COVID-19
អន្តរជាតិ
×![]()
អ្នកស្រី អែនជែឡា មឺហ្គែល អធិការបតីអាល្លឺម៉ង់ បានទាមទារឲ្យចិនបង្ហាញពីតម្លាភាពតាមតែអាចធ្វើទៅបានចំពោះការផ្ទុះជំងឺរាតត្បាតសកល COVID-19 ដែលឆ្លងលើមនុស្សច្រើនជាងពីរលាននាក់។ ការទាមទារនេះ ធ្វើឡើងខណៈពេលចិន ក៏កំពុងរងសម្ពាធគ្រប់ទិសទីលើការគ្រប់គ្រង់វិបត្តិជំងឺឆ្លងនេះ។ អូស្ត្រាលី អាមេរិក និងបារាំងជាដើម សុទ្ធតែទាមទារឲ្យមានការបើកចំហពីចិន។ 
ថ្លែងទៅកាន់អ្នកសារព័ត៌មានៅថ្ងៃទី២០ ខែមេសា អ្នកស្រី អែនជែឡា មឺហ្គែល អធិការបតីអាល្លឺម៉ង់ ទាមទារចង់បានព័ត៌មានបន្ថែមពីការផ្ទុះជំងឺនៅថ្ងៃដំបូងៗ ដែលមានកំណើតនៅទីក្រុងវូហាន។ បើតាមអ្នកស្រី បើសិនជាចិនអាចមានតម្លាភាពជាងនេះ វាជារឿងប្រសើរសម្រាប់មនុស្សគ្រប់គ្នាក្នុងការដឹងពីជំងឺនេះ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
អ្នកស្រី មឺហ្គែល ជាមេដឹកនាំមួយទៀតដែលដាក់ការសង្ស័យលើចំណាត់ការរបស់ចិនក្នុងការគ្រប់គ្រងជំងឺCOVID-19 ដែលផ្ទុះឡើងនៅវូហាន មុនបន្តរាលដាលដល់ប្រទេសផ្សេង។ ប្រធានាធិបតីអាមេរិក ដូណាល់ ត្រាំ ជាអ្នកចេញខ្លាំងជាងគេក្នុងការរិះគន់លើបញ្ហនេះ។ មេដឹកនាំប្រទេសខ្លះទៀត ក៏ស្នើឲ្យចិនមានតម្លាភពដែរ។
កាលពីសប្តាហ៍កន្លងទៅ លោក អេម៉ានុយអែល ម៉ាក្រុង ប្រធានាធិបតីបារាំង បានប្រាប់កាសែត Financial Times ថា វាជារឿងឆោតល្ងង់ ដែលគេជឿថា ចិនអាចគ្រប់គ្រងជំងឺរាតតត្បាតសកលនេះបានយ៉ាងប្រសើរ។ លោកបន្ថែមបន្ថែមថា៖« វាច្បាស់ណាស់ ដែលមានរឿងជាច្រើនបានកើតឡើងដែលយើងមិនដឹង»។
ចំណែកឯ លោក Dominic Raab រដ្ឋមន្ត្រីការបរទេសនិយាយថា ចិននឹងត្រូវប្រឈមនឹង សំណួរពិបាកជាច្រើនអំពីការផ្ទុះជំងឺដែលរួមមាន តើជំងឺនេះមកពីណា និងហេតុអ្វីគេមិនបញ្ឈប់ការរាតត្បាតឲ្យបានរហ័សជាងនេះជាដើម។
ចិនត្រូវបានរិះគន់ថា មើលងាយទំហំ និងវិសាលភាពនៃការផ្ទុះជំងឺកាលពីដើមឆ្នាំ២០២០នេះ ខណៈការចោទប្រកាន់ថា វីរុសជំងឺ COVID-19 នេះធ្លាយចេញពីមន្ទីរពិសោធន៍នៅវូហាន។ នាពេលថ្មីៗនេះ ពាក្យចចាមអារ៉ាមទាក់ទងនឹងប្រភពដើមរបស់វីរុសបានលេចចេញសារជាថ្មី។ ពាក្យចចាមអារ៉ាមដែលពុំមានភស្តុតាងទាំងនោះ ចង្អុលទៅកាន់មន្ទីរពិសោធន៍វីរុសដែលមានកម្រិតសុវត្ថិភាខ្ពស់បំផុតនៅក្រុងវូហាន។
យ៉ាងណាមិញ ពាក្យចចាមអារាមខាងលើនេះ ត្រូវបានវិទ្យាស្ថានវីរុសក្រុងវូហានដែលជាប់សង្ស័យ បដិសេធយ៉ាងដាច់អហង្ការ។ វិទ្យាស្ថានេះអះអាងថា វាជារឿងដែលមិនអាចទៅរួច៕
© រក្សាសិទ្ធិដោយ thmeythmey.com
