ក្រោយរកឃើញការឆ្លងជាចង្កោមថ្មី ក្រុងវូហានមានផែនការតេស្តពលរដ្ឋទាំង១១លាននាក់

COVID-19

អន្តរជាតិ

ក្រោយរកឃើញការឆ្លងជាចង្កោមថ្មី ក្រុងវូហានមានផែនការតេស្តពលរដ្ឋទាំង១១លាននាក់

13, May 2020 , 7:39 pm

រូបភាព

ប្រជាជនក្រុងវូហាន ដើរឆ្លងថ្នល់នៅក្នុងទីក្រុង។ រូបភាព៖ Getty Image

ដោយ: ធៀន ភារិន្ទ

ទីក្រុង វូហាន ភាគកណ្ដាលប្រទេសចិន កំពុងគិតគូរបង្កើតផែនការធ្វើតេស្តលើប្រជាជនខ្លួនទាំងអស់១១លាននាក់ ដើម្បីរក COVID-19។ នេះបើតាមការចុះផ្សាយរបស់សារព័ត៌មាន BBC នាថ្ងៃទី១២ ខែឧសភា ដែលស្រង់តាមរបាយការណ៍របស់ប្រព័ន្ធផ្សព្វផ្សាយរដ្ឋចិន។ ការត្រៀមរៀបចំគម្រោងបែបនេះ ធ្វើឡើងបន្ទាប់ពីអាជ្ញាធរក្រុងវូហាន បានរាយការណ៍ពីករណីឆ្លងជាចង្កោមថ្មី ក្នុងរយៈពេលថ្មីៗនេះ។

អត្ថបទទាក់ទង

ស្ងប់ស្ងាត់មួយរយៈ ក្រុងវូហាន មានករណីឆ្លងជាចង្កោមថ្មី

ទីក្រុង វូហាន គឺជាកន្លែងផ្ទុះកូរ៉ូណាវីរុសដំបូងនៅក្នុងប្រទេសចិន និងជាចំណុចនៃការរីកសាយភាយទៅកាន់ពិភពលោក។ ជាកន្លែងផ្ទុះដំបូងកាលពីចុងឆ្នាំ២០១៩ រដ្ឋាភិបាលចិន បានបិទទីក្រុងមួយនេះ រយៈពេល ១១សប្តាហ៍ ដើម្បីទប់ស្កាត់ការរីករាលដាល COVID-19។

ចាប់ពីថ្ងៃទី៣ ខែមេសា អាជ្ញាធរក្រុងនេះ ពុំបានរកឃើញករណីឆ្លងCOVID-19ថ្មីសម្បីតែមួយករណីសោះ។ ក្រោយគ្មានករណីឆ្លងថ្មីច្រើនថ្ងៃជាប់គ្នា ចិនបានសម្រេចដកបម្រាមបិទក្រុង និងអនុញ្ញាតឲ្យប្រជាជនចាកចេញពីផ្ទះ។ យ៉ាងណាមិញ រហូតមកដល់ថ្ងៃទី១០ ខែឧសភា អាជ្ញាធរក្រុងវូហាន បានប្រកាសរកឃើញ ១ករណីថ្មីឡើងវិញ ហើយនោះគឺជាបុរសចំណាស់វ័យ ៨៩ឆ្នាំ ។ បន្ថែមពីលើនេះ នៅថ្ងៃទី១១ ខែឧសភា ក្រុងវូហាន បានរាយការណ៍ថា ខ្លួនរកឃើញករណីឆ្លងជាចង្កោមចំនួន ៥ករណី ដែលស្នាក់នៅក្នុងអាគារជាមួយគ្នា។

ដោយព្រួយបារម្ភពីបញ្ហានេះ ឯកសារផ្ទៃក្នុងមួយរបស់ទីក្រុងវូហាន ដែលចុះផ្សាយដោយប្រព័ន្ធផ្សព្វផ្សាយរដ្ឋចិន បានបញ្ជាក់ថា ខណ្ឌទាំងអស់ នៅក្នុងទីក្រុងវូហាន នាថ្ងៃទី១២ ខែឧសភា ត្រូវដាក់បញ្ជាឲ្យរៀបចំផែនការធ្វើតេស្តប្រជាជនទាំងអស់ក្នុងរយៈពេល ១០ថ្ងៃ។ ក្នុងន័យនេះ ខណ្ឌទាំងអស់ក្នុងក្រុងវូហាន ទទួលខុសត្រូវរៀបចំគម្រោងផ្ទាល់ខ្លួន ដោយផ្អែកទៅតាមដង់ស៊ីតេប្រជាជន នៅក្នុងខណ្ឌនីមួយៗ។ ជាពិសេស ក្នុងឯកសារដដែលនេះ ក៏បានបញ្ជាក់ផងដែរថា មនុស្សចាស់ សហគមន៍ដែលមានមនុស្សច្រើនត្រូវធ្វើតេស្តមុន។

យ៉ាងណាក៏ដោយ មានមតិមួយចំនួន យល់ឃើញថា ការធ្វើតេស្តក្នុងរយៈពេល ១០ថ្ងៃ លើមនុស្សប្រមាណជា ១១លាននាក់ គឺមិនអាចទៅរួច និងចំណាយថវិកាជាច្រើន។ ចំណែកលោក Peng Zhiyong នាយកផ្នែកសង្គោះបន្ទាន់នៅមន្ទីរពេទ្យZhongnan នៃសកលវិទ្យាល័យវូហាន បានទទូចថា ការធ្វើតេស្តនេះ គួរផ្តោតសំខាន់លើ បុគ្គលិកវេជ្ជសាស្ត្រ ក្រុមមនុស្សងាយរងគ្រោះ និងអ្នកធ្វើការជាប់យ៉ាងជិតស្និតជាមួយអ្នកជំងឺ។ ដោយឡែក នាយកនៅផ្នែកផ្សេងទៀតនៃសកលវិទ្យាល័យ បានបញ្ជាក់ថា ចិនមិនត្រូវធ្វើតេស្តលើប្រជាជនទាំងអស់ទេ ព្រោះ មនុស្សចំនួន ៣ទៅ៥លាននាក់ត្រូវបានគេធ្វើតេស្តរួចហើយនាពេលកន្លងមក។

សូមបញ្ជាក់ថា គិតត្រឹមថ្ងៃទី១៣ ខែឧសភា ចិនមានករណីឆ្លង COVID-19សរុបចំនួន ៨២៩២៦ករណី អ្នកស្លាប់ចំនួន ៤៦៣៣នាក់ និងអ្នកជាសះស្បើយមានចំនួន ៧៨១៨៩នាក់។ អ្នកជំងឺចិន ដែលកំពុងស្នាក់នៅមន្ទីរពេទ្យមានចំនួន ១០៤នាក់៕