COVID-19
អន្តរជាតិ
COVID-19៖ ម៉ាឡេស៊ីត្រៀមប្រើកម្លាំងយោធា ដើម្បីចាប់បង្ខំប្រជាជនឲ្យគោរពបទបញ្ជាបិទប្រទេស
អាគារភ្លោះ Petronas, រូបភាព៖ Reuters
×![]()
ដោយ: ធៀន ភារិន្ទ
រដ្ឋមន្ត្រីការពារជាតិមាឡេស៊ី លោកIsmail Sabri Yaakob នាថ្ងៃទី២០ ខែមីនា បានអះអាងថា ម៉ាឡេស៊ី នឹងប្រើប្រាស់កម្លាំងយោធា ដើម្បីចាំបង្ខំឲ្យប្រជាជនស្នាក់នៅក្នុងផ្ទះ និងមិនឲ្យដើរចេញផ្តេសផ្តាស។ ការអះអាងរបស់លោករដ្ឋមន្ត្រីបែបនេះ ធ្វើឡើងបន្ទាប់ពីករណីជំងឹរលាកសួត ដែលបង្កដោយកូរ៉ូណាវីរុស (COVID-19) បានឡើយយ៉ាងគំហុក។ 
តាំងពីថ្ងៃទី១៨ ខែមីនាមកម្លេះ បទបញ្ជាបិទប្រទេសម៉ាឡេស៊ីទាំងមូល បានចូលជាធរមាន។ ក្រៅពីនេះ ម៉ាឡេស៊ី បានបិទសាលារៀន ផ្សារលក់ទំនិញ និងកន្លែងផ្សេងទៀត ដើម្បីទប់ស្កាត់ការរាតត្បាតនៃ COVID-19។ ជាពិសេស លោកនាយករដ្ឋមន្ត្រីម៉ាឡេស៊ី ថែមទាំងអំពាវនាវឲ្យប្រជាជនម៉ាឡេស៊ី ស្នាក់នៅផ្ទះ កុំដើរផ្តេសផ្តាស ប្រយ័ត្នឆ្លង COVID-19។ យ៉ាងណាក៏ដោយ ប្រជាជនម៉ាឡេស៊ី មួយចំនួន នៅតែបន្តទៅញាំអាហារនៅភោជនីយដ្ឋាន ឬសួនឧទ្យានជាដើម។
ដើម្បីដោះស្រាយបញ្ហាប្រជាជននៅតែចេញមកក្រៅបែបនេះ លោករដ្ឋមន្ត្រីការពារជាតិម៉ាឡេស៊ី លោកIsmail Sabri Yaakob បានលើកឡើងថា ម៉ាឡេស៊ី នឹងរាយកម្លាំងយោធា ចាប់ពីថ្ងៃទី២២ ខែមីនាតទៅ ដើម្បី អនុវត្តបទបញ្ជារបស់រដ្ឋាភិបាលម៉ាឡេស៊ី។ ថ្លែងក្នុងសន្និសីទសារព័ត៌មានមួយ លោករដ្ឋមន្ត្រីបានបន្តថា រដ្ឋាភិបាលម៉ាឡេស៊ី ជឿជាក់លើយោធា ក្នុងការប្រឈមបញ្ហានេះ។
បើតាមលោករដ្ឋមន្ត្រី បានពន្យល់ថា ការចាប់ខ្លួន អាចធ្វើឡើងលើប្រជាពលរដ្ឋម៉ាឡេស៊ីមួយចំនួន ប្រសិនបើអ្នកទាំងនោះ នៅតែមិនអនុវត្តបទបញ្ជារបស់រដ្ឋាភិបាល។ កន្លងមកលោករដ្ឋមន្ត្រី ក៏បានព្រមានប្រើប្រាស់យោធាដែរ ដើម្បីដោះស្រាយបញ្ហាប្រជាជន នៅតែបន្តដើរតាមផ្លូវ ដោយមិនខ្លាចឆ្លងCOVID-19 ខណៈប្រទេសអាស៊ីអាគ្នេយ៍មួយនេះ មានករណីសរុប៩០០ករណី។
សូមបញ្ជាក់ថា ក្នុងចំណោមបណ្តាសមាជិកអាស៊ានទាំងអស់ ម៉ាឡេស៊ី មានករណីCOVID-19 ច្រើនជាងគេ ខណៈសមាជិកផ្សេងទៀត បន្តរកឃើញអ្នកផ្ទុកកូរ៉ូណាវីរុសជាបន្តបន្ទាប់។ តួលេខសរុបម៉ាឡេស៊ី បានកើនដល់ ៩០០ករណី អ្នកស្លាប់២ករណី និងអ្នកជាសះស្បើយ ៧៥ករណី។ ភាគច្រើននៃអ្នកផ្ទុក COVID-19 គឺមានទាក់ទងទៅនឹងពិធីសាសនាឥស្លាមមួយកន្លែង នៅក្នុងទីក្រុងគូឡាឡាំពួ ម៉ាឡេស៊ី ដែលមានមនុស្សចូលរួមចំនួន ១៦០០០នាក់៕
Tag:
ម៉ាឡេស៊ី
COVID-19
© រក្សាសិទ្ធិដោយ thmeythmey.com
