ជាតិ
សង្រ្កាន្តឆ្នាំថ្មី
×![]()
ដោយ: ថ្មីៗ
សៀវភៅ «មហាសង្ក្រាន្តឆ្នាំជូត ទោស័ក» ដែលចងក្រងដោយ លោក អ៊ឹម បុរិន្ទ សមាជិកគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ បានសរសេរចងក្រងលម្អិតពីទំនាយជោគជតារាសីប្រចាំឆ្នាំជូត ទោស័ក។ សារព័ត៌មានថ្មីៗ សូមដកស្រង់សង្ខេបក្បួនតម្រានេះ ដោយលោក អ៊ឹម បុរិន្ទ ដកស្រង់ចេញពីសៀវភៅ «តម្រាព្យាករណ៍ជោគរាសី» បោះពុម្ពឆ្នាំ២០០៣ ដែលជាស្នាដៃរបស់លោកផ្ទាល់។ 
ឆ្នាំជូត៖
ឆ្នាំនេះ បុរសឆ្នាំជូតមិនសូវស្រួលបួលទេ ដោយត្រូវជួបឧបសគ្គញឹកញាប់ ប៉ុន្តែការតាំងចិត្តពុះពារ និងការប្រឹងរំងាប់ចិត្តនឹងធ្វើឲ្យអ្នកជោគជ័យគ្រាន់បើឡើងវិញ ដូច្នេះត្រូវឧស្សាហ៍ និងស្វាហាប់ក្នុងការបំពេញការងារ។ ប៉ុន្តែស្ត្រីឯណោះវិញ វាសនាប្រសើរជាងបុរស។ ទោះបីជាយ៉ាងណាក៏ដោយ ហោរាគន់គូរឃើញថា មុននឹងបានលាភផង ស្ត្រីឆ្នាំជូត ត្រូវបាត់បង់ទ្រព្យជាមុន តែបើផុតឧបសគ្គនេះហើយ មុខតំណែងថ្មី និងជោគលាភពីចម្ងាយនឹងចូលមកដល់។
ឆ្នាំឆ្លូវ៖
បុរសឆ្នាំឆ្លូវ មានជោគជាតារាសី ដូចស្ត្រីឆ្នាំជូតបេះបិទ។ បើរួចផុតពីការប៉ុនប៉ងនៃអំពើចោរកម្មផ្សេងៗ បុរសឆ្នាំនេះ នឹងបានលាភធំ តំណែងខុសត្រូវខ្ពស់ ប៉ុន្តែត្រូវរក្សាកាយឲ្យល្អ ដើម្បីគេចផុតពីជំងឺផ្សេងៗ។ រីឯស្ត្រីវិញ មានស្ថានភាពដូចជាបុរសឆ្នាំជូត ដែលត្រូវជួបឧបសគ្គញឹកញាប់ ដោយស្ត្រីឆ្នាំឆ្លូវនេះ ត្រូវតាំងចិត្តឧស្សាហ៍ និងស្វាហាប់ឲ្យមែនទែន ទើបទទួលបានជោគជ័យគ្រាន់បើឡើងវិញ។
ឆ្នាំខាល៖
បុរសឆ្នាំខាលអើយ ក្បួនហោរាសាស្ត្រទស្សន៍ទាយឃើញថា ឆ្នាំនេះ អ្នកអាចឃ្លាតពីកន្លែងធ្វើការ ឬក៏ត្រូវផ្លាស់ប្តូរទីលំនៅ ហើយការរកស៊ីជួញដូរ ហាក់ដូចជាតឹងបន្តិច។ រីឯស្ត្រីវិញ ក៏ដូចជាមិនខុសគ្នាប៉ុន្មាននោះដែរ តាមក្បួន លោក អ៊ឹម បុរិន្ទ មិន Recommend លោកស្រី អ្នកនាង កញ្ញា ឲ្យបើកហាងលក់ដូរឥវ៉ាន់ថ្មី ឬពឹងឲ្យគេជួយនោះឡើយ។ ប៉ុន្តែដើម្បីគេចផុតពីគ្រោះកាចផ្សេងៗ មានតែអំពើល្អទេ ដែលអាចស្រោចស្រង់បាន។
ឆ្នាំថោះ៖
