នៅថ្ងៃទី១៥ ខែមេសានេះ ពលរដ្ឋកូរ៉េខាងត្បូងនាំគ្នាសម្រុកទៅកាន់មណ្ឌលបោះឆ្នោត ដោយគេរំពឹងថានឹងមានអ្នកមកបោះឆ្នោតច្រើន បើទោះបីជាមានការគំរាមកំហែងដោយសារCOVID-19ក៏ដោយ។ នៅតាមមណ្ឌលបោះឆ្នោត គេឃើញមានកន្លែងវាស់កម្តៅ កន្លែងបោះឆ្នោតដាច់ដោយឡែកសម្រាប់អ្នកមានជំងឺផ្តាសាយ និងអ្នកធ្វើចត្តាឡីស័ក។
ការបោះឆ្នោតសភា នៅកូរ៉េខាងត្បូងនាថ្ងៃទី១៥ ខែមេសានេះចាប់ផ្តើមនៅម៉ោង៦ព្រឹក ដោយអ្នកមានសិទ្ធបោះឆ្នោតមានចំនួន៤៣,៩លាននាក់។ ប្រទេសកូរ៉េខាងត្បូង ជាប្រទេសដំបូងដែលមានករណីផ្ទុះជំងឺCOVID-19ទ្រង់ទ្រាយធំ ដែលរៀបចំការបោះឆ្នោតនៅទូទាំងប្រទេស។ ប៉ុន្តែគេឃើញមានវិធានការសុវត្ថិភាពជាច្រើននៅមណ្ឌលបោះឆ្នោត ក៏ដូចជាកន្លែងធ្វើយុទ្ធនាការផងដែរ។
វិធានការសុវត្ថិភាពនេះរួមមាន ការតម្រូវឲ្យពលរដ្ឋពាក់ម៉ាស់ និងវាស់កម្តៅនៅមណ្ឌលបោះឆ្នោត។ ចំណែកឯអ្នក ដែលមានជំងឺផ្តាសាយត្រូវបានឲ្យទៅគូសសន្លឹកឆ្នោតនៅបន្ទប់ផ្សេង ហើយសន្លឹកឆ្នោតនោះនឹងត្រូវយកមកសម្លាប់មេរោគ។ បន្ថែមពីនេះ អ្នកទៅបោះឆ្នោតត្រូវបានតម្រូវឲ្យពាក់ស្រោមដៃផ្លាស្ទីក បន្ទាប់ពីសម្អាតដៃរួច និងរក្សាចំងាយពីគ្នាយ៉ាងហោចណាស់មួយមែត្រ។
យោងតាមទៅភ្នាក់ងារសារព័ត៍មាន AFP លោក Kwon Soon-il ប្រធានគណកម្មការបោះឆ្នោតកូរ៉េខាងត្បូងកាលពីថ្ងៃទី១៤ ខែមេសាបានថ្លែងថា៖ «យើងកំពុងរៀបចំការបោះឆ្នោតក្នុងពេលវេលាដ៏លំបាក អំឡុងពេលគម្លាតសុវត្ថិភាពនិងការធ្លាក់ចុះសកម្មភាពសេដ្ឋកិច្ច»។ លោកបន្ថែមទៀតថា៖« សូមទៅកាន់បោះឆ្នោតនៅថ្ងៃស្អែក និងបង្ហាញថាអ្នកជាម្ចាស់ប្រទេស»។
អ្នកដែលធ្វើស្វ័យចត្តាឡីស័ក ត្រូវបានអនុញ្ញាតរយៈពេល១០០នាទីឲ្យចេញទៅបោះឆ្នោត កំឡុងពេលមុនមណ្ឌលបោះឆ្នោតបិទនៅម៉ោង៦ល្ងាច ដរាបណាពួកគេមិនចេញអាការៈធ្ងន់ធ្ងរ។ បន្ថែមពីនេះ តាំងពីចុងសប្តាហ៍មក មណ្ឌលបោះឆ្នោតពិសេសត្រូវបានរៀបចំនៅកន្លែងចត្តាឡីស័កចំនួន៨ ដើម្បីឲ្យពលរដ្ឋបោះឆ្នោតបាន។ ទោះជាយ៉ាងណាក៏ដោយ អ្នកដែលសម្រាកនៅផ្ទះ និងមានចេញរោគសញ្ញានឹងមានអាចអនុវត្តសិទ្ធបោះឆ្នោតឡើយ។
