ជាតិ
សម្ដេច ហ៊ុន សែន ប្រាប់ប្រធានរដ្ឋឡាវ ឱ្យរៀបចំកម្មវិធីកីឡា នៅតាមព្រំដែន ដើម្បីដោះស្រាយបញ្ហាប្រឈម
× ភ្នំពេញ៖ សម្ដេច ហ៊ុន សែន ស្នើឱ្យអគ្គលេខាបក្ស និងប្រធានរដ្ឋឡាវ លោកប៊ុនញ៉ាំង វរជីត ( Bounnhang VORACHITH) រៀបចំកម្មវិធីកីឡារួមគ្នា នៅតាមច្រកព្រំដែន ដើម្បីពង្រឹងទំនាក់ទំនង និងដោះស្រាយបញ្ហាប្រឈមនានា ដោយសន្តិវិធី។ នាយករដ្ឋមន្ត្រីកម្ពុជា និងប្រធានរដ្ឋឡាវ បានជួបពិភាក្សាពង្រឹងទំនាក់ទំនងគ្នា ពីតំបន់ព្រំដែន និងបញ្ហាផ្សេងៗ កាលពីថ្ងៃទី៩ កុម្ភៈ។
សម្ដេច ហ៊ុន សែន បានបញ្ជាក់ថា អាជ្ញាធរដែនដីកម្ពុជា-ឡាវ គឺមានតួនាទីសំខាន់ ក្នុងការជំរុញទំនាក់ទំនងទ្វេភាគីឱ្យកាន់តែជិតស្និទ ជាពិសេសគួរតែបង្កើតកម្មវិធីកីឡារួមគ្នានៅតាមព្រំដែន ដើម្បីធ្វើឱ្យទំនាក់ទំនងល្អនេះ ឈានដល់ការដោះស្រាយរាល់បញ្ហាផ្សេងៗ ដែលកើតមានឡើងនៅតាមខ្សែបន្ទាត់ដែនដីប្រទេសទាំងពីរ។
«មិនត្រឹមតែអាជ្ញាធរដែនដីទេ ក័ងទ័ពនៃប្រទេសយើងទាំងពីរ ក៏គប្បីដែលជំរុញទំនាក់ទំនងឱ្យបានកាន់តែជិតស្និទផងដែរ ព្រោះកាលណាមានភាពជិតស្និទហើយទោះបីមានរឿងអ្វីក៏អាចដោះស្រាយ និង ពិភាក្សាគ្នាបានដែរ»។ នេះបើតាមហ្វេសប៊ុកសម្ដេច ហ៊ុន សែន ដែលបានស្រង់ខ្លឹមសារនៃជំនួបមេដឹកនាំទាំងពីរ។
ប្រធានរដ្ឋឡាវ លោកប៊ុនញ៉ាំង វរជីត បាននិយាយថា កម្ពុជា និងឡាវជាមិត្តជិតស្និទជាទីបំផុត ដែលបានជួយគ្នាទៅវិញទៅមក ហើយក៏ជាប្រទេសដែលមានកំណើនពាណិជ្ជកម្មទ្វេភាគីកាន់តែល្អ រួមទាំងសុវត្ថិភាពនៅតាមព្រំដែនផងដែរ។
កាលពីថ្ងៃទី១២ ខែកញ្ញា ឆ្នាំ២០១៩ កម្ពុជា-ឡាវ បានឯកភាពគ្នា លើកកម្ពស់ទំនាក់ទំនង និងកិច្ចសហប្រតិបត្តិការ ក្នុងកម្រិតជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង លើស្មារតីសាមគ្គីភាពជាភាតរៈនៃភាគីទាំងពីរ។ តាមរយៈការប្រកាសធ្វើជាដៃគូយុទ្ធសាស្ត្រគ្រប់ជ្រុងជ្រោយនេះ ភាគីទាំងពីរ បានប្ដេជ្ញារួមគ្នាអភិវឌ្ឍន៍ទំនាក់ទំនងមិត្តភាព ដោយឈរលើមូលដ្ឋានច្បាប់អន្តរជាតិ ជាពិសេសគោលការណ៍ដែលមានចែងនៅក្នុងធម្មនុញ្ញរបស់អង្គការសហប្រជាជាតិ និងធម្មនុញ្ញអាស៊ាន។
សេចក្តីថ្លែងការណ៍រវាងរដ្ឋាភិបាលកម្ពុជា-ឡាវ បានសរសេរដូច្នេះថា៖«ភាគីទាំងពីរបានបញ្ជាក់ជាថ្មីពីការទុកចិត្ត និងការជឿជាក់គ្នាទៅវិញទៅមក និងការគោរពគោលការណ៍មិនជ្រៀតជ្រែកកិច្ចការផ្ទៃក្នុងរបស់គ្នាទៅវិញទៅមក (រួមទាំង)ការមិនប្រើប្រាស់កម្លាំង ឬការគំរាមប្រើកម្លាំង ការដោះស្រាយទំនាស់ដោយសន្តិវិធី ព្រមទាំងមិនអនុញ្ញាតឱ្យក្រុមអ្នកនយោបាយ ឬកម្លាំងប្រដាប់អាវុធបរទេសណាមួយប្រើប្រាស់ទឹកដីរបស់ខ្លួន ដើម្បីប្រឆាំងនឹងភាគីម្ខាងទៀតឡើយ»។
ភាពជាដៃគូយុទ្ធសាស្ត្រគ្រប់ជ្រុងជ្រោយ គឺសំដៅលើការផ្ដល់ប្រយោជន៍ដល់ភាគីទាំងសងខាង លើគ្រប់វិស័យទាំងផ្នែកកាទូត នយោបាយ សេដ្ឋកិច្ច សន្តិសុខ និងហិរញ្ញវត្ថុជាដើម…៕
Tag:
ហ៊ុន សែន
ឡាវ
ព្រំដែន
កីឡា
© រក្សាសិទ្ធិដោយ thmeythmey.com