ពិតជាល្អមែនទែន សម្រាប់បុរសឆ្នាំថោះ កំណល់ រង្វាន់ នឹងត្រូវគេយកឲ្យដល់ទីកន្លែង។ ទោះបីជាជោគរាសីល្អជាទីបំផុតក្តី ប៉ុន្តែម្ចាស់សៀវភៅ មហាសង្ក្រាន្តក្រើនរំលឹកថា ត្រូវប្រយ័ត្នជានិច្ច ដោយមិនត្រូវផ្តេកផ្តួលនឹងការឈឺឆ្អាលពីអ្នកដទៃពេកនោះទេ។ រីឯស្ត្រីវិញ បែរជាមានកង្វល់ច្រើនអនេក ការបែកមិត្តភក្តិ និងសាច់ញាតិជាទីស្រឡាញ់ តែលោកស្រី អ្នកនាង កញ្ញា កុំភ័យពេក ព្រោះនឹងមានគេជួយឈឺឆ្អាលច្រើន។
ឆ្នាំរោង៖
បើកូវីដ-១៩ មិនវាយលុកទេនោះ ឆ្នាំនេះ លោក-លោកប្រុសដែលនៅលីវអាចរៀបការបាន។ លោក-អ្នកត្រូវតាំងចិត្តឲ្យរឹងមាំកុំខ្លាចក្រុមមនុស្សឫស្សា។ តែប្រយ័ត្នផងណា ក្បួនតម្រាគន់គូរឃើញថា បុរសឆ្នាំរោងមិនគួរលីសែងរែកពុន ឬដាក់របស់ធ្ងន់ឡើយ។ រីឯស្ត្រីវិញ ទោះសត្រូវកាចប៉ុណ្ណា ផលលាភនៅតែស្ថិតក្នុងកណ្តាប់ដៃអ្នក។ មិនចាញ់បុរសឡើយ ស្ត្រីឆ្នាំរោង ក៏ស្ថិតក្នុងឆ្នាំល្អផ្តាច់សម្រាប់ពិធីអាពាហ៍ពិពាហ៍ផងដែរ។
ឆ្នាំម្សាញ់៖
ជោគជតារាសីរបស់បុរសឆ្នាំម្សាញ់ មិនជាល្អឡើយ ដោយលោកអ្នកត្រូវពិនិត្យពិច្ច័យឲ្យបានល្អិតល្អន់ ហើយកុំសង្ឃឹមពេកថា បានកម្រៃផលពីអ្នកធ្លាប់រាប់រក ឬអ្នកធ្វើការរួម។ ភាពអង់អាចក្លាហាននឹងជួយឲ្យអ្នកកាត់បន្ថយវិបត្តិទាំងនេះ។ ចំពោះស្ត្រីវិញ ជោគលាភនឹងមានដល់អ្នកហើយ ដោយមិត្តភក្តិ ឬនាយចៅហ្វាយចាំទំនុកបម្រុង។ តែសូមកុំបេះបួយនាំរឿងពីអ្នកនេះទៅអ្នកនោះឲ្យសោះ ដែលអាចបណ្តាលឲ្យបែកបាក់មេត្រីភាព។
ឆ្នាំមមី៖
ទោះមានទំនាស់បន្តិចបន្តួចជាមួយមេបា តែបុរសឆ្នាំមមីនឹងសម្រេចផលបំណងលើគម្រោងអាពាហ៍ពិពាហ៍។ បើការងារមុខតំណែងវិញ កាន់តែឡើងតួនាទី តែត្រូវប្រយ័ត្នអំពើចោរកម្ម អគ្គិភ័យ និងជំងឺផ្តាសាយ។ រីឯស្ត្រីឆ្នាំមមី វិញ ចូរគប្បីកុំបញ្ចេញឈ្មោះបោះសំឡេងពេក ហើយការលេងសើចញយៗ អាចភ្លាត់ការ និងខូចប្រយោជន៍។ ទោះជតារាសីមិនល្អ តែលោកស្រី អ្នកនាង កញ្ញា មានមិត្តជិតស្និទ្ធជួយឈឺឆ្អាល។
ឆ្នាំមមែ៖
បុរសឆ្នាំមមែ ក៏ទំនាយដូចស្ត្រីឆ្នាំមមីដែរ ពោលគឺមិនសូវល្អដូចគ្នា។ បើអ្នកចង់ធ្វើអ្វី ត្រូវពិចារណាមុខក្រោយឲ្យបានល្អិតល្អន់មែនទែន ហើយត្រូវបំពេញខ្លួនឲ្យគេឃើញថា អ្នកជាមនុស្សមានរបៀបរៀបរយ ទើបអាចបន្ធូរបន្ថយគ្រោះបានខ្លះ ហើយនឹងមានគេជួយ។ រីឯស្ត្រីវិញ មានយីអ៊ុនឡើងដូចបុរសឆ្នាំមមី បើប៉ងរៀបការនឹងបានសម្រេច ទោះមានទំនាស់តិចតួចជាមួយមេបា តែត្រូវប្រយ័ត្នចោរកម្ម អគ្គិភ័យ និងជំងឺផ្តាសាយដូចគ្នា។
