បទយកការណ៍ / បទសម្ភាសន៍
ជាតិ
លោក ជា មុន្នី៖ សហជីពខ្ញុំឯករាជ្យ តែមិនអព្យាក្រឹតនោះទេ
× ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុន្នី ដែលត្រូវជាប្អូនប្រុសបង្កើតលោក ជា វិជ្ជា កាលពីពេលកន្លងទៅ បានអំពាវនាវឲ្យកម្មករជាសមាជិករបស់សហជីពទាំងអស់ ចូលរួមធ្វើមហាបាតុកម្មជាមួយនឹងគណបក្សសង្គ្រោះជាតិ ។ ការអំពាវនាវរបស់លោក ជា មុន្នី បែបនេះ បានធ្វើឲ្យមានការិះគន់ថា ធ្វើឲ្យប៉ះពាល់ដល់ឯករាជ្យភាពរបស់សហជីព។ តែលោក បានអះអាងថា សហជីពរបស់លោកមានឯករាជ្យពិតប្រាកដ តែមិនមែនអព្យាក្រឹតនោះទេ។
ខាងក្រោមនេះ ជាបទសម្ភាសរវាងលោក ឬទ្ធី អ្នកយកព័ត៌មានឲ្យគេហទំព័រថ្មីៗ ជាមួយលោក ជា មុន្នី នាអំឡុងពេលលោកចូលរួមធ្វើមហាបាតុកម្មលើកទី ៣ របស់គណបក្សសង្គ្រោះជាតិ។
ថ្មីៗ ៖ ស្ទើររាល់លើកឲ្យតែគណបក្សសង្គ្រោះជាតិមានសកម្មភាពអ្វីមួយ ដូចជាការធ្វើមហាបាតុកម្មនេះជាដើម លោកតែងតែអំពាវនាវឲ្យកម្មករចូលរួម តើហេតុអ្វីបានជាលោកធ្វើដូច្នេះ? លោកចង់គាំទ្របក្សប្រឆាំងឲ្យដឹកនាំប្រទេសមែនទេ?
លោក ជា មុន្នី ៖ ខ្ញុំមិនមែនទើបតែគាំទ្របក្សប្រឆាំងឥឡូវនោះទេ។ ខ្ញុំតាមលោក សម រង្ស៊ី តាំងពីលោក ចេញពីតំណែងជារដ្ឋមន្ត្រីក្រសួងសេដ្ឋកិច្ចមកម្ល៉េះ។ ក្នុងចិត្តខ្ញុំមិនដែលផ្លាស់ប្តូរនោះទេ ខ្ញុំពេញចិត្តលោក សម រង្ស៊ី តាំងពីដើមរៀងមក ។
ថ្មីៗ ៖ ចំណុចសំខាន់ត្រង់ណា ដែលលោកពេញចិត្ត លោក សម រង្ស៊ី?
លោក ជា មុន្នី ៖ គាត់ជាមនុស្សដែលស្រឡាញ់ប្រជាធិបតេយ្យ ហើយខ្ញុំក៏ស្រឡាញ់ប្រជាធិបតេយ្យដែរ ។ ម្យ៉ាងទៀត ខ្ញុំចង់ផ្លាស់ប្តូរមេដឹកនាំ ព្រោះខ្ញុំមិនចង់ឃើញពលរដ្ឋខ្ញុំក្រ ពលរដ្ឋខ្ញុំយំសោកវេទនា ដោយសារដ្ឋាភិបាលបច្ចុប្បន្ននេះនោះទេ។ ដូច្នេះខ្ញុំគាំទ្រ សម រង្ស៊ី ព្រោះគាត់ជាមនុស្សមានសមត្ថភាព។
ថ្មីៗ ៖ កន្លងមកមានមតិមួយចំនួនលើកឡើងថា បើលោកគាំទ្រម្លឹងៗហេតុអ្វីលោក មិនចូលប្រឡូកក្នុងឆាក នយោបា យតែម្ត ងទៅ ? ព្រោះគេអះអាងថា ការដែលលោកធ្វើបែបនឹងធ្វើប៉ះពាល់ដល់ឯករាជ្យភាពរបស់សហជីពលោក។
