កីឡាអន្តរជាតិ
អន្តរជាតិ
កូរ៉ូណាវីរុស៖ អូស្ត្រាលីស្នើ AFC ប្តូរការប្រកួតពេលប៉ះក្រុមចិននៅទឹកដីខ្លួន
× ក្រុមមន្ត្រីកីឡាបាល់ទាត់អូស្ត្រាលីស្នើសហព័ន្ធកីឡាបាល់ទាត់អាស៊ី (AFC) ប្តូរកាលវិភាគប្រកួតពានរង្វាន់ AFC Champions League ឡើងវិញ បន្ទាប់ពីរដ្ឋាភិបាលពួកគេបានដាក់បម្រាមលើការធ្វើដំណើររបស់ជនបរទេសណាដែលធ្វើដំណើរមកពីប្រទេសចិនដើម្បីបញ្ជៀសការឆ្លងមេរោគកូរ៉ូណាវីរុស នៅលើទឹកដីខ្លួន។
ក្រុមកីឡាបាល់ទាត់នៃលីគកំពូលចិន (CSL) Shanghai Shenhua និង Shanghai SIPG នឹងត្រូវទៅប្រកួតក្របខណ្ឌកំពូលរបស់អាស៊ីក្នុងវគ្គសន្សំពិន្ទុតាមពូលនាសប្តាហ៍ក្រោយ នៅទឹកដីអូស្ត្រាលី ដោយត្រូវតទល់ជាមួយក្រុមនៃលីគកំពូលអូស្ត្រាលី (A-League) Perth Glory និង Sydney FC ។
ស្របពេលគ្នានេះដែរ រដ្ឋាភិបាលអូស្ត្រាលី នៅថ្ងៃទី១ ខែកុម្ភៈ បានដាក់បម្រាមការធ្វើដំណើរជាបណ្តោះអាសន្នលើជនជាតិបរទេសដែលចូលមកពីប្រទេសចិន ដើម្បីការពារការឆ្លងមេរោគកូរ៉ូណាប្រភេទថ្មី (2019-nCoV)។
វិធានការរបស់រដ្ឋាភិបាលអូស្ត្រាលី គឺឲ្យតែអ្នកណាម្នាក់ដែលមកដល់អូស្ត្រាលីពីប្រទេសចិននឹងត្រូវបញ្ជូនត្រឡប់ទៅកន្លែងដើមរបស់ពួកគេវិញ ឬត្រូវដាក់ឲ្យនៅដាច់ដោយឡែកពីគេរយៈពេល ១៤ ថ្ងៃ។
«បន្ទាប់ពីការប្រកាសបម្រាម ... សហព័ន្ធកីឡាបាល់ទាត់អូស្ត្រាលី (FFA) បានណែនាំជាផ្លូវការដល់សហព័ន្ធកីឡាបាល់ទាត់អាស៊ី (AFC) អំពីស្ថានភាពនេះ។ ចំពោះការប្រកាសនេះ នឹងជះឥទ្ធិពលដល់ការប្រកួតជំនួបដំបូងនៃពានរង្វាន់ AFC Champions League ឆ្នាំ២០២០ ព្រោះជំនួបនេះមិនអាចធ្វើឡើងនៅអូស្ត្រាលីដូចដែលបានគ្រោងទុកឡើយ»។ FFA សរសេរបែបនេះនៅក្នុងសេចក្តីថ្លែងការណ៍មួយនៅថ្ងៃទី២ ខែកុម្ភៈ ដោយបន្ថែមថា AFC បានកោះប្រជុំបន្ទាន់មួយនៅថ្ងៃអង្គារទី៤ កុម្ភៈនេះនៅទីស្នាក់ការកណ្តាល AFC ក្នុងទីក្រុងគូឡាឡាំពួ ប្រទេសម៉ាឡេស៊ី ដើម្បីពិភាក្សាអំពីស្ថានភាពនេះជាមួយអ្នកពាក់ព័ន្ធទាំងអស់។
បើតាមការគ្រោងទុក ក្រុម Perth Glory នឹងត្រូវទទួលភ្ញៀវ Shanghai Shenhua FC សម្រាប់ជំនួបដំបូងពូល F នៅថ្ងៃទី១១ ខែកុម្ភៈ ខណៈ Sydney FC ក៏ត្រូវទទួល Shanghai SIPG នៅមួយថ្ងៃបន្ទាប់សម្រាប់វគ្គសន្សំពិន្ទុពូល H។
គិតត្រឹមថ្ងៃទី៤ ខែកុម្ភៈនេះ ចំនួនអ្នកស្លាប់ដោយសារការរីករាលដាលនៃមេរោគឆ្លងកូរ៉ូណាដែលមានប្រភពពីប្រទេសចិនបានកើនឡើងដល់ ៤២៧ នាក់ហើយ ខណៈអ្នកផ្ទុកមេរោគនេះ បានកើនឡើងដល់ជាង១,៧ម៉ឺននាក់ នៅក្នុងប្រទេសចិន។ តួលេខអ្នកស្លាប់ទាំងអស់ គឺនៅប្រទេសចិន ក្រៅពីនោះមានហ្វីលីពីន១ករណី និងហុងកុង១ករណី ក្រៅពីនេះប្រទេសដទៃមិនមានករណីស្លាប់ឡើយ៕
Tag:
កូរ៉ូណាវីរុស
AFC
AFC Champions League
© រក្សាសិទ្ធិដោយ thmeythmey.com