ឆ្នាំវក៖
បុរសឆ្នាំវក លោកអ្នកអាចអានត្រង់រាសីស្ត្រីឆ្នាំម្សាញ់បាន ព្រោះការទស្សន៍ទាយដូចគ្នា១០០ភាគរយ។ លោកអ្នកមានមិត្តភក្តិ និងចៅហ្វាយចាំទំនុកបម្រុង ប៉ុន្តែត្រូវធ្វើអ្វីដោយច្បាស់លាស់ កុំនាំរឿងនិន្ទា ទើបមេត្រីភាពមិនបែបបាក់។ ងាកទៅស្ត្រីឆ្នាំវក វិញ គឺមានរាសីដូចបុរសឆ្នាំម្សាញ់ ការសេពគប់ផ្សេងៗដែលមិនត្រឹមត្រូវ នឹងនាំរឿងដល់គ្រួសារ ក៏ដូចជាការងារប្រចាំជីវិត។ ភាពអង់អាចនឹងនាំឲ្យអ្នកប្រាស់ចាកវិបត្តទាំងនេះទៅខ្លះ។
ឆ្នាំរកា៖
បុរសឆ្នាំរកា នឹងសម្រេចលាភផលដូចទំនាយសម្រាប់ស្ត្រីឆ្នាំរោង ទោះមានសត្រូវកាចប៉ុនប៉ងប្រទូស្តរាយក៏ដោយ។ សម្រាប់អ្នកនៅលីវ ឆ្នាំនេះជាឆ្នាំល្អសម្រាប់អាពាហ៍ពិពាហ៍ ប៉ុន្តែចាំមើលកូវីដ-១៩ ព្រោះសៀវភៅ «មហាសង្ក្រាន្ត» ត្រូវបានបោះពុម្ពផ្សាយមុនជំងឺរាតត្បាត។ រីឯស្ត្រីឆ្នាំរកាវិញ ក៏ល្អដូចគ្នា សម្រាប់គម្រោងអាពាហ៍ពិពាហ៍ តែកុំជឿអ្នកបញ្ចោរលើកជើងពេក ព្រោះអ្វីៗមិនបរិសុទ្ធទាំងអស់ឡើយ។ ម្យ៉ាងទៀតបើខ្លាចថ្លោះចង្កេះ គ្រេចឆ្អឹងខ្នង សូមកុំលើករបស់ធ្ងន់។
ឆ្នាំច៖
បុរសឆ្នាំច មានទុក្ខលំបាកដូចស្ត្រីឆ្នាំថោះ កង្វល់ ការបែកបាក់ សុទ្ធតែជារឿងដែលអាចជួប។ តែលោកអ្នកនឹងមានអ្នកជួយឈឺឆ្អាល ហើយឧបសគ្គខ្លះនឹងគង់សាបរលាប។ ជួនកាលឆ្នាំនេះ អ្នកក៏ត្រូវរើផ្ទះផងដែរ ប៉ុន្តែមិនមែនជារឿងសំខាន់ឡើយ។ រីឯស្ត្រីឆ្នាំច វិញ នឹងមានសេចក្តីសម្រាន្តយ៉ាងលើសលុបដូចបុរសឆ្នាំថោះ ដោយធ្វើអ្វីៗនឹងបានសម្រេចផល។ ទោះយ៉ាងណាត្រូវប្រយ័ត្នឲ្យមែនទែនផងដែរ លើការរាប់អានមនុស្ស ពោលគឺកុំផ្តេកផ្តួលនឹងការឈឺឆ្អាលពីគេខ្លាំងពេក។
ឆ្នាំកុរ៖
ទំនាយសម្រាប់បុរសឆ្នាំកុរ ដូចស្ត្រីឆ្នាំខាល។ ឆ្នាំនេះជាឆ្នាំដែលលោកអ្នកមិនសូវរីករាយសោះឡើយ ដូច្នេះមិនគួរធ្វើដំណើរផ្លូវឆ្ងាយ ឬដំណើរបើកហាងលក់ដូរឥវ៉ាន់ ដែលអាចនាំឲ្យអ្នកខូចខាតទុន។ ប៉ុន្តែវាគ្មានអ្វីដែលអាចរារាំងការតាំងចិត្តនោះឡើយ។ រីឯស្ត្រីឆ្នាំកុរនេះវិញ វាសនាដូចបុរសឆ្នាំខាល ដោយអ្នកអាចនឿយណាយធុញទ្រាន់កន្លែងចាស់ ហើយអ្នកត្រូវប្រយ័ត្នគ្រប់ពេលវេលាដើម្បីគេចផុតរឿងសៅហ្មងក្នុងគ្រួសារ ក្រុមហ៊ុន និងជាមួយមិត្តភក្តិ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
