COVID-19
អន្តរជាតិ
លោក ប្រាយុទ្ធ ប្រាប់ពលរដ្ឋអត់ធ្មត់បន្តិចទៀត ក្រោយភាពអាសន្នពន្យារពេល១ខែទៀត
លោក ប្រាយុទ្ធ ចន្ទអូចា នាយករដ្ឋមន្ត្រីថៃ (សារព័ត៌មានថៃ Khaosod ផ្សាយជាភាសាអង់គ្លេស)
×![]()
នាយករដ្ឋមន្ត្រីថៃ លោក ប្រាយុទ្ធ ចន្ទអូចា បានទទូចឲ្យពលរដ្ឋ និងម្ចាស់អាជីវកម្មមានភាពអត់ធ្មត់យូរបន្តិចទៀត ។ ការទទូចសុំពីសំណាក់ប្រមុខដឹកនាំថៃរូបនេះ ធ្វើឡើងខណៈរដ្ឋាភិបាលបានសម្រេចចិត្តពន្យារពេល «ការដាក់រដ្ឋក្នុងគ្រាអាសន្ន» រយៈពេល១ខែទៀតក្នុងគោលដៅបន្តកិច្ចប្រឹងប្រែងទប់ស្កាត់ការឆ្លងរាលដាលជំងឺ COVID-19។
«ខ្ញុំដឹងថា អ្នករាល់គ្នា រួមមាន អ្នករកចំណូលទាប ប្រជាកសិករ និងអ្នកដែលមានអាជីពឯករាជ្យ កំពុងរងទុក្ខលំបាក»។ លោកនាយករដ្ឋមន្ត្រី ប្រាយុទ្ធចន្ទអូចា លើកឡើងបែបនេះ ក្រោយជំនួបគណៈរដ្ឋមន្ត្រី ដែលអនុម័តការពន្យារពេលការដាក់រដ្ឋក្នុងគ្រាអាសន្ន កាលពីថ្ងៃទី២៨ ខែមេសា។ ត្រង់ចំណុចនេះ លោក សង្កត់ធ្ងន់ថា រដ្ឋាភិបាល នឹងជួយមើលថែពួកគេ ដោយប្រើកញ្ចប់ថវិកាដែលមាន និងក្រិត្យប្រតិបត្តិ ស្តីពីការខ្ចីបុល ដែលរដ្ឋាភិបាលនឹងបញ្ជាក់លម្អិតនាពេលក្រោយ។
តាមការចុះផ្សាយរបស់កាសែតថៃ បាងកកប៉ុស្តិ៍ មេដឹកនាំថៃវ័យ៦៦ឆ្នាំរូបនេះ លើកឡើងថា លោកស្នើសុំឲ្យម្ចាស់អាជីវកម្ម និងប្រជាពលរដ្ឋថៃ អត់ទ្រាំយូរបន្តិចទៀត ហើយលោកក៏ទទួលដឹងឮ ពីភាពលំបាកលំបិនរបស់អ្នកទាំងអស់គ្នា។ ក្នុងនាមជាប្រធានមជ្ឈមណ្ឌលគ្រប់គ្រងស្ថានការណ៍ COVID-19 ថៃ លោកឧត្តមសេនីយ៍ ប្រាយុទ្ធ ផ្តល់ការធានាថា រដ្ឋាភិបាលនឹងមើលថែឲ្យល្អបំផុត ចំពោះពលរដ្ឋដែលរងគ្រោះ ដោយសារបញ្ហាសេដ្ឋកិច្ចដើរយឺត ដែលបង្កឡើងដោយ COVID-19 ។
ទាក់ទិននឹងការពន្យារពេលដាក់រដ្ឋក្នុងគ្រាមានអាសន្ន លោក ប្រាយុទ្ធ អះអាងដូច្នេះថា៖«នៅពេលដល់វេលាសមរម្យ ក្នុងការដកហូតចំណាត់ការបិទប្រទេស ខ្ញុំនឹងផ្ដល់ដំណឹងជូនអ្នកទាំងអស់គ្នា។ កុំទាមទារច្រើនពេក។ យើងនៅតែត្រូវប្រុងប្រយ័ត្នខ្ពស់ សម្រាប់ការងើបឡើងជាថ្មីនៃការឆ្លង»។
សូមបញ្ជាក់ថា គណៈរដ្ឋមន្ត្រីថៃ កាលពីថ្ងៃទី២៨ ខែមេសា បានសម្រេចអនុម័តពន្យារពេល ការដាក់រដ្ឋក្នុងគ្រាមានអាសន្ន ដើម្បីគ្រប់គ្រងស្ថានភាព COVID-19 រយៈពេលមួយខែបន្ថែមទៀត ពោលគឺរហូតដល់ថ្ងៃទី ៣១ ខែឧសភា។ ត្រង់នេះ រដ្ឋាភិបាលថៃ រក្សាបម្រាមគោចរ និងដាក់ចេញសេចក្តីណែនាំ សម្រាប់បន្ធូរបន្ថយការបិទអាជីវកម្ម ក្នុងគោលដៅជួយសម្រួលសេដ្ឋកិច្ចប្រទេស។ ក្រិត្យបម្រាមគោចរ និងការរឹតត្បិតដទៃទៀត ដែលដាក់ចេញកាលពីថ្ងៃទី២៦ ខែមេសា នឹងអស់សុពលភាពនាថ្ងៃ៣០ ខែមេសាខាងមុខ។
គិតត្រឹមថ្ងៃទី២៩ ខែមេសា ប្រទេសថៃ មានករណីឆ្លងសរុប ២,៩៣៨ករណី ក្នុងនោះអ្នកជំងឺជាសះស្បើយមាន២,៦៥២នាក់។ អ្នកស្លាប់ដោយសារ COVID-19 សរុបមាន ៥៤នាក់ ខណៈអ្នកជំងឺធ្ងន់ធ្ងរមាន ៦១នាក់។ នេះបើតាមវេបសាយ worldometers.info ដែលតាមដានតួលេខ COVID-19 នៅទូទាំងពិភពលោក៕
Tag:
ថៃ
ប្រាយុទ្ធចន្ទអូចា
COVID-19
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