បន្ថែមពីនេះ យុទ្ធនាការឃោសនាបោះឆ្នោតក៏រងផលប៉ះពាល់ផងដែរ។ ផ្ទុយពីការចាប់ដៃ និងចែកនាមបណ្ណដូចទម្លាប់ បេក្ខជនរក្សាចម្ងាយពីពលរដ្ឋ ដោយប្តូរមកឱនគោរពវិញ។ ចំណែកឯ បេក្ខជនមួយចំនួន បង្វែរមកប្រើបណ្តាញសង្គមដូចជា YouTube និង Instagram ដើម្បីទាក់ទងជាមួយអ្នកបោះឆ្នោត ខណៈបេក្ខជនមួយចំនួនទៀតស្ម័គ្រចិត្តជួយសម្លាប់មេរោគក្នុងមណ្ឌលរបស់ខ្លួន។
ការស្ទង់មតិមួយកាលពីសប្តាហ៍មុន ធ្វើឡើងដោយGallup Korea បង្ហាញថាប្រជាជនកូរ៉េ២៧ភាគរយស្ទាក់ស្ទើរទៅបោះឆ្នោត។ ខណៈ៧២ភាគរយ មិនបានបង្ហាញការបារម្ភអ្វីឡើយ មិនតែប៉ុណ្ណោះគេរំពឹងថានឹងមានអ្នកទៅបោះឆ្នោតច្រើន ដោយពីចុងសប្តាហ៍មានមនុស្ស១១,៧លាននាក់ ក្នុងនោះរួមមានលោក មូន ចេអ៊ីន ប្រធានាធិបតីកូរ៉េខាងត្បូង ទៅបោះឆ្នោតជាមុន។
លោក មូន ចេអ៊ីន ដែលជាប្រធានាធិបតី នឹងមិនប៉ះពាល់ដោយសារការបោះឆ្នោតនេះទេ ដោយសារលោកកាន់តំណែងតាមរយៈការបោះឆ្នោតដោយផ្ទាល់ពីប្រជាពលរដ្ឋ។ ប៉ុន្តែគណបក្សប្រជាធិបតេយ្យរបស់លោកដែលមានសំឡេងច្រើនភាគក្នុងសភា នៅតែត្រូវការគាំទ្រពីខាងសំឡេងភាគតិចដើម្បីអាចអនុម័តច្បាប់បាន។
ការស្ទង់មតិ កាលពីសប្តាហ៍មុនបង្ហាញថា គណបក្សប្រជាធិបតេយ្យរបស់លោក Moon Jae-inអាចនឹងទទួលបានសម្លេង៤៤ភាគរយ នាំមុខគណបក្សប្រជែង United Future Party ដែលមាន២៣ភាគរយ។ រីឯប្រជាប្រិយភាពរបស់លោកប្រធានាធិបតី មូន ចេអ៊ីន កើនពី ៤១ភាគរយនៅចុងខែមករា មក៥៧ភាគរយនៅសប្តាហ៍មុន។ ជាសរុប កូរ៉េខាងត្បូងមានអ្នកឆ្លងចំនួន ១១,០០០ ករណី និងស្លាប់ចំនួន២២២ ករណី ហើយក្នុងរយៈពេល៦ថ្ងៃចុងក្រោយនេះ ការឆ្លងថ្មីមានតិចជា៤០ករណី ក្នុងមួយថ្ងៃ៕