កម្មករដែលវិលត្រឡប់ពីស្រុកកំណើត ត្រូវស្នាក់នៅដាច់ដោយឡែករយៈពេល១៤ថ្ងៃ

COVID-19

ជាតិ

កម្មករដែលវិលត្រឡប់ពីស្រុកកំណើត ត្រូវស្នាក់នៅដាច់ដោយឡែករយៈពេល១៤ថ្ងៃ

16, Apr 2020 , 8:59 pm

រូបភាព

ដោយ: អ៊ុត រស្មី (Uth Raksmey)

ភ្នំពេញ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានសរសេរលិខិតស្នើឱ្យរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ចាត់វិធានការចត្តាឡីស័ករយៈពេល១៤ថ្ងៃ ដល់កម្មករ-កម្មការិនី ដែលវិលត្រឡប់ពីស្រុកកំណើត ដើម្បីបង្ការការចម្លងជំងឺកូវីដ-១៩ជាសហគមន៍។

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានបញ្ជាក់ក្នុងលិខិតចុះថ្ងៃទី១៥ មេសាថា កម្មករ និយោជិត ដែលវិលត្រឡប់ពីស្រុកកំណើត ត្រូវដាក់ដោយឡែកជាចំបាច់ ហើយត្រូវតាមដានសុខភាពជាប្រចាំ។

សារព័ត៌មានថ្មីៗ មិនទាន់អាចទាក់ទងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំការអត្ថាធិប្បាយបន្ថែមនៅឡើយទេ។

កន្លងមកក្រសួងការងារ ធ្លាប់បានបញ្ជាក់កាលពីថ្ងៃទី៩ មេសាថា កម្មករនិយោជិតណា ដែលឈប់សម្រាក «ដោយឯកឯង» ក្នុងអំឡុងចូលឆ្នាំខ្មែរ នឹងត្រូវដាក់ឲ្យនៅដាច់ដោយឡែករយៈពេល១៤ថ្ងៃ មុនចូលបំពេញការងារវិញ ហើយនឹងមិនទទួលបានប្រាក់ឈ្នួលក្នុងរយៈពេល១៤ថ្ងៃនេះឡើយ។ ប៉ុន្តែបើកម្មករនិយោជិតណា ឈប់សម្រាកពេលចូលឆ្នាំ ដោយមានការអនុញ្ញាតពីថៅកែ កម្មករនិយោជិតនោះ នឹងទទួលបានប្រាក់ឈ្នួល ក្នុងអំឡុងនៃការដាក់ឲ្យនៅដាច់ដោយឡែករយៈពេល១៤ថ្ងៃ។

សូមជម្រាបថា រដ្ឋាភិបាល បានសម្រេចលុបពិធីបុណ្យចូលឆ្នាំខ្មែរ នៅឆ្នាំនេះ ដោយសារតែបារម្ភខ្លាចរាលដាលនៃជំងឺកូវីដ-១៩។ រដ្ឋាភិបាល នឹងសងថ្ងៃឈប់សម្រាក៥ថ្ងៃ ដល់ស្ថាប័ននិងឯកជនវិញ នៅពេលសមស្រប៕