បទយកការណ៍ / បទសម្ភាសន៍
ជាតិ
ដេវីដ ចោលអាហារូបករណ៍ក្នុងស្រុកដើម្បីឈោងឱកាសបន្តការសិក្សានៅសិង្ហបុរី
× ជឹម ដេវីដ បានជាប់និទ្ទេស B ពីការប្រឡងសញ្ញាបត្រមធ្យមសិក្សាទុតិយភូមិកាលពីឆ្នាំ២០១២ ដូច្នេះ វាមិនពិបាកនោះទេសម្រាប់យុវសិស្សដែលមកពីខេត្តពោធិ៍សាត់រូបនេះក្នុងទទួលបានឱកាសបន្តការសិក្សានៅមហាវិទ្យាល័យក្នុងរាជធានីភ្នំពេញ។
ក្នុងនាមជាសិស្សពូកែម្នាក់នៅក្នុងវិទ្យាល័យ សមត្ថភាពរបស់ ដេវីដ បានស្តែងឲ្យឃើញភ្លាមៗ ដោយរូបគេបានឈ្នះអាហារូបករណ៍នៅសាកលវិទ្យាល័យចំនួនពីរក្នុងរាជធានីភ្នំពេញ គឺផ្នែកគ្រប់គ្រងប្រព័ន្ធផ្សព្វផ្សាយ នៅសាកលវិទ្យាល័យភូមិន្ទភ្នំពេញ និងផ្នែកអក្សរសាស្ត្រអង់គ្លេសនៅសកលវិទ្យាល័យកម្ពុជា។
ទោះបីជាយ៉ាងណាក៏ដោយ កូនប្រុសពៅក្នុងគ្រួសារអ្នកលក់បាយដែលមានបងប្អូន៥នាក់រូបនេះ ហាក់ដូចជាយល់ឃើញថា គុណភាពអប់រំនៅក្នុងស្រុកហាក់ដូចជាមានលក្ខណៈតូចចង្អៀតនៅឡើយ ដូច្នេះគេបានសម្រេចបោះបង់ឱកាសមាសនៅក្នុងស្រុក ហើយសំឡឹងទៅចាប់ឱកាសពេជ្រនៅសិង្ហបុរី បើទោះបីជារូបគេត្រូវរៀនពីកម្រិតទាបឡើងវិញក៏ដោយ។
ហេតុអ្វីបានជា ដេវីដ ធ្វើការសម្រេចចិត្តយ៉ាងដូច្នេះ? យុវជនមាឌតូចល្អិត មហិច្ឆតាធំរូបនេះ បានអះអាងថា តាមពិតទៅរូបគេបានឈ្នះអាហារូបករណ៍ថ្នាក់វិទ្យាល័យអន្តរជាតិដើម្បីទៅសិក្សានៅក្រៅប្រទេសចាប់តាំងពីគេមិនទាន់ប្រឡងបាក់ឌុបម្ល៉េះ ដោយរូបគេគ្រាន់តែរង់ចាំលទ្ធផលនៃការផ្លាស់ប្តូរពីកូស្តារីកា មកសិង្ហបុរីវិញប៉ុណ្ណោះ។
ទីបំផុត ជឹម ដេវីដ ទទួលបាននូវការឱកាសបន្តការសិក្សានៅប្រទេសសិង្ហបុរី ដោយបច្ចុប្បន្នគេកំពុងបន្តការសិក្សាថ្នាក់ទី១១នៅឯវិទ្យាល័យលំដាប់ពិភពលោក ឈ្មោះ «United Wolrd College South East Asia» ដែលជាគ្រឹះស្ថានអប់រំថ្នាក់មធ្យមសិក្សាដ៏ល្បីមួយ។
ដេវីដ ដែលមានក្តីសុបិនក្នុងការសិក្សាបន្តថ្នាក់បរិញ្ញាបត្រនៅសហរដ្ឋអាមេរិកនោះ បានរៀបរាប់ប្រាប់តាមប្រព័ន្ធ Skype ពីប្រទេសសិង្ហបុរីមកថា៖ «តាំងពីខ្ញុំនៅតូចមក បំណងរបស់ខ្ញុំធំបំផុតគឺខ្ញុំចង់រៀននៅស្រុកគេ អីចឹងខ្ញុំតែងតែខំរៀន តាំងចិត្តដើម្បីសម្រេចបំណងប្រាថ្នាខ្លួនឯង»។
ដេវីដ បានអះអាងថា ដោយសារតែមានការជ្រោមជ្រែងយ៉ាងពេញទំហឹងពីក្រុមគ្រួសារឱពុកម្តាយទើបធ្វើឱ្យដេវីដមានការប្តេជ្ញាចិត្តយ៉ាងអស់ពីកម្លាំងកាយចិត្តខិតខំរៀន និងទទួលបានលទ្ធផលដ៏ល្អបែបនេះ។ គេបានណែនាំដល់យុវជនដទៃទៀតឲ្យមានភាពក្លាហានក្នុងការប្រជែងយកអាហារូបករណ៍នានានៅក្រៅប្រទេសផងដែរ។
មានរាងតូចច្រឡឹងប្រកបដោយទឹកមុខញញឹមស្រស់ស្រាយ កញ្ញាជឹម ឆាយលីន ដែលត្រូវជាបងស្រីទី៤របស់ដេវីដបានរៀបរាប់សរសើរប្អូនប្រុសរបស់ខ្លួនមិនដាច់ពីមាត់ថា៖ «កាលរៀននៅវិទ្យាល័យ ដេវីដគឺជាក្មេងល្អដែលខិតខំប្រឹងរៀនសូត្រ មិនសូវដើរលេង មិនចេះអួតអាង និងចេះចែករំលែកអ្វីដែលខ្លួនចេះទៅសិស្សដទៃ។ ខ្ញុំមានការត្រេកអរ និងមានមោទនភាពណាស់ចំពោះប្អូនប្រុសខ្ញុំ»៕
ដោយៈ រិន សុក្រិត្យ
© រក្សាសិទ្ធិដោយ thmeythmey.com