ភ្នំពេញ៖ គ្រឹះស្ថានសិក្សារដ្ឋកាន់តែច្រើនឡើង បានអនុវត្តន៍គោលការណ៍ហាមប្រាមសិស្សប្រើប្រាស់ទូរសព្ទដៃក្នុងម៉ោងសិក្សា។ ថ្នាក់ដឹកនាំសាសាដែលកំពុងអនុវត្តន៍វិធានការនេះ បានប្រាប់សារព័ត៌មានថ្មីៗថា បំរាមប្រើទូរសព្ទក្នុងម៉ោងរៀន បានផ្លាស់ប្តូរឥរិយាបថរបស់សិស្សគួរឲ្យកត់សម្គាល់ ពោលគឺពួកគេយកចិត្តទុកដាក់តសិក្សា និងបានធ្វើលំហាត់ច្រើនជាងមុន។ ទន្ទឹមនឹងនេះ គោលការណ៍នេះក៏ទទួលបានការសាទរពីលោកគ្រូអ្នកគ្រូ និងអាណាព្យាបាលសិស្សដែរ។
ការហាមសិស្សមិនឲ្យប្រើប្រាស់ទូរសព្ទនៅក្នុងម៉ោងរៀន កំពុងត្រូវបានអនុវត្តន៍កាន់តែច្រើនឡើង នៅតាមបណ្តាសាលារដ្ឋ ទាំងនៅក្នុងរាជធានីភ្នំពេញ និងនៅតាមបណ្តាខេត្ត។ ក្នុងនោះ មានអនុវិទ្យាល័យ ហ៊ុន សែន ពោធិ៍ចិនតុង នៅរាជធានីភ្នំពេញ, វិទ្យាល័យ ប៊ុន រ៉ានី ហ៊ុន សែន ព្រៃពោន នៅខេត្តព្រៃវែង, វិទ្យាល័យក្រុងទេពនិម្មិតប៉ៃលិន នៅខេត្តប៉ៃលិន និងវិទ្យាល័យតាអោក នៅខេត្តកំពង់ធំជាដើម។
សាលាដែលបានដាក់ចេញចំណាត់ការនេះ សុទ្ធតែមានបំណងដូចគ្នា គឺចង់ឲ្យសិស្សផ្តោតលើការសិក្សា និងគោរពវិន័យសាលា ខណៈដែលកន្លងមកសិស្សមួយចំនួនធំចូលចិត្តលេងហ្គេម ឬនិយាយទូរសព្ទក្នុងថ្នាក់រៀន រំខានដល់ការសិក្សាសិស្សដទៃទៀត។
លោក អ៊ុំ ម៉ាលី នាយកអនុវិទ្យាល័យ ហ៊ុន សែន ពោធិ៍ចិនតុង បានប្រាប់សារព័ត៌មានថ្មីៗថា អនុវិទ្យាល័យនេះ បានអនុវត្តការដកហូតទូរសព្ទសិស្ស ក្នុងម៉ោងសិក្សា រយៈពេល១ឆ្នាំហើយ ដោយសារតែមើលឃើញសិស្ស កាន់ទូរសព្ទ ច្រើនជាងកាន់សៀវភៅ។ បើតាម លោក អ៊ុំ ម៉ាលី សិស្សអាចប្រើទូរសព្ទបាន សម្រាប់ស្រាវជ្រាវមេរៀននៅក្នុងបណ្ណាល័យប៉ុណ្ណោះ។ លោកនាយកអនុវិទ្យាល័យ ហ៊ុន សែន ពោធិ៍ចិនតុង បញ្ជាក់ដូច្នេះ៖«ពេលដែលអនុវិទ្យាល័យ ហ៊ុន សែន ពោធិ៍ចិនតុង បានប្រើប្រាស់គោលការណ៍ហាមសិស្សមិនឲ្យប្រើទូរសព្ទនៅក្នុងសាលាមក សិស្សានុសិស្សលែងហ៊ានលេងទូរសព្ទបែបអត់ប្រយោជន៍ទៀតហើយ ដោយពួកគេគ្រាន់តែយកទូរសព្ទមកមែន តែគាត់អត់ចុចទេ។ កាលណាគាត់ចុច យើងនឹងដកហូត យកទៅទុកនៅទីចាត់ការ ដើម្បីអញ្ជើញអាណាព្យាបាលមកយកវិញ។ ប៉ុន្តែបើគាត់យកទូរសព្ទមក ហើយគាត់អត់ចុច យើងក៏អត់ធ្វើអីដែរ»។