លោក ជា មុន្នី ៖ និយាយឲ្យចំទៅគណបក្សប្រជាជនកម្ពុជាតែម្តង ជាពិសេសគឺលិខិតរបស់ក្រសួងមហាផ្ទៃដែលរិះគន់ សមាគម សហជីពមួយចំនួមគាំទ្របក្សនយោបាយ។ លិខិតនេះគឺចង់សំដៅសហជីពខ្ញុំតែម្តង ។ តែខ្ញុំមិនខ្វល់ទេ វាជាសិទ្ធិរបស់ពួកគេក្នុងការរិះគន់នៅក្នុងសង្គមប្រជាធិបតេយ្យ ហើយម្យ៉ាងទៀតបេះដូងខ្ញុំស្រលាញ់ប្រទេសខ្ញុំតែប៉ុណ្ណោះ ។ ម្យ៉ាងទៀត វាជាសិទ្ធរបស់ខ្ញុំក្នុងការគាំទ្របក្សដែលខ្ញុំស្រឡាញ់ ហើយខ្ញុំក៏មិនបានបង្ខំឲ្យកម្មករធ្វើតាមខ្ញុំ ត្រូវតែគាំទ្របក្សប្រឆាំងឯណា វាជាសិទ្ធិរបស់កម្មករទេតើ។
ថ្មីៗ ៖ តែកន្លងមកលោកធ្វើសកម្មភាពចូលរួមជាមួយគណបក្សសង្គ្រោះជាតិ ក្នុងនាមសហជីព មិនមែនតែក្នុងនាមរូបលោក ម្នាក់ នោះទេ។
លោកជា មុន្នី ៖ មិនមានតែកម្ពុជាទេ ដែលមេសហជីពធ្វើសកម្មភាពបែបនេះនោះ នៅអាមេរិកក៏មានដែរ។ អាមេរិកសហជីព គឺជាក្រុមដ៍សំខាន់មួយ ដែលគណបក្សនយោបាយ ត្រូវការ ហើយសហជីពមានសិទ្ធិគាំទ្រគណបក្សណាដែលខ្លួនពេញចិត្ត ហើយអំពាវនាវឲ្យកម្មករដែលជាសមាជិករបស់ខ្លួនទាំងអស់ បោះឆ្នោតឲ្យគណបក្សដែលខ្លួនស្រឡាញ់។ ដូច្នេះសកម្មភាពរបស់ខ្ញុំជាសកម្មភាពត្រឹមត្រូវ។
ថ្មីៗ ៖ យោងតាមអ្វីដែលលោកនិយាយ តើគេអាចហៅសហជីពលោកថា ជាសហជីពគាំទ្របក្សប្រឆាំង ហើយមិនមានគោលការណ៍ ឯករាជ្យបានទេ?
លោក ជា មុន្នី ៖ ខ្ញុំសូមបញ្ជាក់ជាសាធារណៈថា «សហជីពខ្ញុំឯករាជ្យពិតប្រាកដ តែមិនអព្យាក្រឹតនោះទេ» ។ ឯករាជ្យនៅត្រង់ថា ពួកយើងធ្វើការគ្មាននរណាមួយអាចមកបង្គាប់បញ្ជា ឲ្យសហជីពសេរីធ្វើនេះ ធ្វើនោះតាមតែទំនើងចិត្តរបស់អ្នកនយោបាយណាមួយនោះទេ គឺធ្វើតាមគោលបំណងនិងឆន្ទៈរបស់សហជីពក្នុងន័យដើម្បីផលប្រយោជន៍កម្មករតែប៉ុណ្ណោះ។ ចំណែកមិនអព្យាក្រឹត គឺសហជីពយើងមានសិទ្ធិគាំទ្របក្សនយោបាយណាដែលខ្លួនពេញចិត្ត ហើយដែលអាចស្វែងរកផលប្រយោជន៍សម្រាប់កម្មករនិយោជិតរបស់សមាជិកសហជីពយើង។ តួយ៉ាងដូចជាគណបក្សប្រឆាំងជាដើមនេះ ដែលសហជីពយើងប្រកាសគាំទ្រ។ មួយវិញទៀត ជាចុងក្រោយខ្ញុំសូមបញ្ជាក់ឡើងវិញថា បេះដូងខ្ញុំត្រូវការអ្នកដឹកនាំដែលមានសមត្ថភាពពេញលេញ មកដឹកនាំប្រទេសខ្ញុំ៕
© រក្សាសិទ្ធិដោយ thmeythmey.com