ជាតិ
តើប្រភេទត្រីជិតផុតពូជជំរុញ និងអប់រំ អំពីសារៈសំខាន់នៃការផ្សារភ្ជាប់គ្នា រវាងទឹក ជីវៈចម្រុះ និងប្រជាជននៅក្នុងប្រទេសកម្ពុជាយ៉ាងដូចម្តេច?
×![]()
ដោយ៖ គម្រោងអច្ឆរិយភាពនៃទន្លេមេគង្គ
ទន្លេមេគង្គ គឺជាទន្លេមួយដែលហូរឆ្លងកាត់ប្រាំមួយប្រទេស នៅក្នុងតំបន់អាស៊ីអាគ្នេយ៍ គឺជាជម្រករបស់ត្រីយក្សជាច្រើន ជាងទន្លេនានានៅក្នុងពិភពលោក។
នៅទីនោះ អ្នកនឹងអាចឃើញមានត្រីធំៗ ដូចជា ត្រីគល់រាំង ដែលជាប្រភេទត្រីមានស្រកាធំជាងគេលើពិភពលោក, ត្រីបបែលយក្ស ជាសត្វដ៏អាថ៌កំបាំង ដែលទើបតែត្រូវបានពិពណ៌នាដោយវិទ្យាសាស្ត្រ រួមជាមួយនឹងកំណត់ត្រារបស់ពិភពលោកនាពេលបច្ចុប្បន្ន គឺប្រភេទត្រីទឹកសាបទំហំដ៏មហិមាដែលរស់នៅតែក្នុងតំបន់ទឹកសាប ត្រីរាជ មានទម្ងន់រហូតដល់ ២៩៣គីឡូក្រាម។
ទន្លេមេគង្គបង្ហាញសម្រស់ និងជីវិត ប្រៀបបានទៅនឹង «មាតាគង្គា» ។ មានត្រីចំនួន ១.០០០ ប្រភេទ ត្រូវបានគេរកឃើញនៅទូទាំងអាងទន្លេមេគង្គ ហើយក៏នៅមានត្រីជាច្រើនប្រភេទទៀតមិនទាន់ត្រូវបានរុករកនៅឡើយ។
វាប្រហែលជាមិនមានអ្វីគួរឱ្យភ្ញាក់ផ្អើលទេ ដែលប្រព័ន្ធទន្លេមេគង្គជាជម្រកនៃជលផលទឹកសាបដ៏ធំជាងគេនៅលើពិភពលោក និងគាំទ្រដល់ការចិញ្ចឹមជីវិតរបស់ប្រជាជនជាង ៦០ លាននាក់ ដែលរស់នៅក្នុងតំបន់។ ជីវិត និងវប្បធម៌ក្នុងទន្លេមេគង្គ មានទំនាក់ទំនងគ្នាយ៉ាងជិតស្និទ្ធិទៅនឹងវដ្តធម្មជាតិរបស់ទន្លេ។
លើកកម្ពស់ការយល់ដឹង
បណ្ឌិត ហូហ្គេន អ្នកដឹកនាំគម្រោង « អច្ឆរិយភាពនៃទន្លេមេគង្គ» របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ដែលជាកិច្ចខិតខំប្រឹងប្រែងសិក្សាអំពីជីវចម្រុះ អាកាសធាតុ និងជលសាស្ត្រ នៃអាងទន្លេមេគង្គ។
ការលើកកម្ពស់ការយល់ដឹងជាសាធារណៈ អំពីត្រីយក្សរបស់ទន្លេមេគង្គ ជាផ្នែកសំខាន់មួយនៃគម្រោង ពិសេសក្នុងចំណោមកុមារ។
ក្នុងចំណោមបរិក្ខាឧបទេសសម្រាប់ការអប់រំ និងការផ្សព្វផ្សាយ ដែលត្រូវបានប្រើនៅក្នុងគម្រោង គឺសៀវភៅផាត់ពណ៌ ប្រតិទិន និងល្បែងជាច្រើនដែលពិពណ៌នាអំពីត្រីយក្ស។ បរិក្ខាទាំងនេះ ត្រូវបានចែកចាយនៅតាមព្រឹត្តិការណ៍ និងពិធីបុណ្យនានា និងតាមរយៈបណ្តាញសង្គមដល់ប្រជាជនរាប់រយរាប់ពាន់នាក់ នៅទូទាំងប្រទេសកម្ពុជា ដែលទទួលបានចំនួនអ្នកទស្សនាសរុបប្រមាណជាង ១.៥០០.០០០ នាក់នៅឆ្នាំ ២០១៩។
«បណ្តាញអ្នកនេសាទ» ត្រូវបានបង្កើតឡើងដើម្បីបង្កើនការយល់ដឹងក្នុងចំណោមអ្នកនេសាទ អំពីសារៈសំខាន់នៃការអភិរក្សប្រភេទត្រីជិតផុតពូជ។ ភាពជាដៃគូរវាងអ្នកនេសាទ រដ្ឋបាលជលផលកម្ពុជា និងគម្រោង អច្ឆរិយភាពនៃទន្លេមេគង្គ បាននាំឱ្យមានការថយចុះនូវការស្លាប់របស់ត្រីជិតផុតពូជរាប់ពាន់ក្បាល រួមទាំងត្រីរាជ ត្រីគល់រាំង និងត្រីប្រាផងដែរ។
ត្រីជិតផុតពូជមិនទាន់ពេញវ័យ ត្រូវបានដកហូតពីអ្នកនេសាទដែលប្រើប្រាស់ឧបករណ៍នេសាទខុសច្បាប់ ឬក៏ប្រមូលបានក្នុងកំឡុងពេលស្រាវជ្រាវ។ ត្រីមិនទាន់ពេញវ័យទាំងនេះ ត្រូវបានរក្សាទុកនៅក្នុងស្រះ មុនពេលត្រូវបានលែងវិញចូលក្នុងទន្លេវិញ។
លោកបណ្ឌិត ហូហ្គេន និយាយថា «ត្រីយក្ស គឺជាប្រភេទសត្វដែលមានលក្ខណៈជានិមិត្តរូបនៃតម្លាភាពនៃអេកូឡូស៊ី របស់ទន្លេមេគង្គ»។ ការបាត់បង់ត្រីទាំងនេះ គឺជាការព្រមានមួយដែលយើងត្រូវចាត់វិធានការបន្ទាន់ ដើម្បីធ្វើឱ្យប្រសើរឡើងនូវប្រព័ន្ធអេកូឡូស៊ី នៃទន្លេដ៏អស្ចារ្យនេះ។
ក្នុងឳកាសនៃទិវាសត្វពិភពលោក ដែលប្រារព្ធធើ្វឡើងនៅថ្ងៃទី ៣ ខែមីនាឆ្នាំ ២០២០ នេះ ក្រោមប្រធានបទ «ទ្រទ្រង់ជីវិតទាំងអស់នៅលើផែនដី» លោកបណ្ឌិត ហូហ្គេន ចង់ឲ្យយើងចងចាំថា មច្ឆាក៏ជាសត្វព្រៃដែរ។ ហើយទាំងនោះ ក៏បូករួមទាំងត្រីយក្សដ៏ធំសម្បើមនៃទន្លេមេគង្គដែរ៕
© រក្សាសិទ្ធិដោយ thmeythmey.com