វិទ្យាល័យ ប៊ុន រ៉ានី ហ៊ុន សែន ព្រៃពោន នៅខេត្តព្រៃវែងឯណោះវិញ បានអនុវត្តន៍គោលការណ៍ ហាមសិស្សឲ្យប្រើទូរសព្ទដៃនៅក្នុងម៉ោងសិក្សា ជាង១ឆ្នាំមកហើយ ដោយជំនួសមកវិញ នូវការជំរុញឲ្យសិស្សរៀនកុំព្យូទ័រវិញ ដូចជាការវាយអក្សរ និងរបៀបប្រើប្រាស់កុំព្យូទ័រជាដើម។ នេះបើតាមលោក យស ប៊ុនថន នាយកវិទ្យាល័យ។ លោក យស ប៊ុនថន ពន្យល់ប្រាប់សារព័ត៌មានថ្មីៗតាមទូរសព្ទថា សាលាចាប់ផ្តើមអនុវត្តន៍គោលការណ៍នេះ ក្រោយពីសង្កេតឃើញថា មានករណីសិស្សនិយាយទូរសព្ទក្នុងថា្នក់ និងលេងហ្គេមនៅក្នុងម៉ោងរៀន ដែលរំខានដល់សិស្សដទៃទៀត។
រហូតមកទល់ពេលនេះ សកម្មភាពនិយាយទូរសព្ទ ឬលេងហ្គេមក្នុងម៉ោងរៀន ត្រូវបានលុបបំបាត់ ហើយសិស្សានុសិស្សក៏ងាកមកសង្វាតការសិក្សាជាងពីមុន។ លោក យស ប៊ុនថន បន្ថែមទាំងរីករាយថា៖«កាលណាមិនប្រើទូរសព្ទទៅ វាក៏ផ្តល់ផលល្អដល់សិស្ស។...ជាលទ្ធផល សិស្សអាចប្រឡងជាប់ច្រើនជាងមុន។ កាលប្រឡងបាក់ឌុបនៅឆ្នាំកន្លងមក ក្នុងចំណោមសិស្ស២០០នាក់ មានតែ២០នាក់ទេដែលធ្លាក់។ ហើយប្រឡងសិស្សពូកែ ក៏មាន៥០ភាគរយដែរ ដែលប្រឡងជាប់។ សិស្សឥឡូវ មានការយកចិត្តទុកដាក់រៀនជាងមុនច្រើន»។
ដ្បិតតែការប្រើទូរសព្ទ ត្រូវបានហាមប្រាមនៅសាលា ក៏ប៉ុន្តែ បើតាមលោក យស ប៊ុនថន សាលាក៏បានណែនាំឲ្យសិស្ស ប្រើទូរសព្ទនៅផ្ទះ ឬនៅទីសាធារណៈ ដើម្បីជាផលប្រយោជន៍ដល់ការសិក្សារបស់ពួកគេ និងសមស្របតាមកម្មវិធីសិក្សារបស់ក្រសួងអប់រំ។
តាមពិតទៅ ការហាមសិស្សមិនឲ្យប្រើទូរសព្ទក្នុងម៉ោងរៀននេះ គឺមាននៅក្នុងសេចក្តីណែនាំ របស់ក្រសួងអប់រំ តាំងពីឆ្នាំ២០០៩មកម្ល៉េះ ហើយសេចក្តីណែនាំនេះទៀតសោត ក៏មិនផ្ទុយនឹងការណែនាំរបស់ក្រសួងដែលប្រាប់ឲ្យគ្រឹះស្ថានសិក្សានានា ជំរុញការអនុវត្តកម្មវិធីស្ទែម(STEM)នោះដែរ។ ត្រង់ចំណុចនេះ លោក រស់ សុវាចា ក្រសួងអប់រំ ពន្យល់ថា៖«កាលណាសាលា មានការប្រើបច្ចេកវិទ្យាបែបវិជ្ជមាន ដែលចូលរួមក្នុងការរៀន និងបង្រៀននោះ ក្រសួងលើកទឹកចិត្តឲ្យអនុវត្ត។ ផ្ទុយទៅវិញ បើសាលាមានការប្រើបច្ចេកវិទ្យាបែបអវិជ្ជមាន ដែលប្រាសចាកនឹងបទបញ្ជាផ្ទៃក្នុងរបស់ក្រសួង គណៈគ្រប់គ្រងសាលានីមួយៗ នឹងមានគោលការណ៍ផ្សេងៗ សម្រាប់អនុវត្តទៅលើសិស្ស»៕