បទយកការណ៍ / បទសម្ភាសន៍
ជាតិ
បទយកការណ៍៖ ពណ៌សក់បង្កើនមន្តស្នេហ៍ តែវាក៏ប្រឈមនឹងការរិះគន់ផងដែរ ភ្នំពេញ៖ នៅសម័យបច្ចុប្បន្ននេះ យើងសង្កេតឃើញថា យុវវ័យភាគច្រើនចូលចិត្តលាបពណ៌សក់ប្លែកៗ គ្រប់ពណ៌ចម្រុះ។ សក់ពណ៌ក្រហម លឿង ប្រផេះ និងពណ៌ទង់ដែង គឺមានការពេញនិយមបំផុត។ ទោះបីជាការលាបសក់ពណ៌នេះ មានការពេញនិយមខ្លាំងក៏ពិតមែន ប៉ុន្តែទង្វើនេះក៏ទទួលរងនូវការរិៈគន់ផងដែរ។
ការលេងម៉ូតសក់ និងដូរពណ៌សក់ញឹកញាប់ ត្រូវបានយុវវ័យសម័យថ្មីទទួលស្គាល់ថា អាចជួយលើក សម្រស់ និងអាចជួយបង្កើនមន្តស្នេហ៍ដល់ពួកគេ។ មិនថាតែពេលចូលរួមពិធីជប់លៀង អាពាហ៍ ពិពាហ៍ ឬខួបកំណើតនោះទេ សូម្បីតែពេលធម្មតាក៏ពួកគេមិនទុកឲ្យសក់នៅទំនេរនោះដែរ។
«ការលាបពណ៌សក់ និងលេងម៉ូតសក់ជារឿងធម្មតា គ្មានអ្នកណាទុកសក់ឲ្យនៅពណ៌ខ្មៅធម្មជាតិ ទៀតឡើយ។ ទុកសក់ពណ៌ខ្មៅមើលទៅបុរាណណាស់»។ នេះជាការលើកឡើងរបស់យុវវ័យសម័យថ្មី។ កញ្ញា ហាក់ ធារ៉ា នាងជាអ្នកចូលចិត្តលាបពណ៌សក់តាំងពីក្មេង។ ម្យ៉ាងវិញទៀតដោយឃើញគំរូ ពីតារាបរទេសផងនោះ បានជម្រុញឲ្យរូបនាងកាន់តែចង់ថែមទៀត។
យុវតីសម្បុរស រាងតូចច្រឡឹង សក់ទង់ដែងរូបនេះរៀបរាប់ថា៖«ឃើញពណ៌សក់ប្លែកៗស្អាត ធ្វើឲ្យខ្ញុំ ចង់លាបដែរ។ ភាគច្រើនស្រីៗសម័យឥឡូវគេចូលចិត្តដូរម៉ូតសក់តាមតារាកូរ៉េ»។ កញ្ញា ធារ៉ា បន្តទៀត ថា៖«មិត្តភ័ក្តិតែងចំអន់ថា មុខមិនសូវស្អាត តែបានសក់យោង»។
កញ្ញា សុជាតា ជាអ្នកចូលចិត្តដូរពណ៌សក់ញឹកញាប់ផងដែរនោះ បានប្រាប់ផងដែរថា វាប្លែក ឡូយ ទាន់សម័យ ជាពិសេសនោះវាអាចជួយលើកសម្រស់យើងបានមួយកម្រិតទៀតផង ។
យុវតីសក់ក្រហមរូបនេះ បាននិយាយឲ្យដឹងថា៖«មុខខ្ញុំសមនឹងសក់ពណ៌ក្រហម មើលទៅស៊ិចស៊ី បើទុកសក់ពណ៌ ខ្មៅគឺមិនសមទេ...»។ កញ្ញាមុខរាងមូលរូបនេះ បន្ថែមថា៖«ខ្ញុំមិនឲ្យសក់ដុះខ្មៅទាន់ឡើយ ខ្ញុំត្រូវប្រញាប់ លាបសារជាថ្មី»។
ងាកមកអ្នកប្រកបអាជីវកម្មមួយចំនួនវិញ ពួកគេក៏ហាក់មិនអាចចោលបាន នូវការដូរពណ៌សក់ញឹក ញាប់ផងដែរ ព្រោះម៉ូតសក់របស់ពួកគេនេះហើយជាឆ្នាំងបាយរបស់ពួកគេ។
ជាជាងកាត់សក់នៅម្តុំទួលទំពូង យុវជន គុជ បូរី ចូលចិត្តលេងពណ៌សក់ និងម៉ូតសក់ប្លែកៗជាប្រចាំ។ ក្នុងចំណោមជាងកាត់សក់ជាច្រើន បូរី ក៏ជាអ្នកមានប្រជាប្រិយភាពម្នាក់ដែរក្នុងស្រទាប់យុវវ័យ។ រូបគេ ចូលចិត្តដូរពណ៌សក់ណាដែលមើលទៅប្លែកពីអ្នកដទៃ។ ការធ្វើបែបនេះគឺដើម្បីទាក់ទាញម៉ូយ ម្យ៉ាង វិញទៀត វាក៏ជួយលើកសម្រស់ពីធម្មជាតិ ឲ្យកាន់តែទាន់សម័យថែមទៀតផង។
