកំពូលៗក្នុងសេវាហិរញ្ញវត្ថុ មកពីទូទាំងប្រទេសក្នុងសហគមន៍អាស៊ាន នឹងមកជួបជុំគ្នានៅរាជធានីភ្នំពេញ ដើម្បីចូលរួមក្នុងសន្និសីទប្រចាំតំបន់ដ៏សំខាន់មួយ ដែលផ្តោតទៅលើកំណែទម្រង់ប្រព័ន្ធឌីជីថលក្នុងវិស័យធនាគារ និងសេវាហិរញ្ញវត្ថុ នៅតំបន់អាស៊ីអាគ្នេយ៍។
សន្និសីទធនាគារអាស៊ានលើកទី២២ នឹងប្រព្រឹត្តទៅក្រោមទស្សនទាន «ការផ្សារភ្ជាប់អាស៊ានឆ្នាំ២០២៥ ពិភពលោកដ៏ក្លៀវក្លាថ្មីមួយនៃនវានុវត្តភាព ប្រព័ន្ធឌីជីថលសម្រាប់វិស័យធនាគារអាស៊ានតែមួយ (ASEAN Connectivity 2025 - a brave new world of digital innovation for one ASEAN banking sector)» ដោយមានការសហការរៀបចំឡើង ដោយសមាគមធនាគារកម្ពុជា (ABC) និងសមាគមធនាគារិកអាស៊ាន (ABA)។
គណៈអធិបតីជាន់ខ្ពស់នៅក្នុងសន្និសីទដ៏សំខាន់មួយនេះ រួមមាន លោក ជា ចាន់តូ អគ្គទេសាភិបាលធនាគារជាតិនៃកម្ពុជា និងលោក Dato Lim Kok Hoi អគ្គរដ្ឋលេខាធិការសហគមន៍អាស៊ាន។
លោក ជា ចាន់តូ អគ្គទេសាភិបាលធនាគារជាតិនៃកម្ពុជា បានសរសេរសារស្វាគមន៍ដល់ប្រតិភូក្នុងសន្និសីទនេះថា៖«ខ្ញុំពិតជាមានមោទនភាពណាស់ ដែលបានឃើញដំណើរវិវឌ្ឍ ដ៏គួរឲ្យកត់សម្គាល់ ក្នុងវិស័យធនាគារនៅព្រះរាជាណាចក្រកម្ពុជា ក៏ដូចជាក្នុងតំបន់ស៊ាន ជាពិសេស ក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីវិបត្តិហិរញ្ញវត្ថុសកល។ ការធ្វើទំនើបកម្មលើហេដ្ឋារចនាសម្ព័ន្ធហិរញ្ញវត្ថុ និងបច្ចេកវិទ្យាហិរញ្ញវត្ថុថ្មីៗ បានជួយបង្កើនប្រសិទ្ធភាព ក្នុងការផ្តល់សេវាហិរញ្ញវត្ថុ ទៅកាន់ប្រជាពលរដ្ឋអាស៊ានច្រើនជាង៦០០លាននាក់ ប្រកបដោយសុវត្ថិភាព និងបរិយាបន្ន»។
លោក អ៊ិន ចាន់នី ប្រធានសមាគមធនាគារកម្ពុជា បានមានប្រសាសន៍ក្នុងពេលបើកសន្និសីទនេះថា កិច្ចសហប្រតិបត្តិការក្នុងតំបន់អាស៊ាន មានន័យថារាល់ភាគីពាក់ព័ន្ធទាំងអស់ អាចសិក្សារៀនសូត្រពីគ្នាទៅវិញទៅមក អនុវត្តតាមគ្នាទៅវិញទៅមក និងប្រកួតប្រជែងដោយស្មើភាពគ្នា ដើម្បីជួយជំរុញដល់ការអភិវឌ្ឍសេដ្ឋកិច្ច និងសង្គម។ លោក អ៊ិន ចាន់នី បន្តឡើងឡើងដូច្នេះថា៖«យើងមិនត្រឹមតែបានឃើញ ពីការរីកចម្រើនរបស់ក្រុមហ៊ុនធំៗក្នុងតំបន់ ដូចជាGrab នៅសិង្ហបុរី ឬក៏ក្រុមហ៊ុនGo Jek នៅឥណ្ឌូណេស៊ី ដែលកំពុងតែឈានមុខគេ ក្នុងវិស័យនេះ ក្នុងការធ្វើឲ្យបច្ចេកវិទ្យាថ្មីៗ មានភាពងាយស្រួលប៉ុណ្ណោះទេ យើងបានសិក្សារៀនសូត្រពីក្រុមហ៊ុនទាំងនោះ ហើយយើងកំពុងតែអភិវឌ្ឍក្រុមអ្នកច្នៃប្រឌិតផ្ទាល់ខ្លួនរបស់យើង ដូចជាក្រុមហ៊ុន PassApp ឬ Joonaak ដែលកំពុងតែនាំយកចំណេះដឹង ក្នុងតំបន់របស់ពួកគេនៅទីនេះ ដើម្បីផ្តល់អត្ថប្រយោជន៍ដល់ប្រជាពលដ្ឋរបស់យើង»។
