បទយកការណ៍ / បទសម្ភាសន៍
ជាតិ
បទយកការណ៍៖ សម្តេចឪស្ថិតនៅក្នុងក្រអៅបេះដូងរបស់ពលរដ្ឋខ្មែរជានិច្ច
× ភ្នំពេញ៖ ថ្ងៃទី១៥ ខែតុលា ឆ្នាំ២០១៣នេះ ជាថ្ងៃគម្រប់ខួបមួយឆ្នាំដល់ព្រះវិញ្ញាណក្ខន្ធព្រះបរមរតនកោដ្ឋ ដែលប្រារព្ធធ្វើឡើងនៅវិមានព្រះបរមរូប និងព្រះបរមបដិមាព្រះបរមរតនកោដ្ឋ សួនច្បារខាង កើតវិមានឯករាជ្យ។ ទោះបីព្រះអង្គសម្តេចឪ បានឃ្លាតឆ្ងាយពី កូន ចៅ អស់រយៈពេល៣៦៥ថ្ងៃទៅហើយក្តី ក៏កូន ចៅ នៅតែចងចាំនូវរាល់ស្នាព្រះហស្តរបស់ព្រះអង្គគ្មានថ្ងែបំភ្លេចបានឡើយ។
នៅថ្ងៃនេះ អ្នកដែលមិនបានចូលរួមដល់ទីតាំងព្រះរាជពិធី ក៏បានចូលរួមសម្តែងការគោរពដល់ ព្រះវិញ្ញាណក្ខន្ធព្រះអង្គពីចម្ងាយ និងតាមរយៈបណ្តាញសង្គមមួយចំនួនផងដែរ។
ចំរៀងមួយបទដែលសម្តេចឪ បានបន្សល់ទុកឲ្យកូនចៅជាលើកចុងក្រោយ ក្រោយចំណងជើង ថា«លាហើយកម្ពុជា» ដ៏ពិរោះរណ្តំចិត្ត និងពោពេញទៅដោយអត្ថន័យ បានឆ្លាក់ជាប់ក្នុងក្រអៅបេះដូង របស់កូនខ្មែរគ្រប់រូបគ្មានថ្ងៃបំភ្លេចបានឡើយ។
លោក ចំរើន បានសម្តែងអារម្មណ៍ថា៖«ខ្ញុំនៅតែនឹកស្រណោះដល់ព្រះអង្គ នៅតែចូលចិត្តស្តាប់បទ ចំរៀងរបស់ព្រះអង្គ (លាហើយកម្ពុជា)»។
រក្សាទុកបទចំរៀងរបស់ព្រះអង្គ នៅជាប់ក្នុងទូរស័ព្ទ ហើយក៏តែងចាក់ស្តាប់ជាញឹកញាប់ផងដែរនោះ លោក ចាន់ សម្បត្តិ វ័យ២៥ឆ្នាំ បានសម្តែងការនឹករឮកថា៖«ខ្ញុំតែងមើលរូបរបស់ព្រះអង្គនៅក្នុង ទូរស័ព្ទខ្ញុំ។ បទចំរៀងរបស់ព្រះអង្គពិរោះ មានអត្ថន័យណាស់»។
បុរសវ័យ៣២ឆ្នាំ ជាទន្តពេទ្យ រៀបរាប់ថា៖«ខ្ញុំរក្សារូបភាពរបស់ព្រះអង្គទុកជាអនុស្សវរីច្រើនណាស់។ ព្រះអង្គជាមហាវិរក្សត្ររបស់ខ្មែរ ព្រះអង្គជាម្លប់ដ៏ត្រជាក់»។
យុវជន លន់ វិបុត្រ ជានិស្សិតឆ្នាំទី៣ ឲ្យដឹងដែរថា៖«ពេលនឹកគាត់ម្តងៗចង់តែយំ។ ខ្ញុំមិនភ្លេចបទ (លាហើយកម្ពុជា) ឡើយ ពេលស្តាប់ម្តងៗចង់តែយំ...»។
លោក ឃួន វិរៈ ម្នាក់ទៀត ជាបុគ្គលិកក្រុមហ៊ុនឯកជនម្នាក់ បានសម្តែងទឹកចិត្តថា៖«ខ្ញុំតែងនឹក តែងរំ ឮកដល់ស្នាដៃ ដល់ស្នាមញញឹមរបស់ព្រះអង្គ»។ ចំណែកឯ កញ្ញា រស្មី ជាគ្រូពេទ្យ បានឲ្យដឹងដែរថា៖«បទលាហើយកម្ពុជា ខ្ញុំច្រៀងឡើងចាំទៅ ហើយ...»។
គួរបញ្ជាក់ថា ប្រជាពលរដ្ឋមួយចំនួនក៏បានសម្តែងក្តីនឹករឭកដល់ព្រះអង្គសម្តេចឪ តាមបណ្តាញសង្គម ហ្វេសប៊ុកផងដែរ។ ដោយអ្នកមួយចំនួនបាន ប្តូររូបភាពនៅលើគណនីយរបស់ខ្លួន ដាក់រូបព្រះអង្គ សម្តេចឪ។ ចំណែកឯអ្នកមួយចំនួនទៀត ក៏បានសរសេរជាសាររំលែកទុក្ខ រំឮកគុណ និងពាក្យពេចន៍ ជាច្រើនទៀតបង្ហោះលើគេហទំព័រនេះផងដែរ៕
© រក្សាសិទ្ធិដោយ thmeythmey.com