យុវជនសក់ពណ៌ក្រហមរូបនេះ ឲ្យដឹងថា៖«ខ្ញុំចូលចិត្តសក់ពណ៌ក្រហម លឿង និងពណ៌ស្វាយ។ មើលទៅឆើតបន្តិចមែន ប៉ុន្តែស្អាត។ រយៈពេលកន្លះខែខ្ញុំដូរពណ៌សក់ម្តង»។ បូរី អះអាងទៀតថា៖ «ភ្ញៀវមួយចំនួនចូលចិត្តលាបពណ៌តាមខ្ញុំ។ ថ្ងៃខ្លះមានភ្ញៀចូលមកដូរពណ៌សក់ពី១០ ទៅ២០ នាក់ក៏ មាន។
ម៉ូតសក់ច្រូងផ្កាថ្កូវ ដៃម្ខាងកាន់ក្រាស់ ដៃម្ខាងកាន់កន្ត្រៃ ខណៈកំពុងកាត់សក់ឲ្យភ្ញៀវយ៉ាងញាប់ដៃ លោក ស៊ី ណារ៉ា ជាមេជាងកាត់សក់ នៅហាងមួយកន្លែងម្តុំទួលស្លែង បានលើកឡើងថា៖«ភ្ញៀវរបស់ ខ្ញុំមួយចំនួន គេកុម្ម៉ង់តាមម៉ូតសក់ខ្ញុំ គេសសើរថាស្អាត។ ភ្ញៀវជាច្រើននាក់ទៀត របស់កូនជាងខ្ញុំក៏អ៊ី ចឹងដែរ»។
ទោះបីការលាបពណ៌សក់ និងដូរម៉ូតសក់ប្លែកៗ កំពុងមានការពេញនិយមខ្លាំង ពីសំណាក់យុវវ័យមួយ ចំនួនក៏ដោយ ប៉ុន្តែក៏មានចាស់ៗជំនាន់មុនមួយចំនួន បានសម្តែងការមិនពេញចិត្តផងដែរ។
អ្នកស្រី ឡុង សុខឃន អាយុ៦៦ឆ្នាំបានសំដែងការមិនពេញចិត្តថា ការលាបពណ៌សក់ និងម៉ូត សក់ប្លែកៗបែបនេះ មើលទៅហាក់បីដូចជាមិនសមនឹងភ្នែកចាស់ៗឡើយ។ ម្យ៉ាងវិញទៀតដោយនៅ ជំនាន់មុន មិនមានការលាបពណ៌សក់ និងម៉ូតសក់ច្រើនម៉ូត ច្រើនពណ៌បែបនេះឡើយ។ មានន័យថា កាលពីសម័យនោះគេនិយមតែសក់ពណ៌ខ្មៅ និងម៉ូតសក់ធម្មតាៗតែប៉ុណ្ណោះ។
អ្នកស្រីវ័យចំណាស់រូបនេះ រៀបរាប់ថា៖«ខ្ញុំមិនចូលចិត្តពីព្រោះថា មើលទៅវាមិនសមភ្នែក វាមិនទម្លាប់ ។ ក្មេងៗឥឡូវគេថាស្អាតបោះគេហើយ»។ អ្នកស្រីបន្ថែមទៀតថា៖«ក្មេងឥឡូវមិនដូចយើងចាស់ឯណា យើងរកតែខ្មៅៗ ។ ដល់ពេលឥឡូវគេសុទ្ធតែ លាបក្រហម ខៀវ លឿងអីចឹងខ្ញុំមិនចូលចិត្តទេ»។
មាតា បិតា មួយចំនួនទៀត ក៏តែងស្តីបន្ទោស កូនៗរបស់ខ្លួន ពីរឿងពណ៌សក់ និងការលេងម៉ូតសក់ របស់ពួកគេថាជ្រុលពេកផងដែរ។ មិនតែប៉ុណ្ណោះ ក៏មានសិស្សវិទ្យាល័យមួយចំនួន សម្រេចចិត្តគេច សាលាជាញឹកញាប់ផងដែ ព្រោះគ្រូមួយចំនួនមិនពេញចិត្ត ម៉ូត និងពណ៌សក់របស់ពួកគេទៀតផង។
ទោះបីជាការដូរពណ៌សក់ និងលេងម៉ូតសក់ប្លែកៗ អាចជាវិធីកែច្នៃសម្រស់ឲ្យកាន់តែស្អាតមួយកម្រិត ក៏ពិតមែន ក៏ប៉ុន្តែមានមតិមួយចំនួនរិះគន់ថា វាមិនស័ក្តិសមសម្រាប់ខ្លួនជាយុវជន យុវតី ខ្មែរនោះ ឡើយ៕
© រក្សាសិទ្ធិដោយ thmeythmey.com