លោក អ៊ិន ចាន់នី បានបន្តថា៖«យើងបានទទួលស្វាគមន៍ក្រុមហ៊ុន Grab និងក្រុមហ៊ុនជាច្រើនផ្សេងទៀត ដើម្បីប្រតិបត្តិនៅទីនេះ ប៉ុន្តែយើងមានមោទនភាពណាស់ ដែលយើងមានទេពកោសល្យ និងមហិច្ឆតា ក្នុងការបង្កើត និងបង្កើនការប្រកួតប្រជែងក្នុងស្រុក ជាមួយនឹងក្រុមហ៊ុនធំៗ ប្រចាំតំបន់ទាំងនេះ»។
ប្រតិភូជាន់ខ្ពស់ជាច្រើនផ្សេងទៀត ត្រូវបានរំពឹងទុកថា នឹងផ្តល់អនុសាសន៍របស់ខ្លួន លើប្រធានបទដូចគ្នានេះ អំឡុងពេលកិច្ចពិភាក្សាជាក្រុម ទៅលើប្រព័ន្ធឌីជីថល និងបច្ចេកវិទ្យាហិរញ្ញវត្ថុ (Fintech) សន្តិសុខលើការលួចចម្លងទិន្នន័យ (cybersecurity) និងបញ្ជីកំណត់ត្រាប្លុក (Blockchain) និងកំណែទម្រង់ប្រព័ន្ធឌីជីថលក្នុងវិស័យធនាគារ និងសេវាហិរញ្ញវត្ថុ។ ប្រតិភូចំនួន ៥០០នាក់ ត្រូវបានរំពឹងទុកថា នឹងចូលរួមក្នុងសន្និសីទរយៈពេល១ថ្ងៃពេញនេះ នៅឯសណ្ឋាគារសុខា ស្ថិតនៅរាជធានីភ្នំពេញ រួមជាមួយនឹងមន្ត្រីតំណាងជាច្រើន មកពីប្រទេសទាំង១០ ក្នុងតំបន់អាស៊ាន និងភ្ញៀវកិត្តិយសជាច្រើនផ្សេងទៀតទូទាំងតំបន់។
ថ្ងៃទី២ នៃសន្និសីទដ៏សំខាន់នេះ ដែលត្រូវបានគាំទ្រដោយម្ចាស់ឧបត្ថមជាច្រើន ក្នុងនោះរាប់បញ្ចូលទាំង ធនាគារ អេស៊ីលីដា ក្នុងនាមជាដៃគូយុទ្ធសាស្ត្រ និងធនាគារ ស៊ីអាយអិមប៊ី (CIMB) ធនាគារកាណាឌីយ៉ា និងធនាគារភ្នំពេញ ពាណិជ្ជ ក្នុងនាមជាដៃគូចម្បង គឺជាកិច្ចប្រជុំក្រុមប្រឹក្សាធនាគារអាស៊ានលើកទី៤៩ ហើយនិងត្រូវរៀបចំឡើងសម្រាប់សមាជិករបស់សមាគមធនាគារិកអាស៊ាន ប៉ុណ្ណោះ។
សន្និសីទនេះ បានចាប់ផ្តើមជាមួយនឹងការស្វាគមន៍ដោយការរៀបចំពិធីជប់លៀងសំណេះសំណាលគ្នាមួយ កាលពីថ្ងៃអាទិត្យ ហើយក៏នឹងមានការប្រកួតកីឡាវាយកូនគោល និងដំណើរ ទស្សនកិច្ចក្នុងទីក្រុង ក្នុងនោះរាប់បញ្ចូលទាំងដំណើរទស្សនកិច្ច ទៅកាន់មជ្ឈមណ្ឌលបណ្តុះបណ្តាលជំនាញវិជ្ជាជីវៈតម្បាញសូត្រ ក្នុងខេត្តតាកែវ សម្រាប់ប្រតិភូ និងដៃគូផងដែរ ដើម្បីណែនាំឲ្យពួកគេស្គាល់ពីភាពទំនើប និងភាពរស់រវើកនៃរាជធានីភ្នំពេញ និងកម្ពុជាទាំងមូល។
នេះគឺជាលើកទី១ ដែលកម្ពុជាធ្វើជាម្ចាស់ផ្ទះរៀបចំសន្និសីទធនាគារអាស៊ាន ដែលសន្និសីទនេះ តម្រូវឲ្យរាល់ប្រទេសជាសមាជិកសហគមន៍អាស៊ាន ប្តូរវេនគ្នាធ្វើជាម្ចាស់ផ្ទះ រៀងរាល់ ២ឆ្នាំម្តង៕
(អត្ថបទពាណិជ្ជកម្ម)