ជាតិ
ថ្ងៃឆ្លងឆ្នាំសកល កម្ពុជាមានភ្ញៀវទេសចរជិត១,៤លាននាក់ ដើរលេងកម្សាន្ដទូទាំងប្រទេស ភ្ញៀវទេសចរច្រើនកុះករ កំពុងឈររាប់ថយក្រោយ នៅរាត្រីថ្ងៃទី៣១ធ្នូ ២០១៩ ឈានចូលថ្ងៃទី១មករា ឆ្នាំ២០២០ នៅលើដងផ្លូវមួយកន្លែង ក្នុងខេត្តសៀមរាប។ រូបថត៖ រដ្ឋបាលខេត្តសៀមរាប។
× ភ្នំពេញ៖ ក្នុងឱកាសបុណ្យចូលឆ្នាំសកល២០២០ កម្ពុជាមានភ្ញៀវទេសចរដើរកម្សាន្ដតាមរមណីយដ្ឋាននានា នៅទូទាំងប្រទេស សរុប១,៣៨៦,០៥២នាក់។ ចំនួននេះកើនជាង២២ភាគរយ បើធៀបនឹងការចូលឆ្នាំសកល២០១៩។ នេះបើយោងតាមរបាយការណ៍របស់ក្រសួងទេសចរណ៍ ចេញផ្សាយនៅថ្ងៃទី២ ខែមករា ឆ្នាំ២០២០។
ក្នុងចំណោមភ្ញៀវទេសចរសរុបខាងលើ រាជធានី-ខេត្តចំនួន៥ ដែលមានអ្នកដើរលេងកម្សាន្តច្រើនជាងគេ រួមមាន ភ្នំពេញមាន៣៦ម៉ឺននាក់, សៀមរាប មានជិត៣០ម៉ឺននាក់, កែប មានជាង១៥ម៉ឺននាក់, កំពត មានជាង១២,៥ម៉ឺននាក់ និងខេត្តបាត់ដំបង មានជាង៨,៨ម៉ឺននាក់។
ដោយឡែក ខេត្តចំនួន៥ដែលមានភ្ញៀវទេសចរដើរលេងកម្សាន្តតិចជាងគេ ក្នុងពិធីបុណ្យឆ្លងឆ្នាំសកល គឺ ខេត្តកំពង់ធំ មានត្រឹម៦៧៨នាក់, ព្រៃវែង មាន៧៧៤នាក់, ស្ទឹងត្រែង មានជាង២៥០០នាក់, ក្រចេះ មាន២៦០០នាក់ និងខេត្តពោធិ៍សាត់ជាង៣៣០០នាក់៕
© រក្សាសិទ្ធិដោយ thmeythmey.com