បទយកការណ៍ / បទសម្ភាសន៍
ជាតិ
បទយកការណ៍៖ កន្លែងផឹកស៊ីក៏ជាទីណាត់ជួបរបស់នារីសម័យថ្មីផងដែរ
× ក្រោយពីសម្រាកពីការងារ ឬពេលទំនេរ មនុស្សមួយចំនួនចូលចិត្តការជួបជុំជជែកគ្នាបណ្តើរ ក្រេប រស់ជាតិស្រាបៀរបណ្តើរ។ ជំនួបនៅកន្លែងផឹកស៊ី បានក្លាយទៅជាទម្លាប់មួយយ៉ាងសាមញ្ញទៅហើយ សម្រាប់បុរសៗ ។ ប៉ុន្តែ នារីៗមួយចំនួនសម័យបច្ចុប្បន្ននេះវិញ ក៏មិនចាញ់បុរសៗប៉ុន្មានដែរ ពួកគេក៏ ចូលចិត្តការអង្គុយជជែកគ្នា ដោយមានស្រាបៀរនៅកំដរផងដែរ។
នារីៗកាលពីមុន មានការអៀនខ្មាស់ ខ្លាចកន្លែងដែលមានបុរសៗច្រើន ស៊ឹងតែមិនហ៊ានចេញក្រៅផ្ទះ ផង។ ប៉ុន្តែនារីៗមួយចំនួនសម័យថ្មីនេះវិញ ពួកគេហាក់បីមិនសូវអៀនខ្មាស់ ចូលចិត្តដើរលេង ផឹកស៊ី សប្បាយ លែងចង់ចូលផ្ទះទៅវិញ។
អ្នកខ្លះចូលចិត្តទៅជាក្រុមនារីៗគ្នាឯង អ្នកខ្លះទៀតទៅជាមួយបុរសៗជាគូស្នេហ៍ ពេលខ្លះជជែកគ្នាទ្រ ហឹងអឺងកង សំឡេងលាន់លឺសឹងតែគ្របដណ្ដប់ហាងមួយទាំងមូលក៏មាន។
ក្រៅពីបាយ ម្ហូប និងគ្រឿងក្លែមជាច្រើនមុខ ពួកគេមិនអាចចោលបានឡើយ នូវស្រាបៀដែលក្លាស់សេ ត្រជាក់ៗផងនោះ។
កញ្ញា មុន្នីរ័ត្ន ជាបុគ្គលិកក្រុមហ៊ុនឯកជនម្នាក់ បានឲ្យដឹងថា ពេលទំនេរចូលចិត្តជួបជុំមិត្តភ័ក្តិ ចេញទៅហាងផឹកស៊ីខាងក្រៅ ជជែកគ្នាពីរឿងការងារ និងរំលឹកពីអនុស្សាវរីយ៍ចាស់ៗ ។ កញ្ញាវ័យ ២៣ឆ្នាំរូបនេះ និយាយថា ៖«ការជួបជុំនៅផ្ទះវាពិបាក ទៅហាងតែម្តងវាងាយស្រួលជាង មានម្ហូបមាន អ្វីៗគ្រប់យ៉ាងស្រាប់ យកតែលុយទៅជាការស្រេច...»។ កញ្ញាបន្ថែមទៀតថា៖«នៅផ្ទះច្បាស់ជាមិនបាន ផឹកទេ ប៉ា ម៉ាក់មិនឲ្យផឹកឡើយ»។
កញ្ញាសម្បុរស រាងធាត់បន្តិច មុល្លីកា ក៏ជាអ្នកចូលចិត្តការជួបជុំបែបអ៊ូអរផងដែ។ កញ្ញា លើកឡើងថា៖ «ខ្ញុំ និងមិត្តភ័ក្តិ តែងណាត់គ្នាទៅហាងខាងក្រៅជាងនៅផ្ទះ។ ទៅទីនោះបានជជែកគ្នា មើលគេមើល ឯងសប្បាយម្យ៉ាង។ មុល្លីកា បន្ថែមទៀតថា៖«បានចេញទៅក្រៅ បានតែងខ្លួនស្អាត បានអួតរាងខ្លះ ដែរ...»។
ពេលសប្បាយក៏ផឹក ពេលពិបានចិត្តក៏ផឹក តែផឹកតិចៗ នេះជាការលើកឡើងរបស់កញ្ញា សុផានី។ សុផានី ជាមនុស្សរួសរាយ ចូលចិត្តនិយាយបែបកំប្លែង កញ្ញានិយាយថា៖ «ជួបគ្នានៅផ្ទះមិនសប្បាយ ទេ មិនបាននិយាយលឺៗ តែពេលបានជួនគ្នាខាងក្រៅវិញ ជជែកគ្នាសឹងតែ ផ្អើលហាង...គ្មានខ្វល់អីទេ »។
ចំណែកឯកញ្ញា លក្ខិណា ជាបុគ្គលិកធនាគាវិញ ក៏ជាអ្នកចូលចិត្តបរិយាកាសខាងក្រៅផងដែរ។ កញ្ញា វ័យ២៥ឆ្នាំរូបនេះ លើកឡើងថា៖«ខ្ញុំចូលចិត្តហាងណាដែលមានបរិយាកាសល្អ មានភាពស្ងប់ស្ងាត់ ពួកយើងជជែកការងារបណ្តើរ ញ៉ាំបណ្តើរ មានអារម្មណ៍ល្អណាស់»។
ដោយឡែកតែក្រុមនារីៗកាលីបមួយចំនួនវិញ ពួកគេចូលចិត្តបង្ហាញភាពទាក់ទាញតាមសាធារណៈ ពេលខ្លះនៅតាមសួនច្បារ ពួកគេបើកចំហរទ្វារថយន្តទំនើបរបស់ខ្លួន ចាក់ភ្លេង ញាក់កន្ត្រាក់អារម្មណ៍ កាន់ដងស្រា ម្នាក់មួយៗ ផឹកបណ្តើរ ច្រៀងរាំបណ្តើរមិនខ្វល់ពីអ្នកនៅជុំវិញខ្លួនឡើង។
ទោះបីការនិយមជួបជុំគ្នានៅហាងផឹកស៊ី អាចជួយបង្កើតភាពសប្បាយរីករាយ និងជាកន្លែងផ្លាស់ប្តូរ បរិយាកាសក៏ពិតមែន ប៉ុន្តែវាមិនមែនជារឿងសាមញ្ញឡើយ ដែលនារីខ្មែរចូលចិត្តអង្គុយជជែកគ្នាសើច ក្អាកក្អាយនៅពីមុខដបស្រារនោះ៕
© រក្សាសិទ្ធិដោយ thmeythmey.com