COVID-19
អន្តរជាតិ
COVID-19៖ចិនឲ្យ៧០០ដុល្លារសម្រាប់ជួយចាប់អ្នកឆ្លងព្រំដែនខុសច្បាប់ពីរុស្ស៊ី
× ខេត្តមួយនៅភាគឦសានប្រទេសចិន ប្រកាសផ្ដល់ប្រាក់រង្វាន់រហូតដល់៧០០ដុល្លារសម្រាប់ការជួយចាប់មនុស្សដែលឆ្លងព្រំដែនខុសច្បាប់ពីរុស្ស៊ី។ សេចក្តីប្រកាសនេះ ធ្វើឡើងក្រោយករណី COVID-19 នាំចូលភាគច្រើនក្នុងប្រទេសចិន គឺមកពីប្រទេសរុស្ស៊ី។
ប៉ុន្មានសប្តាហ៍ក្រោយក្រុងប៉េកាំង បានប្រកាសហាមជនបរទេសចូលទឹកដីចិន និងកាត់ផ្ដាច់ជើងហោះហើរអន្តរជាតិ ក្នុងគោលដៅបង្ការការងើបឡើងវិញនៃវិបត្តិ COVID-19 ប្រទេសចិននៅតែជួបប្រទះការលំបាកក្នុងការរាំងខ្ទប់ករណីនាំចូលដែលបន្តហក់ឡើង។ បើតាមរបាយការណ៍របស់រដ្ឋាភិបាលចិន ករណីឆ្លង COVID-19 ថ្មី ភាគច្រើន គឺជាជនជាតិចិនដែលត្រលប់មកស្រុកកំណើតពួកគេ។
តំបន់រងគ្រោះថ្មីដោយសារCOVID-19 កើតឡើងក្នុងខេត្ត Heilongjiang ដែលកាលពីអង្គារ ១៤ ខែមេសា បានរាយការណ៍ករណីឆ្លងនាំចូលថ្មីពីប្រទេសរុស្ស៊ី ចំនួន ៧៩ករណី។ តួលេខថ្មីនេះ ធ្វើឲ្យករណីនាំចូលសរុបឡើងដល់៣២៦ករណីហើយ។ ករណីឆ្លងថ្មីមួយចំនួន គឺជាអ្នកជំងឺ COVID-19 ដែលពុំមានចេញរោគសញ្ញា។
អាជ្ញាធរខេត្តដែលមានព្រំដែនជាមួយរុស្ស៊ីនេះ នៅថ្ងៃ១៣ ខែមេសា បានប្រកាសថា មនុស្សដែលរាយការណ៍ពីការឆ្លងព្រំដែនដោយខុសច្បាប់ នឹងទទួលប្រាក់រង្វាន់ ៤២៥ ដុល្លារ។ ក្នុងសេចក្តីថ្លែងការណ៍ អាជ្ញាធរខេត្ត Heilongjiang បញ្ជាក់ទៀតថា ប្រសិនបើប្រជាជនចាប់បាន និងប្រគល់ជនល្មើសមកឲ្យសមត្ថកិច្ច ប្រាក់លើកទឹកចិត្ត ៧០០ដុល្លារ នឹងផ្ដល់ឲ្យភ្លាមៗ។ បើតាមទីភ្នាក់ងារព័ត៌មាន AFP អាជ្ញាធរខេត្តនេះ សង្កត់ធ្ងន់ថា នេះគឺជាកិច្ចការចាំបាច់សម្រាប់បង្ការនិងគ្រប់គ្រងប្រឆាំងករណី COVID-19 នាំចូលក្នុងខេត្ត Heilongjiang ។
រុស្ស៊ី កាលពីថ្ងៃចន្ទ បានរាយការណ៍ករណីឆ្លងថ្មីជាង២៥០០ករណី ដែលហក់ឡើងខ្ពស់បំផុតក្នុងពេល២៤ម៉ោង ហើយប្រធានាធិបតីរុស្ស៊ី វ្ល៉ាឌីមៀ ពូទិន បានព្រមានមន្ត្រីឲ្យត្រៀមលក្ខណៈសម្រាប់សេណារីយ៉ូអាក្រក់ខ្លាំងបំផុត។
រដ្ឋាភិបាលចិន បានបិទព្រំដែនជាមួយរុស្ស៊ីនៅត្រង់ទីក្រុង Suifenhe នៃខេត្ត Heilongjiang ចាប់តាំងពីថ្ងៃ៧ មេសា ក្រោយពីករណីនាំចូលភាគច្រើនបានរកឃើញនៅក្នុងទីក្រុងដែលមានប្រជាជនជាង៧ម៉ឺននាក់នេះ។
អ្នកនាំពាក្យក្រសួងការបរទេសចិន Zhao Lijian កាលពីថ្ងៃ១៤ ខែមេសា បានទទូចឲ្យអាជ្ញាធរតំបន់ក្នុងប្រទេសចិន និងរុស្ស៊ី ចាត់ចំណាត់ការចាំបាច់ដើម្បីបង្ការ និងបញ្ឈប់ការឆ្លងព្រំដែនខុសច្បាប់រវាងប្រទេសទាំងពីរ។ លោក Zhoa ប៉ាន់ស្មានថា ប្រជាជនចិនប្រមាណ១០ម៉ឺននាក់កំពុងស្នាក់នៅប្រទេសរុស្ស៊ី៕
Tag:
រុស្ស៊ី
ចិន
COVID-19
© រក្សាសិទ្ធិដោយ thmeythmey.com