អន្តរជាតិ
នាយករដ្ឋមន្ត្រីស៊ូដង់ រួចខ្លួនពីការប៉ុនប៉ងធ្វើឃាតកម្មដោយបំផ្ទុះគ្រាប់
នាយករដ្ឋមន្ត្រីស៊ូដង់ Abdalla Hamdok ។ រូបភាព AFP
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីស៊ូដង់ លោក Abdalla Hamdok បានរួចខ្លួនពីការប៉ុនប៉ងធ្វើឃាតកម្មដោយការបំផ្ទុះគ្រាប់បែកក្នុងរដ្ឋធានីខាទុំនៅថ្ងៃទី៩ ខែមីនា។ នេះបើតាមការបញ្ជាក់របស់មន្ត្រីការិយាល័យនាយករដ្ឋមន្ត្រីស៊ូដង់។
គ្រាប់បែកបានផ្ទុះពេលក្បួនរថយន្តរបស់នាយករដ្ឋមន្ត្រីស៊ួដង់ Abdalla Hamdok ធ្វើដំណើរក្នុងរដ្ឋធានីខាទុំ។ លោក Ali Bakhi នាយកការិយាល័យនាយករដ្ឋមន្ត្រីបញ្ជាក់បែបនេះនៅថ្ងៃទី៩ ខែមីនា។ លោកបន្តថា ការប៉ុនប៉ងធ្វើអត្តឃាត មិនបានបណ្ដាលឲ្យមានមនុស្សស្លាប់ឡើយ។
លោក Hamdok ត្រូវបានតែងតាំងជានាយករដ្ឋមន្ត្រីស៊ូដង់កាលពីខែសីហា ឆ្នាំ២០១៩ ដោយក្រុមប្រឹក្សាអធិបតេយ្យ ដែលដឹកនាំស៊ូដង់ក្រោយការទម្លាក់លោក អូម៉ា អាល់-បាសៀ កាលពីខែមេស ឆ្នាំដដែល។ ក្រុមប្រឹក្សានេះ មានសមាជិកមកពីយោធា និងតំណាងក្រុមបាតុករប្រឆាំងលោក អាល់-បាសៀ ដោយដាក់វេនគ្នាដឹកនាំប្រទេស។ សព្វថ្ងៃ យោធាជាប្រធានស្ថាប័ននេះ។
មុនក្លាយជានាយករដ្ឋមន្ត្រីស៊ូដង់ លោក Hamdok ធ្លាប់កាន់តំណែងនៅអង្គការអន្តរជាតិជាច្រើនដូចជា អគ្គលេខាធិការប្រតិបត្តិគណៈកម្មការសេដ្ឋកិច្ចអង្គការសហប្រជាជាតិសម្រាប់អាហ្វ្រិក ធនគារអភិវឌ្ឍអាហ្វ្រិក និងជាមន្ត្រីអង្គការអន្តរជាតិខាងការងារនៅកូដឌីវ័រ៕
Tag:
ស៊ូដង់
Abdalla Hamdok
© រក្សាសិទ្ធិដោយ thmeythmey.com
