COVID-19
អន្តរជាតិ
COVID-19៖ អ្នកស្លាប់ឡើងដល់ជាង៣១០០នាក់ ខណៈករណីឆ្លងរាលដាលដល់ជាង៧០ប្រទេស
× គិតត្រឹមព្រឹកថ្ងៃអង្គារ ទី៣ ខែមីនា នេះ ចំនួនអ្នកស្លាប់ដោយសារកូរ៉ូណាវីរុស (COVID-19) ឡើងដល់៣១២៥នាក់ ក្នុងចំណោមអ្នកឆ្លងជាង៩ម៉ឺននាក់។ ចិនមានអ្នកស្លាប់៣១នាក់បន្ថែមទៀតដែលសុទ្ធតែនៅក្នុងខេត្តហ៊ូប៉ី រួមទាំងកំណើននៅកូរ៉េខាងត្បូង អាមេរិក និងបារាំង។ បច្ចុប្បន្ន៧៣ប្រទេសហើយ ដែលរកឃើញករណីឆ្លង។
នៅចិន ក្នុងចំណោមជាង៨ម៉ឺនករណី អ្នកស្លាប់មាន២៩៤៧នាក់ ដោយភាគច្រើនបំផុតក្នុងខេត្តហ៊ូប៉ី ជាពិសេសក្រុងវូហានដែលជាតំបន់ផ្ទុះមេរោគ។ ប្រទេសដែលមានករណីស្លាប់រួមមាន អ៊ីរ៉ង់ ៦៦នាក់ អ៊ីតាលី៥២នាក់ កូរ៉េខាងត្បូង ៣៤នាក់ ជប៉ុន ១៣នាក់ (ក្នុងនោះ នាវា Diamond Princess ៧នាក់) សហរដ្ឋអាមេរិក៦នាក់ បារាំង៣នាក់ ថៃ អូស្ត្រាលី សាំងម៉ារ៉ាំង និងហ្វីលីពីន មាន១នាក់រៀងៗខ្លួន។
បន្ទាប់ពីចិន កូរ៉េខាងត្បូងមានករណីឆ្លងច្រើនជាងគេ ដែលមានជាង៤៨០០ករណី អ៊ីតាលីជាង២០០០ករណី អ៊ីរ់ង់ ជាង១៥០០ករណី ជប៉ុន និងករណីនៅនាវា Diamond Princess មានជិត១០០០ករណីផងដែរ។
បារាំង អាល្លឺម៉ង់ អេស្ប៉ាញ សិង្ហបុរី និងអាមេរិក មានចន្លោះពី១០០ទៅជិត២០០ករណីរៀងៗខ្លួន រីឯប្រទេសជាង២០ មានករណីឆ្លងចន្លោះពី១០ ទៅជិត៦០ករណី ខណៈប្រទេសផ្សេងទៀត តិចជាង១០ករណី។
ជាមួយគ្នានេះ ករណីជាង៤៨០០០ ត្រូវបានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។ ករណីសះស្បើយនៅចិនមានជាង៤៧០០០នាក់៕
© រក្សាសិទ្ធិដោយ thmeythmey.com